Салхитын мөнгөний ордтой холбоотой гэх хэрэгт холбогдсон шүүгч, цагдаа зэрэг нийт 15 хүнийг шүүх хурал Хан-Уул дүүргийн Эрүүгийн хэргийн анхан шатны шүүхэд товлогдсон ч хоёр дахиа хойшиллоо. Өмнө нь буюу гуравдугаар сарын 19-нд товлогдсон шүүх хуралдаан шүүгдэгчдийн гаргасан хүсэлтийн дагуу хойшилсон билээ. 

Нийслэлийн прокурорын газраас Эрүүгийн хууль (шинэчилсэн найруулга)-ийн тусгай ангийн 22.5-1 (хахууль өгөх), 22.4-2.4 (хахууль авах), Эрүүгийн хуулийн 268.1 (хээл хахууль авах), 269.1 (хээл хахууль өгөх)-д зааснаар яллах дүгнэлт үйлдэж ирүүлсэн Ш.Мөнгөншагай нарын 15 хүнд холбогдох хэргийн гэм буруугийн шүүх хуралдаан Хан-Уул дүүргийн Эрүүгийн хэргийн анхан шатны шүүхэд 2020 оны 04 дүгээр сарын 13-ны өдрийн 09 цаг 30 минутад эхэлсэн боловч шүүгдэгч Ж.Цэцгээгийн өмгөөлөгч Б.Манлайжав нь /ХӨСҮТ-ийн тандалт судалгааны төвийн эмчийн магадлагаагаар 14 хоног тусгаарлагдсан/ талаар хүсэлт ирүүлсэн, шүүгдэгч Б.Сайханцэцэгийн өмгөөлөгч П.Одонтунгалаг, Э.Халиунбаярын өмгөөлөгч А.Золжаргал нар нь хүндэтгэн үзэх шалтгаангүйгээр шүүх хуралдаанд ирээгүй тул шүүгдэгч нарыг өмгөөлөх эрхээр хангаж шүүх хуралдааныг хойшлуулахаар тогтов.

Шүүхээс: өмгөөлөгч П.Одонтунгалаг, А.Золжаргал нарыг Зөрчлийн хуулийн 15.7 дугаар зүйлийн 2-д /Хэрэг хянан шийдвэрлэх ажиллагааны оролцогч шүүхэд хүрэлцэн ирэх, эсхүл шүүхэд мэдүүлэг өгөхөөс татгалзсан, зайлсхийсэн, эсхүл шүүхийн иргэдийн төлөөлөгч, шүүхийн захиргааны ажилтны үйл ажиллагаанд саад учруулсан бол хүнийг гурван зуун нэгжтэй тэнцэх хэмжээний төгрөгөөр торгоно/ заасны дагуу тус бүрийг 300.000 төгрөгөөр торгож, шүүх хуралдааныг 2020 оны 04 дүгээр сарын 27-ны өдрийн 09 цаг 30 минутад товлолоо.