Scandal.mn

Жагсагчид шоронд, уриалагчид төрд гардгийн тод жишээ нь Ж.Батзандан

2018/12/27

Жагсагчид шоронд, уриалагчид төрд гардгийн тод жишээ нь Ж.Батзандан

Author: batdorj on 27-12-2018, 17:34

-Таван залуу амиа алдсан жагсаалын автор төрд орж, нэрд гарсныг мартах учиргүй-

Одоогоос яг 10 жилийн өмнө буюу 2008 оны долдугаар сарын 1-нд болсон иргэдийн жагсаал, цуглаан эмх замбараагүй ширүүссэн нь таван залуугийн амийг авч одсныг монголчууд мартаагүй. Уг жагсаалын гол автор нь тухайн үеийн иргэний хөдөлгөөний тэргүүн Ж.Батзандан, О.Магнай нар байв. Гол байгаараа МАН-ыг сонгосон уг жагсаалаар дамжуулж “Монголын улс төр бохир боллоо. Шударга ёсны төлөө” гэж тэрбээр лоозондож иргэдийг турхирсан. Гэвч эцсийн дүндээ таван залуу амиа алдаж, олон арван залуус аавын хаалга татах шалтгаан болсон юм. Ж.Батзандангийн хувьд Цагдан хорих 461 дүгээр ангид хэд хоног саатуулагдах үедээ “Амь нас минь заналхийлэлд өртлөө” гэж захидал хүртэл бичсэн удаатай.

Гэтэл аравхан жилийн өмнө улс төр бохир болсныг гайхаж, өөрийнхээ шударгыг шагшиж суусан Ж.Батзандан УИХ-д хоёронтоо сонгогдоод байна. Ингээд зогсохгүй УИХ-ыг бойкотлож, спикерээ 48 цагийн хугацаанд огцрохыг шаардаж, хэрвээ шаардлагыг нь биелүүлэхгүй бол эсэргүүцлийн жагсаал зохион байгуулна гэв. Тэр өдөр нь өнөөдөр. Гэтэл 10 жилийн өмнөх түүх давтагдаж, идэр 9-ийн хүйтэнд жагссан иргэд амь нас, эрүүл мэндээрээ хохирвол хэн хариуцлага хүлээх вэ. Долдугаар сарын 1-ний жагсаалыг зохион байгуулж, иргэдийг турхирсан хэрнээ ард нь гэмгүй үлдээд зогсохгүй, УИХ-ын гишүүний сэнтийгээр “шагнуулсан” Ж.Батзандан лав хариуцлага хүлээхгүй нь лавтай. Тэгж мөрөөдөөд ч хэрэггүй байх. Учир мэдэх зарим улстөрчид долдугаар сарын 1-ний жагсаалыг албаар үймээлсэн гэх нь бий.

Үнэний ортой гэдгийг цөөнгүй баримтаар нотолсон. Тэгвэл өнөөдөр 11:30 цагаас зохион байгуулна гэж төлөвлөж, зарласан эсэргүүцлийн жагсаалд яг ийм тактик хэрэглэсэн байхыг үгүйсгэхгүй. Жирийн иргэд жагсаал хийхдээ цагдаагийн байгууллагаас өөрсдөө очиж зөвшөөрөл хүсдэг бол өчигдөр УИХ-ын гишүүд цагдаа, тагнуулын удирдлагуудыг төрийн ордонд камерын өмнө дуудаж аархсан. Начир дээрээ бол жагсаалын үеэр ямар нэг үймээн самуун дэгдэхээс сэргийлж буй мэт. Гэвч үнэн зүйл гэвэл үймээн, самуун дэгдээхээр аль хэдийн төлөвлөж, үүнийгээ “Жагсдаггүй ард түмэн ядуу амьдардаг” гэсэн утгатай үгээр өнгөлөн далдалж, урдаа төрийн цагдаагаар халхавч хийж байхыг үгүйсгэхгүй. Ж.Батзанданг ингэж чадах хүн гэдгийг монголчууд мартах учиргүй.

Нэхэн сануулбал, долдугаар сарын 1-нийг зохион байгуулагчид “Манайхаан, дайраад. Бид хамтдаа байна. Бүгдээрээ тэмцэж сайхан амьдаръя” гэж уриалсан. Тэдний нэг нь Ж.Батзандан. Гэтэл түүнийг ингэж хэлж, уриалснаас хойш түүний амьдрал л сайжирснаас биш жагсагчдын амьдрал сайжирсныг мэдэхгүй. Жагсагчид шоронд, Уриалагчид УИХ-д заларсан нь л туйлын үнэн юм. Өнөөдрийн жагсаалаар хэн нэгэнд эмнэлгийн тусламж үзүүлэхээр түргэний тэрэг Сүхбаатарын талбайд дуут дохио хангинуулан ирж, харин жагсаалын авторууд чанга яригчаар буруугаа бусдад чихсэн үгсийг хашгирч зогсох сценари ч зурагдсан байх магадлалтай. Бидний ой санамж ингэтлээ богинохон байгаагүй бол таван залуугийн аминд хүрсэн жагсаалын гол зохион байгуулагч Ж.Батзандангийн уриалж буй жагсаалд дахин очиж түүний улс төрд мацах шатны гишгүүр болох хэрэггүй л юм.

Г.Алимаа

More 256 0

Category: Улс төр

Улаанбаатарт шөнөдөө 31 хэм хүйтэн

2018/12/27

Улаанбаатарт шөнөдөө 31 хэм хүйтэн

Author: munkhbat on 27-12-2018, 17:27

Малчид, иргэдэд зориулсан мэдээ: Өнөө маргаашдаа ихэнх нутгаар жиндүү хүйтэн хэвээр байна.

2018 оны 12-р сарын 27-ны 16-22 цаг хүртэлх цаг агаарын мэдээ: Багавтар үүлтэй. Цас орохгүй. Салхи баруун хойноос секундэд 4-9 метр. 17 цагт 22 хэм, 20 цагт 25 хэм хүйтэн байна.

2018 оны 12 дугаар сарын 27-ны 20 цагаас 12 дугаар сарын 28-ны 20 цаг

хүртэлх цаг агаарын урьдчилсан мэдээ

БАРУУН АЙМГУУДЫН НУТГААР: Солигдмол үүлтэй. Цас орохгүй. Салхи зүүн өмнөөс секундэд 4-9 метр. Увс нуурын хотгор болон Завхан голын эх, Идэр, Тэс голын хөндийгөөр шөнөдөө 42-47 хэм, өдөртөө 31-36 хэм, Алтай, Хангайн уулархаг нутаг Хүрэн бэлчир орчмоор шөнөдөө 34-39 хэм, өдөртөө 23-28 хэм, Алтайн өвөр говиор шөнөдөө 22-27 хэм, өдөртөө 11-16 хэм, бусад нутгаар шөнөдөө 29-34 хэм, өдөртөө 18-23 хэм хүйтэн байна.

