Олон зуун жилийн түүхтэй балетын урлагийн сонгодог хэлбэрийг хадгалж, 3D дүрслэл, гэрэл, медиа артын тусламжтайгаар үзэгчдэд үлгэрийн оронд очсон мэт ид шидийн мэдрэмжийг өгөх "Щелкунчик ба гайхамшгийн орон" бүжгэн жүжгийг шинэ жилийн баярын бэлэг болгон толилуулахад бэлэн болжээ. Тус уран бүтээлийг Монгол, Солонгосын хамтарсан "Элит балет" ХХК нь Ц.Цолмонбудын найруулгаар 2019 онд Солонгосын үзэгчдэд толилуулж, 2021 онд дахин тоглохдоо медиа арт урлагтай хослуулснаараа олон улсад анхдагч болсон байна.  

"Щелкунчик ба гайхамшгийн орон" медиа арт балетын бүжгэн жүжигт гарах Клара охины зүүдэнд тохиолдох Хулганы орон, Цасны орон, Гайхамшгийн орон зэрэг шидэт ертөнцийг бодит мэт төсөөлөгдөхүйцээр бүтээн Projection Mapping, Hologram, 3D background, Video effects бүхий шинэлэг шийдэл, сүүлийн үеийн технологийг ашиглан үйл явдал бүрийг тодотгож өгч буй аж. Мөсөн өргөө буюу Steppe Arena бол энэхүү уран бүтээлийг манайд толилуулах боломжтой цор ганц техник, технологийн шаардлага хангасан газар гэдгийг Ерөнхий найруулагч, бүжиг дэглээч Ц.Цолмонбуд хэлж байлаа. 

Онцгой сюрприз задлахад, арванхоёрдугаар сарын 31-ний өдрийн тоглолтын дараа уран бүтээлчидтэй дурсгалын зураг татуулах, хамт шинэ оныг угтах гайхалтай мөчүүд та бүхнийг хүлээж байгаа гэдгийг дуулгалаа. 

Ид шидийн ертөнцийг бодит мэт мэдрүүлэх үлгэрийн оронд тавтай морил!