Монгол Улсын баг тамирчид өнөөдөр олимпын наадмын хоёр төрөл өрсөлдөнө. Өнөөдөр өглөө Улаанбаатарын цагаар 08:00 цагт эмэгтэйчүүдийн 25 метрийн хийн гар бууны төрөлд чансаа тогтоох буудлага эхэлсэн. Энэ төрөлд Бээжингийн олимпын мөнгөн медальт, гавьяат тамирчин О.Гүндэгмаа, залуу тамирчин Ц.Анударь нар цэц мэргэнээ сорьж байна.

Мөн энэ өдөр жүдо бөхийн эрэгтэйчүүдийн -100 кг-ын жингийн барилдаан Улаанбаатарын цагаар 10:00-13:30 цагт болно. Энэ барилдаанд манай улсын тамирчин Л.Отгонбаатар хүч үзэх бөгөөд түүний эхний учраа нь Эстонийн бөх Григори Минаксин байна.

Дээрх цагт жүдо бөхийн эмэгтэйчүүдийн -78 кг-ын жингийн барилдаан болох бөгөөд манай улсаас О.Мөнхцэцэг зодоглоно. Тэрбээр эхний тойрогт Израилийн жүдоч Инбар Ланиртай учраа таарчээ.