ТӨВИЙН АЙМГУУДЫН НУТГААР: Солигдмол үүлтэй. Нутгийн зүүн хэсгээр ялимгүй цас орно. Салхи баруун хойноос секундэд 5-10 метр. Дархадын хотгор болон Хөвсгөлийн уулархаг нутгаар шөнөдөө 40-45 хэм, өдөртөө 30-35 хэм, Хангай, Хэнтийн уулархаг нутаг, Орхон, Хараа, Ерөө, Туул, Тэрэлж голын хөндийгөөр шөнөдөө 36-41 хэм, өдөртөө 22-27 хэм, бусад нутгаар шөнөдөө 26-31 хэм, өдөртөө 16-21 хэм хүйтэн байна.

ЗҮҮН АЙМГУУДЫН НУТГААР: Солигдмол үүлтэй. Шөнөдөө цас орохгүй. Өдөртөө Хэнтэйн уулархаг нутгаар ялимгүй цас орно. Салхи баруун хойноос секундэд 5-10 метр. Шөнөдөө Ганга нуур, Хэрлэн, Онон, Улз, Халх голын хөндийгөөр 32-37 хэм, бусад нутгаар 27-32 хэм, өдөртөө бүх нутгаар 18-23 хэм хүйтэн байна.

ОТРЫН НУТАГ ХЭРЛЭНБАЯН-УЛААН ОРЧМООР: Үүлшинэ. Цас орохгүй. Салхи баруун хойноос секундэд 6-11 метр. Шөнөдөө 31-33 хэм, өдөртөө 17-19 хэм хүйтэн байна.

ГОВИЙН АЙМГУУДЫН НУТГААР: Солигдмол үүлтэй. Цас орохгүй. Салхи хойноос секундэд 5-10 метр. Дундговийн нутгийн хойд хэсгээр шөнөдөө 30-35 хэм, өдөртөө 18-23 хэм, бусад нутгаар шөнөдөө 26-31 хэм, өдөртөө 13-18 хэм хүйтэн байна.

УЛААНБААТАР ХОТ: Шөнөдөө багавтар үүлтэй, цас орохгүй. Өдөртөө үүлшинэ, ялимгүй цас орно. Салхи баруун хойноос секундэд 4-9 метр. Шөнөдөө Яармаг-Сонгины орчмоор 36-38 хэм, бусад хэсгээр 29-31 хэм, өдөртөө 18-20 хэм хүйтэн байна.

2018 оны 12 дугаар сарын 29-нөөс 2019 оны 1 дүгээр сарын 2-ныг хүртэлх

цаг агаарын урьдчилсан төлөв

29, 30-нд Алтайн уулархаг нутгаар, 31-нд говийн нутгийн өмнөд хэсгээр, 1 дүгээр сарын 1-нд баруун аймгуудын нутгийн баруун хэсгээр бага зэргийн цас орно. Салхи ихэнх хугацаанд секундэд 5-10 метр. Увс нуур болон Дархадын хотгор, Завхан голын эх, Идэр, Тэс голын хөндийгөөр шөнөдөө 41-46 хэм, өдөртөө 30-35 хэм, Хангай, Хөвсгөл, Хэнтийн уулархаг нутаг, Хүрэн бэлчир орчим, Орхон-Сэлэнгийн сав газар, Хараа, Ерөө, Туул, Тэрэлж, Хэрлэн, Онон, Улз, Халх голын хөндийгөөр шөнөдөө 35-40 хэм, өдөртөө 20-25 хэм, говийн бүс нутгийн өмнөд хэсэг болон цас багатай энгэр ээвэр газраар шөнөдөө 21-26 хэм, өдөртөө 11-16 хэм, бусад нутгаар шөнөдөө 28-33 хэм, өдөртөө 16-21 хэм хүйтэн байна. Хугацааны сүүлчээр ихэнх нутгаар өдөртөө хүйтний эрч бага зэрэг суларна.

Нийтэлсэн: Цаг Уур Орчны Шинжилгээний Газар

More 74 0

Category: Мэдээ мэдээлэл

АСАШЁОРЮҮ ДАГВАДОРЖ: ЭЛБЭГДОРЖ ОО! БИ ЧАМАЙГ ДЭМЖИЖ БАЙСАНДАА ХАРАМСАЖ БАЙНА!

2018/12/27

АСАШЁОРЮҮ ДАГВАДОРЖ: ЭЛБЭГДОРЖ ОО! БИ ЧАМАЙГ ДЭМЖИЖ БАЙСАНДАА ХАРАМСАЖ БАЙНА!

Author: saikhnaa on 27-12-2018, 16:57

Өнөөдөр Улаанбаатар хотын төв талбай дээр “МАНАН дэглэмийн эсрэг ард түмний нэгдэл” тайван жагсаал болсон. Тус жагсаалд олны танил эрхмүүд оролцож өөрсдийн дуу хоолойгоо илэрхийлжсэн бөгөөд энэ үеэр удаан асаагаагүй “АСА Станц”-аа асаасан Асашёорюү Дагвадорж тус жагсаалд нэгдэн Ж.Батзандан, Л.Оюун-Эрдэнэ нартай хамт УИХ-ын дарга М.Энхболд огцор хэмээн орилж байгаа харагдав.

Асашёорюү Дагвадорж энэ үеэр,”Монголын ард түмэн нүд нь сохорч, ам нь хаагдаагүй байгаа шүү. Энхболдоо чи огцор. Үнэний төлөө би нам харгалзахгүй шууд ярина. Элбэгдоржоо би чамайг дэмжиж байсандаа харамсаж байна” хэмээлээ.

Тэрээр өмнө нь Ерөнхийлөгч асан “Ц.Элбэгдоржид хандан, “Удахгүй чамайг шүүнэ ээ” хэмээн жиргэж байсан юм.

More 330 0

Category: Мэдээ мэдээлэл / Гол мэдээ

Э.Уужимсэтгэлт: Мэргэжил бүхэн сайхан, түүндээ сэтгэл, зүтгэл гаргах юм бол амьдрал өөрөө шагнана, амжилт дагана

2018/12/27

Э.Уужимсэтгэлт: Мэргэжил бүхэн сайхан, түүндээ сэтгэл, зүтгэл гаргах юм бол амьдрал өөрөө шагнана, амжилт дагана

Author: batdorj on 27-12-2018, 16:38

18 настай, гагнуурчин охин Э.Уужимсэтгэлт Ерөнхийлөгчийн нэрэмжит “2018 оны шилдэг залуу ажилчин” шагналын эзэн болж 10 сая төгрөгөөр шагнууллаа. Тэрээр "Монгол ур чадвар 2018" гагнуурчдын тэмцээнд 2 дугаар байрт шалгарч, шилдэг гагнуурчин болсон юм.

