Зам, тээврийн яамнаас мэдээлснээр, БНХАУ-ын Тяньжин боомтод саатаад байсан манай улсын импортын бараа, бүтээгдэхүүний 3162 чингэлгийн эхний ээлжийн 943 чингэлгийг Замын-Үүд өртөөнд хүлээн авчээ.

Тодруулбал, БНХАУ-ын ӨМӨЗО-ы хилийн Эрээн өртөөнөөс зургадугаар сарын 9-нөөс 17-ны өдрүүдэд буюу өнгөрсөн ес хоногийн хугацаанд импортын чингэлгийн 18 галт тэрэг хүлээн авсан байна. Энэ оны зургадугаар сарын 8-ныг хүртэл Тяньжин боомтоос хоногт импортын чингэлгийн 1 галт тэрэг хуваарийн дагуу тогтмол илгээдэг байсныг ийнхүү хоёр дахин нэмэгдүүлжээ.

Мөн Эрээн өртөөнөөс өнгөрсөн долоо хоногт автомашинаас вагонд шилжүүлэн ачсан 125 вагон ачаа орж ирснээс энэ сарын 16-нд 41, 17-нд 33 вагон орж ирсэн байна. Энэ нь өмнөх өдрүүдтэй харьцуулахад тээвэрлэлт хоёр дахин нэмэгдсэн үзүүлэлт аж.