Ерөнхийлөгч Х.Баттулга дахин нэр дэвших эрхгүй болжээ

2021/04/16 20:04

 Ерөнхийлөгч Х.Баттулга дахин нэр дэвших эрхгүй болжээ

УИХ-ын гишүүн Т.Доржханд Ерөнхийлөгчийн сонгуулийн тухай хууль Үндсэн хууль зөрчсөн хэмээн үзэж, Цэцэд мэдээлэл гаргасан юм. 

Тэгвэл Үндсэн хуулийн цэцийн шийдвэр гарчээ. Эх сурвалжийн мэдээлж буйгаар ҮХЦ-ээс "Ерөнхийлөгчөөр сонгогдож байсан болон ерөнхийлөгчөөр ажиллаж буй хүн дахин нэр дэвших болоод Ерөнхийлөгчийн сонгуулийн тухай хуулийн 3.1-ийн 2. 5.4 дэх заалтууд нь Үндсэн хуулийн 1.2, 30.2, 70.1 гэсэн заалтуудыг тус тус зөрчинө" гэсэн дүгнэлтийг гаргасан байна.

Ерөнхийлөгчийн сонгуулийн тухай хууль:

3.1.2."нэр дэвшигч” гэж 50 нас хүрсэн, сүүлийн таваас доошгүй жил эх орондоо байнга оршин суусан, Монгол Улсын Үндсэн хууль болон энэ хуульд заасны дагуу Монгол Улсын Ерөнхийлөгчид нэр дэвшин бүртгүүлж, нэр дэвшигчийн үнэмлэх авсан Монгол Улсын уугуул иргэнийг;
5.4.50 нас хүрсэн, сүүлийн таваас доошгүй жил эх орондоо байнга оршин суусан, Монгол Улсын Үндсэн хууль, энэ хуульд заасан бусад шаардлагыг хангасан Монгол Улсын уугуул иргэн Ерөнхийлөгчөөр сонгогдох эрхтэй.

Ерөнхийлөгчийн сонгуулийн тухай хуулийн дээрх заалтуудад Үндсэн хуулийн доорх заалтуудыг дэлгэрэнгүй тусгаж өгөөгүй, зөрчилдсөн тул дээрх хоёр заалтыг түдгэлзүүлэх шийдвэр гаргалаа. 

Үндсэн хууль:

1.2.Ардчилсан ёс, шударга ёс, эрх чөлөө, тэгш байдал, үндэсний эв нэгдлийг хангах, хууль дээдлэх нь төрийн үйл ажиллагааны үндсэн зарчим мөн.
30.2.Ерөнхийлөгчөөр тавин нас хүрсэн, сүүлийн таваас доошгүй жил эх орондоо байнга оршин суусан, Монгол Улсын уугуул иргэнийг зургаан жилийн хугацаагаар зөвхөн нэг удаа сонгоно.
70.1.Үндсэн хуульд хууль, зарлиг, төрийн байгууллагын бусад шийдвэр, нийт байгууллага, иргэний үйл ажиллагаа бүрнээ нийцсэн байвал зохино.

ҮХЦ-ийн шийдвэрийг 15 хоногт УИХ хэлэлцэж дэмжвэл шийдвэр хүчин төгөлдөр болно.

Хурлын шийдвэрийн талаар Т.Доржханд "ҮХЦ сүүлийн гурван сарын турш хуралдаж байна гэсээр өнөөдөр эцэллээ. Монгол улсад хууль хэрэгжих боломжтой гэсэн итгэл өгч байна. ҮХЦ өнөөдөр ямар ч байсан иргэдийнхээ талд шийдвэр гаргалаа. Одоо УИХ хүлээж авч баталгаажуулаад хуулийнхаа заалтыг засах ёстой" гэв.

Холбоотой мэдээ

Сэтгэгдэл

АНХААРУУЛГА: Уншигчдын бичсэн сэтгэгдэлд www.Scandal.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Сэтгэгдэлтэй холбоотой санал гомдлыг 9318-5050 утсаар хүлээн авна.