Шагнал гардуулсны дараа гагнуурчин охин Э.Уужимсэтгэлт “Намайг урамшуулж, дэмжиж байгаа багш нартаа, мөн Ерөнхийлөгчдөө маш их баярлалаа. Цаашдаа ч гэсэн улам илүү хичээх болно. Мэргэжил эзэмшээд цаашдын ирээдүйгээ бүтээхэд нь шинэ үеийн залуусаа манлайлан, хөтлөх болно. Гагнуурчин бол эрэгтэй хүний мэргэжил гэж хүмүүс хэлдэг. Гэхдээ би хувьдаа мэргэжлийг эрэгтэй, эмэгтэй хүнийх гэж ялгаж болохгүй гэж боддог. Хүн өөрөө хичээж, мэргэжилдээ сэтгэл гаргах юм бол ямар ч амжилтад хүрч чадна. Мэргэжил бүхэн сайхан. Хамгийн гол нь тухайн хүн өөртөө итгэлтэй, хичээл зүтгэлтэй шантрахгүй л байх ёстой" гэв.

Х.Баттулга: Мэргэжлийн сургалт, үйлдвэрлэлийг бодлогоор дэмжиж байгаа нь үр өгөөжөө өгч байна

Монгол Улсын Ерөнхийлөгч Х.Баттулга "Та бүхний өдрийн амгаланг айлтгая. Өнөөдөр маш их ач холбогдолтой шагналыг анхлан гардууллаа. Миний бие Монгол Улсын Ерөнхийлөгчийн хувиар нийслэлийн 9 дүүрэг, 21 аймгийн иргэдтэйгээ уулзах үеэр иргэд “залуучуудад ажил хангалттай олдох ч ажил хийх сонирхолгүй байна” гэсэн шүүмжлэлийг олон хэлж байсан.

Үндэсний статистикийн хорооны судалгаагаар 2018 оны эхний байдлаар зөвхөн бүртгэлтэй ажилгүй иргэдийн тоо 25 мянга орчим байна. Эдгээр хүмүүсийн дийлэнх нь 25-34 насны залуучууд. Гэтэл Хөдөлмөрийн бирж дээр 35 мянган ажлын байрны зар гарсан байдаг юм байна. Ажил хийх хүслээ илэрхийлж бүртгүүлсэн ажилгүйчүүдийн тооноос ажлын байрны тоо даруй 10 мянгаар илүү байна.

Энд гарч байгаа гол бэрхшээл нь мэргэжлийн ур чадвар, хөдөлмөрийн эв дүй юм. Ажил олгогчид мэргэжилтэй ажилтан олдохгүй байгааг байнга хэлдэг. Манай боловсролын тогтолцоо хөдөлмөрийн зах зээлийн эрэлт, нийлүүлэлтийн бодлого, төлөвлөлтийг тооцоололгүйгээр жил бүр ажилгүйчүүдийн эгнээг өргөтгөсөөр байгааг өөрчлөх цаг болсон. Үүний тулд мэргэжлийн сургалт, үйлдвэрлэлийг бодлогоор дэмжиж байгаа нь үр өгөөжөө өгч байна. Мэргэжлийн сургалт үйлдвэрлэлийн төвд эрэлттэй мэргэжил эзэмшсэн хүн, дээд сургуулийг хамгийн түгээмэл мэргэжлээр төгссөн хүн хоёрын ажилд орох магадлал 99:1-ийн харьцаатай болжээ” гээд 18 настай Э.Уужимсэтгэлийн нэгэн адилаар эрхэлж байгаа ажил, эзэмшсэн мэргэжилдээ гаргуун болж, ихийг хийж бүтээхийг залуучууддаа уриаллаа.

Itoim.mn

More 121 0

Category: Мэдээ мэдээлэл

Булган аймагт малын тоо толгой буурч, цөөн малтай өрхийн тоо нэмэгджээ

2018/12/27

Булган аймагт малын тоо толгой буурч, цөөн малтай өрхийн тоо нэмэгджээ

Author: munkhbat on 27-12-2018, 16:31

Булган /МОНЦАМЭ/ Булган аймаг мал тооллогын урьдчилсан дүнгээр 3,3 сая мал тоолуулж, мал сүргийн тоо толгой өмнөх оноос 1,7 хувиар буурлаа гэж аймгийн статистикийн хэлтсээс мэдээллээ.

Тэмээ 15, ямаа 6487 толгойгоор өсч, адуу 17,8, үхэр 28,6, хонь 16,2 мянгаар буурчээ. Сайхан сум адуу, хонь, Хутаг-Өндөр сум үхэр, ямаа, Рашаант сум тэмээний тоогоор аймагтаа тэргүүлсэн байна. Баян-Агт, Бүрэгхангай, Сэлэнгэ, Тэшиг, Хутаг-Өндөрөөс бусад суманд малын тоо өмнөх жилээс буурлаа.

Харин цөөн малтай буюу 200 хүртэлх толгой малтай өрхийн эзлэх хувь өмнөх жилийнхээс өссөн үзүүлэлттэй байна. Аймгийн хэмжээгээр нийт 10680 гаруй өрх мал тоолуулсан аж.

More 286 0

Category: Мэдээ мэдээлэл

Л.Оюун-Эрдэнэ: Бид зогсохгүй, Эднийг өрөвдөөд болино гэж байхгүй

2018/12/27

Л.Оюун-Эрдэнэ: Бид зогсохгүй, Эднийг өрөвдөөд болино гэж байхгүй

Author: batdorj on 27-12-2018, 15:42

"МАНАН дэглэмийн эсрэг монгол түмний нэгдэл" эсэргүүцлийн жагсаалын төлөөлөл УИХ-ын дарга М.Энхболдыг огцрохыг шаардсан бичгээ УИХ-ын даргад гардуулахаар Төрийн ордонд ороод байна. Шаардлагыг УИХ-ын гишүүн Л.Оюун-Эрдэнэ, Т.Аюурсайхан, Ж.Батзандан, Л.Болд, Х.Нямбаатар, Б.Энх-Амгалан, Х.Болорчулуун нарын долоон гишүүн гардуулахаар УИХ-ын даргын өрөөний гадаа очсон боловч УИХ-ын дарга хаалгаа тайлж өгсөнгүй. Тиймээс жагсагчид шаардлагаа УИХ-ын Тамгын газрын Ерөнхий нарийн бичгийн дарга Ц.Цолмонд хүлээлгэн өгсөн юм.

