Засгийн газар ураны ордтой холбоотойгоор "Хан ресурс” компанид 104 сая төгрөгийн өрөнд ороод байгаа. Учир нь манай талыг буруутай гэсэн шийдвэрийг олон улсын Арбитрын шүүх өнгөрсөн хоёрдугаар сард гаргасан юм. Харамсалтай нь шүүхийн шийдвэр гарсан өдрөөс хойш уг мөнгөн дүнгийн хүү өдрөөс өдөрт өссөөр байна.

Тэгвэл өнгөрсөн дөрөвдүгээр сарын сүүлээр Хууль зүйн яамнаас уг мөнгийг төлөх боломжгүй. Манай тал буруугүй учир Арбитрын шүүхийн шийдвэрийг өөрчлүүлэх хүсэлтэй байгаа илэрхийлсэн. Үүний хариуд "Хан ресурс” компанийн хохирлын нөхөн төлбөрийг яаралтай гаргуулахаа мэдэгдээд байгаа билээ. Тэгвэл тэд саяхан Арбитрын шүүхийн дүгнэлтийг албан ёсоор хэвлэл мэдээлэл, олон нийтэд ил болгожээ.

Уг асуудлаар манай сайтад Монгол Улсын хөрөнгө оруулалтын асуудлаар Улаанбаатар, Лондонгийн хооронд үйл ажиллагаа явуулж байгаа уул уурхайн санхүүгийн шинжээч, Independent Mongolian Metals & Mining Research буюу "Хараат бус Монголын уул уурхай санхүүгийн судалгаа" эрхлэгч, Лондонгийн их сургуулийн Санхүү эдийн засгийн шинжлэх ухааны магистр, судлаач Ч.Эрдэнэдалай /Dale Choi/ өөрийн байр ийнхүү илэрхийлсэн юм.

Тэрээр "Хан ресурс” компанитай хийж буй уг маргаанаа Засгийн газар яаралтай шийдэх хэрэгтэй. Тэд арбитрын шүүхийн дүгнэлтийг олон нийтэд ил болголоо. Цаг тутамд биднээс мөнгөө авахаар нэхэмжилж байна. Магадгүй нөхөн төлбөрийг өгөхгүй бол олон улсад байгаа бидний өмчийг битүүмжилж эхэлж болох юм. Урд нь ийм байдалд Аргентина улс орж байсан. Эцэст нь усан онгоцоо битүүмжлүүлж байж өрөө төлсөн. Хэрвээ тэгвэл бидний нэр хүнд асар их унах болно. Гадны хөрөнгө оруулагчид Монгол Улсад итгэх итгэлээ бүр мөсөн алдана. Тэрхүү нийтлэлдээ "Бид бүх зүйлийг хууль ёсны дагуу хийсэн. Ил тод байдлыг хангах үүднээс Арбитрын шүүхийн дүгнэлтийг ил болголоо. Монголын ЗГ Оросын компаниас илүү их ашиг олно гэж бидний лицензийг хууль бусаар авсан нь тогтоогдсон. Энэ үйлдэл нь ОУ-ын Эрчим хүчний хүуль болон Монгол улсынхаа гадаад хөрөнгө оруулалтын хуулийг зөрчсөн” гэсэн зүйлийг өгүүлсэн байна. Миний бодлоор ЗГ-аас "Хан Ресурс” компанитай эвийн байдлаар учраа олох хэрэгтэй. Үнэхээр мөнгө байхгүй бол таллаж төлөх. Эсвэл тохиролцож мөнгөн дүнг бууруулах арга авах нь зүйтэй” гэсэн юм.

Ерөнхийдөө манай улсын нэр хүндийг олон улсад унагасан таагүй явдал "Хан Ресурс” компанитай холбоотойгоор өрнөж байна. Засгийн газар уг асуудлын нэн яаралтай анхааралдаа авах хэрэгтэй. Учир нь тэрхүү өрийн хэмжээ өдрөөс өдөрт өссөөр байна. Хэрвээ асуудал даамжирвал хөрөнгө оруулагчид Монголоос татгалзах магадлалтай гэдгийг эрдэмтэн, судлаачид хэлсээр байна.

Б.Анир /Uls.mn/