Орос жуулчин залуу Владимир Попов 23 настай байжээ. Тэрээр аюулт махчинтай тэмцэлдэх үедээ "аав аа" хэмээн хашгирч байсан гэнэ. Харин Владимирын сэтгэлээр унасан эцэг Юрий хүүгээ тусламж гуйж байхад нь маш их айхаас өөр яаж ч чадаагүй тухайгаа ярьсан байна. Тэрээр хэвлэлд өгсөн ярилцлагадаа "Бид наран шарлагын газар очиж амрах гэж явсан. Миний хүү рүү акул дайрсан, энэ бүхэн хэдхэн секундын дотор болсон. Энэ бол аюулгүй далайн эрэг. Эргэн тойронд усан онгоц, дарвуулт онгоцууд байдаг. Тэнд хэзээ ч ийм зүйл болно гэж бодоогүй. Тэд ихэвчлэн зэрлэг далайн эрэг рүү дайрдаг. Үнэхээр золгүй явдал боллоо" гэжээ. Зүрх нь шархалсан аав хүүгийнх нь ойролцоо түүнд туслах гэр бүлийн гишүүд байгаагүй гэж хэлсэн ч эхний мэдээллээр 23 настай найз охин нь халдлагаас зугтаж чадсан гэсэн юм. Мөн өөр хоёр ч бүсгүй зугтаж, уснаас гарч амжжээ. Аймшигт халдлага болохоос өмнө Владимир эцэгтэйгээ хэдэн сарын турш Египетэд амьдарч байжээ.   

Загасчид Владимирын аминд хүрсэн акулыг барьсан бөгөөд мэргэжилтнүүд акулыг задлан шинжилж, гэдсэн дотроос нь залуугийн шарилыг олсон байна. "Даваа гарагт Далайн Шинжлэх Ухааны Хүрээлэн болон Улаан тэнгисийн нөөц газрын мэргэжилтнүүд хүрээлэнгийн музейд байрлуулах бэлтгэлийн үүднээс Хургада хотод акулыг занданшуулах ажлыг эхлүүлсэн" гэж Арабын мэдээллийн Al Arabiya суваг мэдээлэв. Харин ноён Попов хүүгээ чандарлаж, төрөлх Орос оронд нь нутаглуулна гэж мэдэгджээ.

Бас нэгэн мэдээллээр тухайн акулыг муми болгож, Хургадагийн Тэнгисийн шинжлэх ухааны музейд өгөхөөс гадна акулыг зан авирын шалтгааныг олж тогтоох, өмнө нь хэд хэдэн осол гаргасан амьтантай холбоотой эсэхийг тогтоох зорилгоор судалгаанд хүлээлгэн өгсөн байна. Улаан тэнгисийн эрэг орчмын бүс нутагт халдлага ховор тохиолддог ч өнгөрсөн жил акулууд Хургада дахь аялал жуулчлалын газарт хэдхэн хоногийн зайтай Австри, Румын хоёр эмэгтэйг хөнөөжээ.