Уур амьсгалын өөрчлөлтийг тогтоон барихын тулд сэргээгдэх эрчим хүч хэрэглэж, цахилгаан хөдөлгүүрт автомашин хөлөглөх хэрэгтэй тухай бид ярьж байгаа.

Гэвч ийм хэрэглээнд шилжих дэд бүтцийг байгуулахын тулд хүн төрөлхтөн зарим металлын олборлолтоо огцом нэмэгдүүлж, энэ нь эргээд хүрээлэн байгаа орчинд болон нийгэмд сөрөг нөлөө үзүүлэхээр байгааг шинэ судалгаа харуулжээ.

Institute for Sustainable Futures байгууллагын судлаачид цахилгаан автомашин, их багтаамжтай батарейг олноор үйлдвэрлэхэд кобальт, лити зэрэг металлын эрэлт огцом нэмэгдэхээр байгааг тогтоосон байна.

Тухайлбал нэг цахилгаан хөдөлгүүртэй автомашины lithium-ion батарейг үйлдвэрлэхэд 5-10 кг кобальт шаардагддаг.

Энэ түүхий эдийн 60 хувийг Конгын Ардчилсан БНУ-аас олборлодог байна. Энэ улс дайн самуун, тогтворгүй байдлаараа алдартайгаас гадна уурхайнуудад нь хүүхдийн хөдөлмөрийг өргөнөөр ашигладаг. Үндсэндээ газрын ховор эрдэс болох кобальтын өсөн нэмэгдэж байгаа эрэлтийн улмаас Конго улс байгаль орчны хувьд ч, нийгэм эдийн засгийн хувьд ч хохирч байна.

Үүнээс гадна судлаачид нарны эрчим хүчний хавтан, салхин турбин үйлдвэрлэхэд ордог 14 металлын эрэлтийг судалсан байна.

Хэрвээ дэлхий нийтээр 100 хувь сэргээгдэх эрчим хүчний хэрэглээнд шилжвэл лити болон никелийн эрэлт тус тус 280, 136 хувиар нэмэгдэх төлөв харагджээ.

Эрэлтийг хангахын тулд олон улс орон газрын хэвлийгээ ухаж, байгаль орчноо сүйтгэхээс гадна хөдөлмөрийн аюулгүй байдал ноцтой түвшинд хүрэхээр байгаа гэнэ.

Энэ их эрэлт, сөрөг үр дагаварыг бууруулах шилдэг арга нь түүхий эдийг дахин боловсруулах юм гэж тус тайланд дүгнэжээ.

Одоогоор Apple, Amazon зэрэг технологийн томоохон компаниуд бараа бүтээгдэхүүнээ дахин боловсруулах системийг бий болгохоор ажиллаж байгаа ч дөнгөж эхлэлийн шатандаа яваа юм.

Эх сурвалж: Engadget