"Сoal Mongolia” үргэлжилж байна. Эхний өдрийн хуралдааны нэг онцлох илтгэл нь S&P-гийн ахлах шинжээч Эдвин Ёогийн танилцуулсан "Хувьсан өөрчлөгдөж буй нүүрсний зах зээл дэх Монголын үүрэг роль” байлаа.

Ингээд түүний илтгэлээс онцлох санааг танилцуулж байна.

АВСТРАЛИ, БНХАУ ХОЁР НҮҮРСНИЙ ҮНИЙГ ШИЙДЭЖ БАЙНА

Коксжих нүүрсний үнэ маш их хэлбэлздэг. Өнгөрсөн 15 жилд 4 удаа үнэ 300 ам.доллар давж өссөн байна. Австралийн Күинсландад /зах зээлийн 50 хувийг нийлүүлдэг/ ямар нэг юм болвол үнэ өснө, мөн БНХАУ-д эрэлтийн асуудал гарвал үнэ өснө.

БНХАУ, Австрали хоёрын асуудал үнийг шийдэж байна.

2017 оны VII сараас хойш коксжих нүүрсний үнэ 40 хувиар өссөн. Энэ нь дараах гурван шалтгаантай.

• Австралид болсон циклон салхи
• БНХАУ-ын Шанси мужид нийлүүлэлтийн доголдол үүссэн /уурхайн осол/
• ОХУ-ын зүүн хязгаарт /Алс Дорнод/ үер болсон.

МОНГОЛ УЛС ЭКСПОРТООРОО ДЭЛХИЙД ДӨРӨВДҮГЭЭРТ ОРЖ БАЙНА

Нүүрсний экспортын хэмжээгээр Монгол Улс Австрали, Канад, АНУ-ын дараа дөрөвдүгээрт бичигдэж байна. Гэхдээ энэ экспортын 99 хувь нь газар зүйн нөхцөл байдлаасаа хамаарч БНХАУ руу гардаг. Харин Австрали улсын нийт нүүрсний экспортын 60 хувь нь БНХАУ руу гардаг.

БНХАУ-ын импорт 2016 онд 23 хувиар нэмэгдсэн. Энэ нь дотоодын уурхайнуудын ажиллах хоногийг 365-аас 276 болгож бууруулсантай холбоотой.

Мөн БНХАУ-ын коксжих нүүрсний чанараас Монголынх илүү байгаа учраас худалдан авагчдын сонирхлыг их татаж байна.

НҮҮРСНИЙ ЗАХ ЗЭЭЛ ДЭХ МОНГОЛ УЛСЫН ҮҮРЭГ ИХ

Коксжих нүүрсний хамгийн том хэрэглэгч нь БНХАУ юм. Монгол Улсын нүүрсний чанар хагас зөөлөн, бага хэмжээний үнслэгийн агууламжтай байдаг учраас сайн бүтээгдэхүүн байж чаддаг.

Монголд үйлдвэрлэсэн нүүрсийг олон улсын зах зээлд гаргахад хоёр үе шаттай үнийн асуудал үүсдэг.

Монгол нүүрс БНХАУ-ын хувьд далайн тээвэртэй өрсөлдөж чадна. Мөн Австралийн нүүрсийг орлох, хятад нүүрстэй холих байдлаар ашиглах боломжтой.

Харин сул талын хувьд нэг улсаас хамааралтай. 

Б.УЧРАЛ, IKON.MN