Ц.Цолмон “Шаардлагыг хүлээж авлаа. Монголын төрийн үйл ажиллагаа хуулийн дагуу явах ёстой. Албан ёсоор удахгүй хариу өгнө. УИХ-ын дарга яг одоогоор өрөөндөө алга байна. Гэхдээ ордон дотор ажилтай байгаа. Хаалга онгорхой байсан. Энд УИХ-ын даргатай хамт ажилладаг туслах, бие хамгаалагч нар болон цэргийн хүмүүс байгаа” гэсэн хариулт өгсөн юм. Харин УИХ-ын гишүүн Т.Аюурсайхан “УИХ-ын даргыг огцруулах асуудлыг бид бүх боломжит аргаар тавьж байна. Үр дүнд хүрнэ гэдэгт итгэж байна” гэлээ.

Э.Тэргэл

More 297 0

Category: Улс төр

Царцсан барилга, байгууламжууд ирэх оноос ашиглалтад орж эхэлнэ

2018/12/27

Царцсан барилга, байгууламжууд ирэх оноос ашиглалтад орж эхэлнэ

Author: munkhbat on 27-12-2018, 15:17

Эрүүл мэндийн салбарын төсөв, хөрөнгө оруулалт болон тус салбарт тулгамдаж буй асуудлын талаар ЭМЯ-ны төрийн нарийн бичгийн даргын албан үүргийг түр орлон гүйцэтгэгч Э.Содномжамцтай ярилцлаа.

ЭРҮҮЛ МЭНДИЙН САЛБАРЫН ТӨСӨВ 20 ОРЧИМ ХУВИАР ӨССӨН

-Эмнэлгийн ачаалал эрс нэмэгдсэн, утаанаас болж хүүхдүүдийн ханиад, томуу хүндэрсэн ярвигтай цаг үед та бид хоёр уулзаж байна. Эмнэлгийн байгууллагын хүртээмжийг сайжруулах, иргэдэд ойртуулах талаар сүүлийн жилүүдэд олон нийтийн зүгээс ч ихээхэн гомдол, санал ирж байгаа. 2019 оны төсөвт үүнийг шийдвэрлэх хэмжээний хөрөнгө мөнгө тусгагдаж чадсан уу. Төсөвт ямар өөрчлөлт, ахиц дэвшил гарсан бэ?
-Ирэх жилийн төсвийг өмнөх онуудтай харьцуулахад нэлээд онцлогтой баталсан. Төсөв бүтцийн хувьд өөрчлөгдсөн. Тодруулбал, орон нутгийн эрүүл мэндийн байгууллагуудын засвар, үйлчилгээтэй холбоотой төсвүүд тухайн орон нутгийнхаа Засаг даргын төсөвт багтсан.

Тухайн орон нутгийн Засаг даргад нийт засвартай холбоотой төсвийг хуваарилж, орон нутгийн удирдлагууд иргэдийн хурлаараа үүнийгээ хэлэлцүүлж, сургууль болон эмнэлгийн барилгаа засах уу, бусад төсвийн байгууллагуудынхаа засвар үйлчилгээг хийх үү гэдгийг орон нутагтаа шийддэг болно.

Мөн сумын өрхийн эрүүл мэндийн төвийн тогтмол зардлууд орон нутгийн төсөвтөө батлагдаж байгаа. Ингэснээр тухайн сумын эмнэлгийн барилгын түлш, халаалттай холбоотой тогтмол зардлууд Засаг даргын багцуудаас санхүүжнэ. Мөн эрүүл мэндийн байгууллагуудын эмнэлгийн түргэн тусламжийн автомашинуудын төсөв Эрүүл мэндийн сайдын багцад ордог байсан. Үүнийг бас өөрчилж орон нутагт эрх нь шилжиж байгаа.

Урд жилүүдтэй харьцуулахад салбарын төсөв бага хэмжээгээр өссөн.

Өөрөөр хэлбэл, сумын эрүүл мэндийн төвд өгдөг байсан автомашины төсвийг энэ жил эрүүл мэндийн салбарын төсөвт тусгаагүй. Урд жилүүдтэй харьцуулахад салбарын төсөв бага хэмжээгээр өссөн. Өссөн гол шалтгаан нь эрүүл мэндийн салбарын эмч, сувилагч, эмнэлгийн мэргэжилтнүүдийн цалин хөлстэй холбоотой төсөв нэмэгдсэн. Гэхдээ салбарын нийт хэрэгцээтэй харьцуулахад харьцангуй бага гэж хэлж болно.

Мөн Засгийн газрын үйл ажиллагааны хөтөлбөрт эрүүл мэндийн салбарын төсвийг үе шаттайгаар хоёр дахин нэмэгдүүлнэ гэсэн зорилт бий. Энэ зорилт улс орны эдийн засаг сайнгүй байгаатай холбоотойгоор хэрэгжих боломжгүй байгаа. 2016 оноос хойш өнгөрсөн хоёр жилийн хугацаанд төсөв 13.6 хувь өссөн.

Энэ жилийн өсөлттэй нийлээд 20 орчим хувь ахисан байна. Төсөвт гарсан өөрчлөлт гэвэл, Эрүүл мэндийн даатгалын сан ЭМДЕГ байгуулагдаж, Эрүүл мэндийн сайдын эрхлэх асуудлын хүрээнд ирсэн. Эрүүл мэндийн даатгалын сангийн төсөв тусдаа батлагддаг ч Эрүүл мэндийн сайдын эрхлэх асуудлын хүрээний байгууллага болж, Засгийн газрын агентлаг байгуулсан.

-Нисэхэд баригдаж буй нийслэлийн IV төрөх эмнэлэг хэзээ ашиглалтад орох вэ?
-300 ортой төрөх эмнэлгийн барилга 2011 онд эхэлснээсээ хойш долоон жил үргэлжилж байна. Дундуур нь шүүхийн маргаантай асуудал гарсан. Хууль, хяналтын байгууллага шалгасан, гүйцэтгэгч нь солигд сон гэх мэт олон шалтгааны улмаас ашиглалтад орохгүй удаж байна. Зөвхөн ЭМЯ-наас шалтгаалаад ингэж удаагүй.

Гүйцэтгэгч компаниуд болоод гэрээтэй холбоотой асуудал бий. Өнөөдрийн байдлаар үндэсний хөгжлийн газартай “Томобьюлдинг” ХХК концессын гэрээ байгуулан ажиллаж байна. Өөрөөр хэлбэл, тухайн гүйцэтгэгч компани өөрийн хөрөнгөөрөө барьж ашиглалтад оруулаад 2020 онд төсвөөс санхүүжилтээ авах ёстой. 2020 онд ашиглалтад оруулахаар гэрээ хийсэн боловч 2019 онд дуусгаж ашиглалтад оруулахаар ажиллаж байна. Улсад хүлээлгэж өгсний дараа санхүүжилт олгоно.

