Америкийн тэрбумтан Илон Маск өнгөрсөн долоо хоногт Твиттер компанийг авах хэлэлцээгээ дуусгаж, энэ компанийн эзэмшигч болсон юм. Твиттерийн шинэ эзэн болсон тэрбээр ажилдаа орсон өдрөөсөө л захирлуудыг ээлж дараалан халж, захирлуудын зөвлөлийг татан буулгасан. Цаашлаад ажилтнуудыг халахаар төлөвлөж байгаа талаар Блүмберг агентлаг мэдээлжээ.

Тодруулбал, Твиттер компанийн ажилтнуудын тал орчим хувийг Илон Маск халахаар зэхэж байна гэж өөрсдийн эх сурвалжаас авсан мэдээлэлтэйгээр Блүмберг агентлаг 11 дүгээр сарын гуравны өдөр мэдээллээ. 

Эх сурвалжийн мэдээлснээр, Твиттер компанид ажилладаг 7,5 мянган хүний 3,7 мянгыг нь ажлаас хална, харин ажилдаа үлдсэн хүмүүсийг гэрээсээ ажиллахыг хориглохоор төлөвлөж байгаа гэнэ. Ингэснээр Илон Маск зардал хэмнэхээр тооцоолж байгаа гэж эх сурвалж мэдээлжээ. 

Илон Маск Твиттер компанийг 44 тэрбум доллараар худалдан авах талаарх мэдээлэл 2022 оны хавар гарч байлаа. Үүний дараа, Илон Маск Твиттер олон нийтийн сүлжээг худалдаж авах хэлэлцээгээ зогсоосон гэж мэдэгдэж байв. Ийнхүү түр зогсоосон шалтгаан нь олон нийтийн сүлжээн дэх хуурамч хаягуудыг шалгах ажлын үр дүнг хүлээх шаардлагатай байгаатай холбоотой хэмээн Маск мэдэгдэж байлаа. Улмаар Твиттер компани шүүхэд хандан, Илон Маск компанийг худалдан авах үүрэг хүлээсэн шийдвэрийг шүүх гаргасан бөгөөд 10 дугаар сард энэ хэлэлцээр өндөрлөсөн юм. 

Г.Бямбасүрэн

http://www.shuud.mn/a/544376