Мөрийн хөтөлбөртөө "мэргэжил"-ийн Засгийн газрыг байгуулахаа амлаж, элгээрээ хэвтсэн эдийн засгаа "сэрээх" хариуцлага хүлээсэн МАН өнгөрсөн мягмар гарагт шинэ Засгийн газрынхаа бүтцийг гаргаж, Монгол Улсын Ерөнхийлөгч Ц.Элбэгдоржид өргөн мэдүүлсэн. Гэвч Ерөнхийлөгч Ц.Элбэгдорж шинээр эмхлэн байгуулагдах Засгийн газрын бүтэцтэй танилцаж  Ерөнхий сайд Ж.Эрдэнэбат болон төрийн эрхийг атгасан МАН-ын Удирдах зөвлөлийн гишүүдийн гаргасан шийдвэрт татгалзсан хариу өгсөн нь багагүй шуугиан дэгдээлээ.

Мэдээж МАН-ын зүгээс Ерөнхийлөгчийн хариу мэдэгдлийг хүлээж авахгүй, эсэргүүцлийн байр сууриа ч илэрхийлээд авсан.

Тэгвэл энэ бүхний хажуугаар 2017 оны Ерөнхийлөгчийн сонгуулийг ч одооноос ярьж эхэлжээ. Мэдээж Ерөнхийлөгчийн сонгуульд намуудаас магадлал өндөртэй, чансаа дээгүүр хүмүүсээ дэвшүүлж өрсөлдүүлнэ. Гагцхүү хэний хүү шаанстай вэ гэдэг л чухал.  Ерөнхийлөгчийн 2017 оны сонгуульд С.Баяр л оролцохгүй бол МАН-аас нэр дэвших нэр хүндтэй кандитат ховор гэж зарим хүмүүс ярьж байна. Нөгөөтэйгүүр Р.Амаржаргалын нэр ч яригдаж байгаа.

Харин МАХН-аас Н.Энхбаярыг Ерөнхийлөгчийн сонгуульд горилж буй талаар олон нийт гадарлаж буй. Гэвч тэрбээр хуулийн байгууллагад шалгагдсаар байгаа төдийгүй Г.Шийлэгдамбын хэрэгт татагдаж ял авч болзошгүй байгааг ч учир мэдэх хүмүүс хэлж байна. Хэрэв энэ бүхэн үнэн бол МАХН-аас алтан карттай хүн бол О.Баасанхүү. Магадгүй энэ бүхнийг эртнээс ажиглаж чадсан нэр нөлөө бүхий улс төрчид О.Баасанхүүтэй уулзалт хийгээд яваад байгааг ч үгүйсгэхгүй юм. Эх сурвалжийн мэдээлж буйгаар Хөвсгөл аймгийн МАН-ын нөлөө бүхий улс төрчийн зүгээс ч, МАХН-ын дарга Н.Энхбаярын зүгээс ч О.Баасанхүүг эргүүлдэж байгаа сурагтай.

МАН энэ сонгуульд хэдийгээр 65 суудал авсан ч нийт сонгогчдын 44 хувийн саналыг л авч чадсан. Өөрөөр хэлбэл 50 хувьд ч хүрээгүй гэсэн үг.  Энэ нь 31 хувийн саналтай байсан дээрээ МАХН-ын Ч.Улаан, Д.Тэрбишдагва нарыг элсүүлж, МАХН-ын гишүүнийн саналыг авсантай нь холбоотой. Хэрэв олон нийтийн дунд бий болоод буй дээрх таамаг үнэн бол МАХН хамгийн багадаа 13 хувийн саналаар МАН-ын саналыг хуваах нь тодорхой байна. 

Харин АН-ын хувьд анх 33 хувьтай байсан бол энэ сонгуулиар нэг хүний санал илүү авсан харин ч дэвшилттэй үзүүлэлтэй байна гэнэ шүү. Тэгвэл АН-аас Э.Бат-Үүл, З.Энхболд нарын дунд гол өрсөлдөөн явагдах магадлалтай байгаа аж. Иймээс ч гурав дахь субьектээс хэн нэр дэвших вэ гэдэг нь маш чухал бөгөөд үндсэндээ Ерөнхийлөгчийн сонгуулийн дүнг шийдэх юм. Тэгэхээр хүү хаашаа нүүх вэ гэдгээс бүх юм шалгаалж мэдэхээр байна. Ирэх Ерөнхийлөгчийн сонгууль ч ширүүхэн явагдах нь ойлгомжтой болж байх шив.