ӨНӨӨДӨР ТӨСӨВ УРСГАЛ ЗАРДЛАА Л САНХҮҮЖҮҮЛЭХ ХЭМЖЭЭНД БАЙГАА

-Иргэд аль болох хурдан ашиглалтад оруулж, төрөх эмнэлгүүдийн ачааллыг бууруулах ёстой гэсэн хүлээлттэй байна. 2020 он гэхэд баттай ашиглалтад орж чадах уу?
-Эрүүл мэндийн сайд тухайн барилга дээр өөрөө очиж, гүйцэтгэгч компанитай уулзсан. Манай яамны зүгээс гүйцэтгэгч нартай олон удаа уулзаж, энэ асуудлаар ярилцаж байгаа. Гүйцэтгэгч компани нь 2019 онд ашиглалтад оруулахаар зорьж байна. Төсвөөс 2018, 2019 онд ямар ч санхүүжилт өгөхгүй. Гэрээний дагуу 2020 оноос санхүүжилт өгч эхэлнэ.

-Олон жил царцсан барилгын төсөв, хөрөнгө оруулалтын зардал нь жил болгон өсөн нэмэгддэг. Үүнд эдийн засгийн байдал, шатахуун болон валютын ханшийн өсөлт нөлөөлөх тал бий. Төсөв нь хэр өөрчлөгдсөн бэ?
-Олон жил үргэлжилж байгаа, концессын гэрээтэй олон барилга бий. Гадаадын зээл тусламжаар хэрэгжиж буй барилгууд ч байна. Тиймээс нэг барилгыг онцолж ярих нь тийм ч зохимжтой биш. Тухайн компани, яам хоорондын асуудал байна. Мөн хоёр улсын хоорондын олон улсын гэрээ бий. Ийм олон асуудал байдаг учраас зөвхөн 300 ортой төрхийн асуудал ярих биш нийтлэг хүрээнд ярих нь зөв байх.

Манайх яамны хариуцаж буй Халдварт өвчин судлалын төвийн хашаанд баригдаж байгаа лабораторын барилгын асуудал олон жил үргэлжилж байгаа. Тоног төхөөрөмж, барилгаа нэгтгээд нэг гэрээ хийсэн. Мөн Яармаг дахь ахмад настнуудад үйлчлэх Герентологийн төв эмнэлгийн барилгын ажил олон жил үргэлжилж байна. Түлэнхийн төвийн барилгын асуудал ч бас дуусаагүй. Энэ жил ашиглалтад оруулах байсан боловч хугацаа их алдсан.

Төрийн байгууллагуудын уялдаа холбоогүй байдал ч үүнд нөлөөлсөн талтай. Энэ бүгдийг задалж ярина гэвэл нэлээн цаг орох байх. Бидний зүгээс өөрсдийн боломж, эрх, үүргийнхээ хүрээнд шахаж, шаардаж, аль болох хурдан ашиглалтад оруулахаар хичээж ажиллаж байна.

-Ирэх онд салбарын төсөв өсөхөд эмч нарын цалингийн нэмэгдэл нөлөөлсөн юм байна. Цалин нэмэгдэхтэй зэрэгцээд эмнэлгийн ажилтнуудын хариуцлагын тогтолцоо сайжирч, харилцаа, хандлага өөрчлөгдөх үү?
-Эрүүл мэндийн салбарт нийт 30 гаруй мянган хүн ажиллаж, аль чадахаараа ард иргэддээ чанартай тусламж, үйлчилгээ хүргэхийн төлөө хичээж байгаа. Харин харьцаа хандлагын асуудалтай цөөхөн хүн бий. Ажилдаа хариуцлагагүй, үйлчлүүлэгчтэйгээ зүй бус харьцдаг цөөхөн хүмүүсийг өнөөдөр нийгмийн сүлжээгээр хэтэрхий их “сурталчлаад”, сайн ажиллаж байгаа хүмүүсийг нь харин тоодоггүй. Тиймээс үнэн, зөв мэдээллийг ард иргэдэд хүргэх хэрэгтэй. Хэд хоногийн өмнө ГССҮТ-д очиж ажилласан.

Засгийн газрын томилолтоор ажиллаж яваад осолд орсон дөрвөн иргэн болон ар гэрийнхэнтэй нь уулзсан. Мөн тус эмнэлгээр үйлчлүүлж буй зарим иргэдтэй уулзахад бүгд сэтгэл хангалуун байгаагаа хэлсэн. Эмч, сувилагч, эмнэлгийн ажилтнуудыг сэтгэлээсээ магтсан харилцаа, хандлага харагдсан. Хариуцлагагүй ажиллаж байгаа хүмүүст хариуцлага тооцож байгаа.

Энэ салбартай холбоотой сайнаас илүү сөрөг мэдээллийг нийгэмд маш их хүргээд байгаа учраас эрүүл мэндийн салбар тэр чигтээ муу ажиллаж байгаа юм шиг буруу ойлголтууд хүрээд байна. Хэвлэл мэдээллийн байгууллагуудтайгаа хамтран иргэдээ үнэн, зөв мэдээллээр хангах тал дээр бид ажлаа сайжруулна.

-Эмнэлэгт үзүүлэх гэхээр танил тал хэрэгтэй болдог. Мөн гар цайлгадаг явдал бичигдээгүй хууль мэт болчихлоо. Цалин авч байгаа атлаа өвчтөнөөс гар хардаг, ялгаж харьцдаг асуудал байсаар байна. Үүнийг авлига гэж хэлэхэд түвэгтэй, үгүй гэхэд бас хэцүү байдаг шүү дээ.
-ЭМЯ Улаанбаатар хотод үйл ажиллагаа явуулж байгаа харьяа 17 байгууллага буюу томоохон эмнэлэг, төвүүдийн удирдлагуудтай 14 хоногт нэг удаа хуралдаж, тодорхой үүрэг чиглэл өгч, цаг үеийн асуудлаар эмнэлгийн байгууллагуудын тайлан мэдээллийг сонсдог. Өөрөөр хэлбэл, ЭМЯ эмнэлгүүдийн мэдээлэл солилцох ажил тогтмол, хэвийн байгаа. Үйлчлүүлэгч талархсан сэтгэлээ илэрхийлэх бол тухайн хүний асуудал. Энэ авлига биш.

Харин үйлчилгээ авах болон эмнэлэгт хэвтэхийн тулд мөнгө өгч байвал зохисгүй, зүй бус харилцаа.

