АТГ-аас Л.Эрхбаатарт холбогдох хэргийг шүүхэд шилжүүлэх саналтайгаар прокурорын байгууллагад хүргүүлсэн байна.

Хэргийг эргэн сануулбал, 2022 оны есдүгээр сард "Дулааны цахилгаан станц-3” төрийн өмчит хувьцаат компанийн гүйцэтгэх захирал Л.Эрхбаатарыг бусдаас их хэмжээний хахууль авч байх үйлдэл дээр ЭЦА-ны ажилтнууд саатуулсан байдаг.

"Хасу-Эрчим” ХХК-ийн захирал, Аж үйлдвэрийн гавьяат ажилтан Б.Бат-Эрдэнэ гэгч Л.Эрхбаатарт 100 сая төгрөг өгөхөөр тохиролцож, урьдчилгаа 30 саяыг нь өгч байх үедээ баригдсан гэдэг.

"Хасу-Эрчим” ХХК нь "ДЦС-3” ТӨХК-иас энэ онд зарласан 274.6 сая төгрөгийн үнийн дүнтэй утаа сорогчийн гол худалдан авах, 738 орчим саяын үнийн дүнтэй өрлөг дулаалгын материал (багц-2) нийлүүлэх, нэг тэрбум гаруй төгрөгийн үнийн дүнтэй труба хоолой худалдан авах зэрэг тендерт шалгарч, гэрээ байгуулж байжээ.

Харин тухайн тендерт "Хасу-Эрчим”-ийг шалгаруулсныхаа хөлсөнд хахууль авсан байх магадлалтай гэж үзэж байсан юм.