Францын нийслэл Парис хотноо хүсэл, зорилго нийлсэн хүмүүс цуглаж, Олон улсын олимпын хороог байгуулан, орчин үеийн олимпын наадмыг сэргээн явуулах шийдвэр гаргасан түүхэн өдрөөс хойш 129 жил улиран өнгөрчээ. Хүн төрөлхтнийг спортоор дамжуулан нэгтгэж, дэлхий дахинд энх тайвныг уриалан дууддаг олимпын наадам эргэн ирсэн энэ өдрийг хүндэтгэн дурсаж, Олон улсын олимпын өдөр болгон тэмдэглэн өнгөрүүлдэг уламжлалтай.

Хүн бүрийг спортын оролцогч байхыг дэлхий дахинд уриалах нь Олимпын өдрийн гол зорилго юм. Нас, хүйс, биеийн тамирын чадвараас үл хамааран өөрийн хэмжээнд тохирсон дасгал хөдөлгөөн хийж, спортоор хичээллэх нь олимпын өдрийн утга учир билээ.