Баянгол дүүргийн 10 дугаар хороололд уржигдар шөнө Приүс 30 маркийн машин шатсан хэрэг гарсан билээ. Тодруулбал, орон сууцны гадна байрлуулсан Тоёота Приүс 30 маркийн автомашины зай дэлбэрсэн бололтой хойд тал нь тэр чигтээ шатаж, улмаар хажуу тийшээ шилжиж бас нэгэн машиныг шатаасан байгаа юм. "Машин шатаж байна” гэсэн дуудлагаар нийслэлийн онцгой байдлын газрын гал унтраах ангийнхан яаралтай арга хэмжээ авч, галыг бүрэн унтраасан байдаг.

Одоогоор юунаас болж машин шатсан талаарх шинжээчийн дүгнэлт гараагүй байна. Харин дээрх Приүс 30 маркийн машины эзэн ихэд эмзэглэж байна. Учир нь хэн нэгний санаатай үйлдэл байж магадгүй. Түүнээс машины зай дэлбэрээгүй байх. Худалдаж аваад сар ч болоогүй шинэ машин дэлбэрнэ гэж байхгүй. Өөрийнхөө нэр дээр ч шилжүүлж амжаагүй байхад шатчихлаа.

Машины хойд талын хоёр дугуйнаас бөөрөнхийлөөд шатааж байсан цамц мөн машины хажууханд нь тарваганы мах хүртэл олдсон. Бүгдийг нь шинжлүүлэхээр өгсөн байгаа. Гэтэл гадуур худлаа цуурхал мэдээлэл тарсанд харамсч байна хэмээн ярьжээ.