Иранд есдүгээр сарын дунд үеэс эсэргүүцлийн жагсаал өрнөж эхэлснээс хойш 500 гаруй хүн амиа алдсан гэж АНУ-д төвтэй “HRANA” хүний эрхийг хамгаалах байгууллага мэдээлжээ. Тус байгууллагын мэдээллээр, амиа алдсан хүмүүсийн 69 нь 18-оос доош насныхан байсан бөгөөд 18400 гаруй хүн баривчлагдсан байна.

 

Өнгөрсөн ням гарагт эсэргүүцлийн жагсаалд үйлдвэрчний эвлэлийн төлөөллүүд оролцсоны дунд гал сөнөөгчид, Табриз хот дахь цементийн үйлдвэрийн ажилчид байжээ. Үүнээс гадна жагсаалыг дэмжиж байгаагаа илэрхийлсэн эмэгтэй жүжигчин Таране Алидустийг баривчлагдсан явдлыг эсэргүүцсэн жагсаал Техран хотын “Эвин” шоронгийн гадна өрнөсөн байна.

 

Иранд 22 настай бүсгүй Махса Амини толгойн алчуураа зохисгүй өмссөн гэх шалтгаанаар баривчлагдсаныхаа дараа амиа алдсанаас хойш эсэргүүцлийн жагсаал өрнөж эхэлжээ.