Үйлчлүүлснийхээ дараагаар талархал илэрхийлж байгаа бол өөр ойлголт. Өндөр хөгжилтэй оронд манайхан очиж үзүүлэх гэж явдаг. Тэнд очоод хэдэн арван саяар нь төлбөр төлдөг. Монголд болохоор энэ орчин хаагдмал байгаад байдаг. Тэгэхээр нэг талдаа олон улсын эмчилгээ үйлчилгээг монгол улсад нэвтрүүлэх боломж, нөхцөл нь бүрдэхгүй байгаа.

Эмнэлэг өөрөө орлого олдог, тодорхой хэмжээний төлбөртэй үйлчилдэг олон улсын жишиг рүү явахгүй бол монгол улсын эрүүл мэндийн салбар бусад өндөр хөгжилтэй орнуудаас хоцорсон хэвээрээ байна. Шинэ техник, технологийг нэвтрүүлж чадахгүй байна.

Гадаадад ажиллаж байгаа эмч, эмнэлгийн мэргэжилтнүүдтэй нэг түвшний цалин авч чаддаггүй. Тиймээс сувилагч нар ажлаа орхиод Солонгос явж, сувилагчийн тоо цөөрсөн. Өнөөдөр улсын хэмжээнд 10 мянган сувилагч хэрэгтэй гэсэн тооцоо байна. Олон улсын стандартаар нэг эмчид хоёр сувилагч ногдох ёстой.

Гэтэл манайд нэг эмчид 1.2 сувилагч. Өөрөөр хэлбэл, 10 мянган эмчид 20 мянган сувилагч байх ёстой бол энэ тоо одоо 12 мянга байна гэсэн үг. Тиймээс бид эрүүл мэндийн салбарт дутагдалтай байгаа сувилагчийн тоог нэмэх, эмч болон сувилагчийн харьцааг тэнцвэржүүлэх үүднээс “1х2” зорилтот арга хэмжээ хэрэгжүүлж, 98 сувилагчийг давтан сургалтад хамруулан мэргэжлээрээ ажиллах эрхийг нь сэргээсэн. Тэдний 70 хувийг нь ажлын байраар бүрэн хангаад байна.

МИНИЙ ХУВЬД ТӨРИЙН БАЙГУУЛЛАГУУДАД 20 ГАРУЙ ЖИЛ АЖИЛЛАЖ БАЙНА

-Та энэ ажилд найман сарын өмнө томилогдсон. Анх ажлаа авч байхад нөхцөл байдал нэлээд хүнд байсан гэж сонссон.
-Төрийн нарийн бичгийн даргын ажил одоо ч их хэвээрээ л байна. Би өнгөрсөн дөрөвдүгээр сарын 17-нд төрийн нарийн бичгийн даргын үүрэг гүйцэтгэгчээр томилогдсон. Тэр үед ажилтайгаа танилцахад олон байгууллага магадлан итгэмжлэлээр орсон ч хурал хийгээгүй таван сар болсон байсан. 100 гаруй байгууллагын магадлан итгэмжлэлийн асуудал тэр үед хүлээгдэж байсан. Энэ асуудлыг бүгдийг нь шийдэж, цэгцэлсэн.

Магадлан итгэмжлэл гэдэг нь цаанаа нарийн учиртай. Магадлан итгэмжлэл хийгээгүй эсвэл хугацаа нь дууссан байгууллага эрүүл мэндийн даатгалаас санхүүжилт авч чадахгүй. Тухайн байгууллагуудаар үйлчлүүлж буй иргэд мөн халамжаас мөнгө авч чадахгүй. Мөн ЭМЯ дээр хугацаа хоцорсон, шийдвэрлээгүй 351 албан бичиг байсан.

Газрын дарга болон мэргэжилтнүүдтэйгээ хамтран ажиллаж, хугацаатай үүрэг даалгавар өгснөөр 12 хоногийн дараа үүнийг 9 болж бууруулсан. Одоогоор ЭМЯ-нд хугацаа хоцорсон бичиг өмнөхтэй харьцуулахад бага болсон.

Албан бичгийн хугацаа хоцроосон хүмүүстэй хариуцлага тооцож байгаа.

Эрүүл мэндийн байгууллагуудынхаа удирдлагуудтай 14 хоног тутамд хуралддаг. ЭМЯ-ны байранд биш тухайн байгууллага дээр очиж хуралддаг болсон. Ингэснээр удирдлагуудын ажлын уялдаа сайжирч байгаа.

Бусад эмнэлгийн дарга нарын хэрхэн ажиллаж байгааг харж, харилцан бие биеэсээ суралцаж байна гэсэн үг. Өнгөрсөн хугацаанд бид ЭМДЕГ, СЭМҮТ-д очиж ажилласан. Шийдвэрлэх ёстой асуудлуудаа ярилцсан. Дараагийн хурал улсын хоёрдугаар төв эмнэлэгт болно. Хуваарь гаргаад нэг удаагийн хуралд хоёр байгууллага ажлаа танилцуулдаг нь нэлээн үр дүнтэй байгаа.

Зөвхөн хуралдаад өнгөрөх төдий бус эмчлүүлэгч болон эмнэлгийн ажилчидтай газар дээр нь уулзаж, санаа бодлыг нь сонсож, цаашид сайжруулах ажлуудаа тодорхой болгож байна.

-Таныг ажлаа авахад мэргэжлийн бус хүн эрүүл мэндийн салбарт ороод ирлээ гэсэн яриа гарсан. Танай сайдтай ч холбоотой ийм яриа өмнө нь гарч байсан. Та энэ салбартай хэзээ, хэрхэн холбогдсон бэ?
-ЭМЯ-ны зургаа дахь сайдтай хамтран ажиллаж байна. ЭМЯ-нд 2005-2009 онд, АШУҮИХ-д 2014-2018 оны нэгдүгээр сар хүртэл ажилласан. АШУҮИХ-д эрүүл мэндийн салбарын мэргэшсэн боловсон хүчин, эрдэмтэн, профессор, докторууд ажилладаг. Монголын эрүүл мэндийн салбарын ноён оргилууд болох ардын болон гавьяат эмч нар ажилладаг. Энэ хүмүүстэй би дөрвөн жил хамт ажилласан.

Төрийн нарийн бичгийн дарга хүн ямар нэгэн хүнд онош тавихгүй, эмчилгээ хийхгүй. Харин төрийн захиргааны төв байгууллагыг удирдаж, энд ажиллаж байгаа хүмүүсийн ажлын уялдаа холбоог хангаж, чиглүүлэх нь үндсэн ажил. Үүнийгээ цалгардуулахгүй, төрийн ажлыг хурдан, шуурхай явуулах нь миний үүрэг. Маш сайн эмчийг эмнэлгийн дарга болгоод бичиг цаас, аж ахуй, барилгын шавар, шохой, санхүү төсөвтэй холиод тавьчихаар үүнээс болоод цаана нь иргэд хохирч байдаг.

