Баянзүрх дүүргийн 10, 19 дүгээр тойрогт өнгөрсөн бямба гараг буюу 3 дугаар сарын 23-ны өдөр дахин сонгууль явагдсан. Энэ сонгуульд МАН-ын нэр дэвшигчид ялалт байгуулсныг Баянзүрх дүүргийн Сонгуулийн хорооноос зарласан юм.

Баянзүрх дүүргийн 10 дугаар тойрогт сонгогчдыг 55.2 хувийн саналаар МАН-аас нэр дэвшигч Г.Доржпалам, 19 дүгээр тойрогт 52.7 хувийн саналаар Б.Галхүү нар ялалт байгуулж, ИТХ-ын төлөөлөгчийн түр үнэмлэхээ гардан авчээ.

Ийн ялагч нь тодорсон сонгууль анхнаасаа хууль бус байсныг Баянзүрх дүүргийн АН-аас мэдээлэв. Хууль бус тогтоол шийдвэрээр явагдсан учраас АН-ынхан энэ сонгуульд оролцоогүй гэнэ.   

Баянзүрх дүүргийн АН-ын хорооны дарга Д.Пүрэвдаваа "Үндсэн хуулийн цэцийн шийдвэр, УИХ-ын тогтоол, Монгол Улсын хууль албан ёсоор хүчингүй болчихоод байхад 2019 оны 01 сарын 19-ны өдөр Баянзүрх дүүргийн Сонгуулийн хорооны тогтоол гарсан. Энэ тогтоолдоо хүчингүй болсон хуулийг ашигласан. Ямар ч тушаал шийдвэр хүчин төгөлдөг мөрдөгдөж байгаа хуулийн заалтыг мөрдөх үүрэгтэй. Гэтэл  Үндсэн хуулийн цэцийн шийдвэр, УИХ-ын тогтоолоос дээгүүр шийдвэр гаргадаг сонгуулийн хороо үйл ажиллагаа явуулж байна. Бүр татвар төлөгчдийн мөнгөөр сонгууль. Ийм хууль бус сонгуульд АН оролцоогүй” гэсэн тайлбарыг өгч байна.

Мөн  Баянзүрх дүүргийн ИТХ-ын төлөөлөгч, дүүрэг дэх МЗХ-ны салбарын дарга Энхбаатар төрийн эрхийг хууль бусаар авах үйлдэл гаргаж, мөнгө тарааж байгаад газар дээрээ баригдсан. Хууль хэрэгждэг бол энэ хүнд иргэдийг төлөөлөх эрх байхгүй гэдгийг тэрбээр нэмж хэллээ.

М.Болд