Төрийн өмчийн бодлого, зохицуулалтын газрын дарга Ц.Ням-Осор  "Эрдэнэт үйлдвэр” ХХК-ний ТУЗ-ийн гишүүдийг чөлөөлж, хувьцаа эзэмшигчид хуралдаж үйлдвэрийн ТУЗ-ийн дарга болонгишүүдийг эцэслэн томилсон талаар мэдээлэл хийлээ.

"Эрдэнэт"-ийн ТУЗ долоон гишүүнтэй байх бөгөөд тэдний дөрөв нь төрийн төлөөлөл байх аж.

"Эрдэнэт” үйлдвэрийн төрийн эзэмшлийн 51 хувийг төлөөлж ТУЗ-д дөрвөн гишүүнийг томилсон бол хувийн хэвшлийн 49 хувийг төлөөлж гурван гишүүн томилсноор "Эрдэнэт" үйлдвэрийн ТУЗ бүрджээ. Хувийн хэвшлийн 49 хувийн эзэмшигчдийн зүгээс компанийн ТУЗ-ийн дарга болон Ерөнхий захирлыг хоёр жилийн хугацаатайгаар ээлжлэн томилох санал гаргасан ч төрийн талаас дэмжээгүй байна. Ингэснээр "Эрдэнэт" үйлдвэрийн ТУЗ-ын дарга болон Ерөнхий захирлыг 51 хувийн төлөөллөөс томилохоор хоёр тал тохиролцжээ.

"Эрдэнэт” үйлдвэрийн 51 хувийг төрөөс төлөөлөх ТУЗ-ийн гишүүнээр УИХ-ын гишүүн асан Д.Дэмбэрэл, Засгийн газрын хэрэг эрхлэх газрын дэд дарга У.Бямбасүрэн, Уул уурхайн яамны Төрийн нарийн бичгийн дарга Г.Нандинжаргал, Сангийн яамны газрын дарга Н.Доржсэмбэд нарыг томилжээ.

Харин "Эрдэнэт" -ийн шинэ хувьцаа эзэмшигч буюу Mongolian Copper Corporation-н талаас ТУЗ-ийн гишүүнээр Да.Ганболд, О.Орхон, М.Мөнхбаатар нарыг томилсон байна. ТУЗ-ийг ЗГХЭГ-ын дэд дарга У.Бямбасүрэн удирдах юм байна.

Компанийн ТУЗ бүрэн бүрэлдэхүүнээрээ хуралдаж "Эрдэнэт" үйлдвэрийн ерөнхий захирлыг ойрын хугацаанд томилох гэнэ.

Ингэхдээ гүйцэтгэх удирдлагыг төр 51 хувийгтөлөөлж байгаа учраас компанийн тухай хуулийн дагуу ТУЗ-ийн гишүүдийн 66.6 хувиас дээш саналаар батламжилснаар ерөнхий захирлыг томилох юм.

Энэ тохиолдолд 49 хувийг эзэмшигч талын санал заавал орох бөгөөд, гүйцэтгэх удирдлагыг төрөөс дөрвөн жилийн хугацаатайгаар томилох шийдэлд хүрсэн аж.

Bolod.mn