Төрийн нарийн бичгийн даргаар, сайдаар ямар ч мэргэжлийн хүн ажиллах эрх зүйн орчин нээлттэй.

Миний хувьд төрийн байгууллагуудад 20 гаруй жил ажиллаж байна. Ямар нэгэн дарга болохын төлөө нэг өдөр ч ажиллаж үзээгүй. Өөрт оногдсон ажлаа л яаж сайн хийх вэ, хамт ажиллаж байгаа хүмүүсээ яаж илүү үр дүнтэй ажиллуулах вэ гэж бодож, ажиллаж ирсэн.

Хэн нэгний тусламж, дэмжлэгт найдаж явсан удаа байхгүй. Төрийн нарийн бичгийн даргын үүрэг гүйцэтгэгчээр томилогдсон найман сарын хугацаанд энэ ажлыг үүрэг, хариуцлага гэж ойлгож ажиллаж байна. Сэтгүүлч мэргэжилтэй хүн энэ салбарыг тэргүүлж, маш сайн ажиллаж байгаа.

Д.Сарангэрэл сайд хүн эмчлээгүй, тэгэх шаардлага ч байхгүй. Харин салбарын буруу жишиг, иргэдэд үйлчлэх эрүүл мэндийн байгууллагуудын тогтолцооны эмгэгийг эмчилж, эдгээх ажлыг удирдан зохион байгуулж байна. Хувь хүнийхээ хувьд хүнд итгэж, хариуцлага хүлээлгэж, хариуцлага тооцож ажиллаж, эрүүл мэндийн салбарт олон жил ярьсан ч хэрэгжүүлээгүй ажлуудыг бодитой болгосон.

ЭМЯ-нд олон жил ажилласан туршлагатай, мэргэшсэн төрийн албан хаагчид ажиллаж байгаа. Бидний ажлын үр дүнг магтаал, шүүмжлэл биш цаг хугацаа сайнаар харуулна гэдэгт итгэлтэй байна.
-Олон улсаас хөнгөлөлттэй төсөл, хөтөлбөр оруулж ирэхэд хэрхэн анхаарч байна вэ. Зөвхөн төсвийн хөрөнгө оруулалтаар санхүүжэхэд хэцүү болж байна шүү дээ?
-Гадаад харилцаа хэвийн байна. Өмнөх жилүүдтэй харьцуулахад ингэж сайжирсан, тэгж уруудсан гэж дүгнэх хугацаа болоогүй. Олон улсын байгууллагуудтай өдөр тутам байнгын уялдаатай ажиллаж байна.

Дэлхийн эрүүл мэндийн байгууллага, Азийн хөгжлийн банк, Дэлхийн банкны шугамаар манай салбарт олон төсөл, хөтөлбөр хэрэгжиж байна. Тухайлбал, Азийн хөгжлийн банкны шугамаар Сонгинохайрхан дүүрэгт жишиг эмнэлэг барьж байна. Дэлхий нийттэй хөл нийлүүлэн алхаж байж эрүүл мэндийн салбарын шинэ техник, технологийг нэвтрүүлэхийн төлөө зорьж байгаа.

Австрийн Засгийн газар долоон сая еврогоор Эх, хүүхдийн эрүүл мэндийн төвийн тоног төхөөрөмжийг нь шинэчлэх гэрээг байгуулсан.

Төсвийн хөрөнгө оруулалт хаана ч хүрэлцэхгүй байгаа нөхцөлд яах аргагүй гадаад харилцаа, хамтын ажиллагаанд ач холбогдол өгөх хэрэгтэй болдог.

Ингэж байж төсөл, хөтөлбөр авах, хөрөнгө оруулалтын зарим асуудлаа шийдэх шаардлага байна. Өнөөдөр төсөв урсгал зардлаа л санхүүжүүлэх хэмжээнд байгаа. Эмнэлгийн ажилтны цалин хөлсийг нэмэх, нийгмийн хангамжид анхаарах төсөв байдаггүй. Үүнээс болоод бэрхшээл, сорилт гарч байгааг үгүйсгэхгүй.

Төсөв хэмнэнэ, үр ашгийг нь сайжруулна гээд ажилтныхаа цалинг хасаж, танаад байсан юм алга. Ингэх ч боломжгүй. Эмч, сувилагч, эмнэлгийн мэргэжилтнүүдээ аль болох дэмжиж ажиллахыг зорьж байна.

-Сүүлийн үед иргэдийн дунд хавдрын тохиолдол ихэссээр байгаа нь юутай холбоотой вэ?
-Хүн өөрийнхөө эрүүл мэндэд анхаардаг болсон цагт л эрүүлжинэ. Өөрөөр хэлбэл, эмнэлгийн тусламж үйлчилгээг сайжруулахын зэрэгцээ хүн амын эрүүл мэндийн боловсролыг дээшлүүлэх хэрэгтэй байна. Өөрөө өөртөө анхаарч, урьдчилан сэргийлдэг, өвчин эмгэгийг эхний шатанд нь оношлуулж, эмчлүүлдэг байх нь чухал.

Эмнэлгийн зарим үйлчилгээг төлбөртэй болгохгүйгээр бүхий л асуудлыг төр хариуцах нь буруу гэж боддог. Манай улсад нас баралтын тэргүүлэх шалтгаан нь зүрх судасны өвчин болсон нь дасгал хөдөлгөөний дутагдал, буруу хооллолт, амьдралын буруу хэв маягтай холбоотой.

Нас баралтын хоёр дахь шалтгаан нь болоод буй хорт хавдрыг эрт үед нь оношлуулбал эмч нар эдгээж чадна. Мөн манай яам осол, гэмтлээс урьдчилан сэргийлэх сургалт, сурталчилгааг сайжруулах, нийгмийн эрүүл мэндийн ажлыг эрчимжүүлэхийн төлөө ажиллаж байна.

More 262 0

Category: Мэдээ мэдээлэл

100 ӨВЛИЙН ӨВГӨНИЙ ПАРАД БОЛНО

2018/12/27

100 ӨВЛИЙН ӨВГӨНИЙ ПАРАД БОЛНО

Author: munkhbat on 27-12-2018, 15:01

Хүслийн шинэ жил хаяанд ирж, хүн бүр хуучин оноо үдэж, шинэ оноо угтахаар сэтгэл догдлон хүлээж байна. Тэгвэл баярын уур амьсгалд хүч нэмэхээр Баянгол дүүргийн 100 Өвлийн өвгөн, 100 цасан охин ирж явна.

Тус дүүргийн хэмжээнд үйл ажиллагаа явуулж байгаа төрийн болон төрийн бус байгууллага, ерөнхий боловсролын сургууль, цэцэрлэг, 23 хороодыг хамарсан "100 ӨВЛИЙН ӨВГӨН”-ий парадыг Баянгол дүүрэг 5 дахь жилдээ зохион байгуулах гэж байна.

