“Эрдэнэт үйлдвэр” ТӨҮГ-ын Худалдан авалт, хангамжийн хэлтсийн дарга Ж.Ганзориг, мэргэжилтэн М.Жамбал гэсэн гурван хүнд холбогдох хэрэгт НПГ-аас яллах дүгнэлт үйлдэн Орхон аймаг дахь Сум дундын шүүхэд шилжүүллээ. Прокурорын байгууллагаас өнгөрсөн долоо хоногт эрүүгийн 253 хэрэгт яллах дүгнэлт үйлдсэн аж. Тэдгээрийн дотор авлига, албан тушаалын таван хэрэг багтсаны нэг нь дээрх хүмүүсийн холбогдсон үйлдэл. Ж.Ганзориг, М.Жамбал нар албан тушаалаа урвуулан ашиглаж, аж ахуйн нэгжүүдэд давуу байдал бий болгосон, хахууль авсан, үндэслэлгүйгээр хөрөнгөжсөн гэх хэрэгт яллагдагчаар татагдсан юм. Уг нь тэдэнд холбогдох хэргийг АТГ-ын Мөрдөн шалгах хэлтсийнхэн 2024 оны аравдугаар сард нэмж шалгаж дуусаад яллах дүгнэлт үйлдүүлэхээр прокурорын байгууллагад шилжүүлж байсан билээ.
Анх Ж.Ганзоригийг менежер н.Марал-Эрдэнийн хамт 2021 оны гуравдугаар сард АТГ-ынхан шалгаж эхэлсэн юм. Улмаар 2023 оны намар яллах дүгнэлт үйлдүүлж, шүүхэд шилжүүлэх саналаа илэрхийлэн прокурорын хяналтад хүргүүлж байв. Гэвч шүүхийн босгоор давалгүй, нэмэлт ажиллагаа хийлгэх болсноос хойш багагүй хугацаа өнгөрсөн юм. 2021 онд Ж.Ганзоригийг “Эрдэнэ үйлдвэр” ТӨҮГ-аас 2019 онд алхан бутлуур худалдан авах тендер зарлахад албан тушаалаа ашиглан нөлөөлж танил талынхаа “Икс вай зэт” гэх компанийг шалгаруулж, байгууллагадаа 257 сая төгрөгийн хохирол учруулсан хэрэгт буруутган шалгаж эхэлсэн талаар бид цаг тухайд нь мэдээлж байв.
Шүүхэд шилжүүлсэн авлигын хэрэг дунд Гадаадын иргэн харьяатын газрын ажилтанд хахууль өгөхийг завдсан А.Г-д холбогдох хэрэг багтсан байна. Манай улсад аялал жуулчлалын виз авч орж ирсэн Бүгд Найрамдах Сьерра Леон Улсын долоон иргэн Монголоос явахыг хүсэхгүй байжээ. Тиймээс тэдэнд оршин суух, хөдөлмөрлөх виз авч өгөхийн тулд А.Г хахууль санал болгосон гэнэ. А.Г гэм буруугаа хүлээн зөвшөөрч, хэргээ хялбаршуулж шийдвэрлүүлэх хүсэлт гаргасныг НПГ-ын хяналтын прокурор хүлээн аваад Дүүргийн эрүү, иргэний хэргийн хялбар ажиллагааны анхан шатны тойргийн шүүхэд шилжүүлсэн байна.
Сэтгэгдэл