"Оюу Толгой” төслийн далд уурхайн санхүүгийн тооцооллоос харахад Монгол Улс ногдол ашиг хүртэхгүй, 22 тэрбум ам.долларын өртэй үлдэнэ. Мөн 2051 он хүртэлх хугацаанд ердөө дөрвөн жил аж ахуйн нэгжийн орлогын албан татвар буюу ашгийн татвар төлнө. Эхний удаа төлөх нь 2038 он. Мөн төслийн нийт хугацаанд төлөх ААНОАТ-ын хэмжээ 430 орчим сая ам.доллар. Энэ нь өнөөгийн үнэ цэнээр 70 гаруй сая ам.доллар буюу маш чамлахаар тоо гэж ЗГХЭГ-ын дэд дарга Б.Солонгоо "Bloomberg TV Mongolia"-д өгсөн ярилцлагадаа дурдаж байлаа.
"Оюу Толгой” төслийн гэрээний нөхцөлийг сайжруулахтай холбоотой УИХ-ын 92 дугаар тогтоолын дагуу Засгийн газрын ажлын хэсэг яриа хэлэлцээнд оролцож байгаа юм. Энэхүү тогтоолд:
- Хөрөнгө оруулалтын гэрээг сайжруулах
- Дубайн гэрээг сайжруулах
- "Оюу Толгой” төслөөс хүртэх Монголын талын үр өгөөжийг 53 хувиас бууруулахгүй байх
- Энэ хүрээнд Монголын 34 хувийн хувьцааг бүтээгдэхүүн хуваах нөхцөл, эсвэл АМНАТ-т оруулах хувилбарыг судлан шийдвэрлэх зэргийг тусгаж өгч байсан юм.
"Оюу Толгой” төслийн яриа хэлэлцээ Сар шинийн баярын дараа үргэлжилнэ гэж ЗГХЭГ мэдээлээд байна.
Сэтгэгдэл