Парад маргааш буюу 2018 оны 12 дугаар сарын 28-ны 12:00 цагт Ганзам 20 дугаар сургуулиас Өргөө кино театр хүртэл аялах юм.

More 137 0

Category: Мэдээ мэдээлэл

Л.Болд: Маргааш нь бид 13 ордыг ард түмэндээ авч өгөх хуулийг батална

2018/12/27

Л.Болд: Маргааш нь бид 13 ордыг ард түмэндээ авч өгөх хуулийг батална

Author: batdorj on 27-12-2018, 14:54

Нэр бүхий таван гишүүний зохион байгуулсан “МАНАН-гийн эсрэг Монголын ард түмний нэгдэл” жагсаалд 20 гаруй мянган иргэн оролцсон байна. Эндээс манай иргэд бухимдалтай, төр засагтаа үгээ хэлэх, дуу хоолойгоо сонсгохыг хүсч байгаа нь харагдлаа. Жагсаал зохион байгуулагчид МАНАН бүлэглэл монголын ард түмний баялгаар тоглож, “Шударга бусын хонгил”-д үүрлэцгээж байна гэх агуулгатай үг хэлцгээсэн. УИХ-ын гишүүн Л.Болдын хэлсэн анхаарал татлаа. Тэрээр “-"Эрдэнэт"ийн 49 хувь, Цагаан суварга, Асгатын мөнгөний ордыг бид МАНАН бүлэглэлээс буцааж авна. Монголд стратегийн 15 орд байсан бол одоо 13 орд үлдсэн. МАНАН бүлэглэлийг ялбал маргааш нь бид 13 ордыг ард түмэндээ авч өгөх хуулийг батална.

Энэ бол УИХ-ын 40 гишүүний амлалт шүү. Баялгийн сангийн тухай хууль, Газар өмчлөлийн тухай хуулийн төслийг өргөн барьсан. Эдгээр хуулийг баталж байж эх орныхоо баялгийг ард түмэн эзэмшинэ” хэмээн хэлэв. Эрхэм гишүүний хэлсэн энэ үг өнөөдрийн жагсаалын эцсийн үр дүн байгаасай гэх хүслээ илэрхийлж байгаа иргэд саш олон байв. Жагслаа... Ард иргэд оролцлоо... Эрхэм түшээдэд хуулийн төсөл санаачлах, батлах эрх нь байгаа болохоор хүйтний эрч бууртал хэлсэн сайхан халуун дулаан үгэндээ эзэн нь болж, эх орны баялгийг үнэхээр иргэн бүртээ хүргээсэй билээ.

Ж.Жаргал

More 345 0

Category: Улс төр

ДАШБАЛБАРТ ХУРААГДСАН 150ТОНН ЖОНШИЙГ ХЭН ХУЛГАЙЛАВ ?

2018/12/27

ДАШБАЛБАРТ ХУРААГДСАН 150ТОНН ЖОНШИЙГ ХЭН ХУЛГАЙЛАВ ?

Author: saikhnaa on 27-12-2018, 14:53

Авлигатай тэмцэх газар, Азийн сан хамтран “Шударга бус байдлын үнэлгээний судалгаа”-г гурав дахь жилдээ хийжээ. Судалгаанд нийслэл болон хөдөө орон нутаг дахь төрийн байгууллагууд бүгд оролцсоноос төрийн байгууллагуудын шударга байдал хөдөө орон нутагт их алдагдсан, төсвийн зарцуулалт хамгийн их хэтэрч, хууль бусаар төсвийг захиран зарцуулж байна гэсэн дүгнэлт гарсан байна.

Хөдөө орон нутаг дахь төрийн байгууллагуудад шударга байдал алдагдаж, авлига хамгийн их байгаагийн нэг жишээ нь Дорнод аймгийн Дашбалбар сум гэдгийг сумын иргэд онцолж байна. Учир нь тус сумын Засаг дарга Б.Баттулгатай холбоотой гомдол иргэдээс цөөнгүй ирж аймгийн Засаг даргыг Тамгын газраас шалгалт хийхэд санхүүгийн багагүй зөрчил илэрсэн аж.

Тодруулбал, Дорнод аймгийн Дашбалбар сум нь уран, жонш, хар төмөр зэрэг уул уурхайн бүтээгдэхүүн ихтэй. Тус сумын нэгдүгээр багийн нутаг дэвсгэрээс хууль бусаар 150 тонн жонш олборлосныг сумын Засаг даргын орлогч н.Ганцогт, газрын даамал н.Ганзориг, байгаль орчны улсын байцаагч н.Билгүүн нар хураан авч, зургаар баталгаажуулжээ. Гэвч, хураагдсан энэ жонш нэг өдөр “алга болсон”, үүнийг хил давуулан экспортлоход сумын Засаг дарга Б.Баттулга оролцсон гэж сумын иргэд болон Иргэдийн хурлын зарим төлөөлөгчид хардаж байна. Энэ асуудлаар тус сумын Иргэдийн хурлын төлөөлөгч, МАН-ын гишүүн Н.Ёндонжамц, З.Зоригтбаатар нар Засаг даргаас “хураагдсан жоншийг хэн хулгайлсан”-ыг асуухад тодорхой хариулт өгөлгүй, “Би ганцаараа идээгүй” хэмээн хэдэрлэсэн байна. Тэгэхээр эндээс түүнийг хэн нэгэн дарамтлав уу, эсвэл тэр хэн нэгэнтэй хамтарч хураагдсан жоншийг зарав уу гэсэн асуулт тавигдахад хүрч байгаа юм.

Түүний хууль бусаар олборлосон гэх хураагдсан жоншийг албан тушаалаа урвуулан ашиглаж “алга болгосон” гэх асуудлыг шалгуулахаар иргэд хууль, цагдаагийнханд ханджээ. Харамсалтай нь, хууль хүчнийхэн энэ асуудлыг шалгахад хойрго хандаж байгаа нь цаанаа ямар нэгэн эрх ашгийг зөрчилтэй байж магадгүй гэсэн хардлага ч Дашбалбар сумынханд байгаа бололтой.

Дашрамд дурдахад, АТГ-ийн хийсэн судалгаанд төрийн байгууллагуудад ил тод байдал муу, авлигатай тэмцэх удирдлагын хүсэл эрмэлзэл тааруухан байгааг дотроо ажиллаж буй ажилчид нь өөрсдөө хэлж буй дурдсан байгаа. Тэгэхээр хөдөө орон нутагт төрийн байгууллага шударга ажиллахад АТГ-ын оролцоо чухал байгааг тус сумын иргэд хэлж байна.

More 250 0

Category: Гол мэдээ / Уул уурхай