22 настай сэжигтэн эрэгтэй "Худалдааны төвийн цонхны ард гартаа цүнх бариад хөдөлгөөнгүй удаан зогсож, манекены дүрд хувирдаг байжээ. Дэлгүүрүүд хааж, аюулгүй болсны дараа тэр ажлаа эхэлдэг байсан байна” гэж Варшав хотын Средместье дүүргийн цагдаагийн газрын мэдэгдэлд өгүүлсэн байна.

Тэрбээр энэ аргаараа хэд хэдэн худалдааны төвийн өөр өөр тасгуудаас эд бараа хулгайлж байжээ.

Тухайлбал тэр нэг удаа ингэж хаалттай дэлгүүрт үлдсэнийхээ дараа ресторанд нь хооллож, бэлэн хувцасны тасагт бүх хувцсаа шинээр сольсон байна.

Бас нэг дэлгүүрийн үнэт эдлэлийн тасгийг тонож, кассын машинуудаас нь бэлэн мөнгө хулгайлж байжээ.

Гэхдээ тэр нэг удаагийн үйлдэл дээрээ азгүйдэж, хяналтын камерын бичлэгт дүрсээ үлдээснээр цагдаа нарт баригдсан юм байна.

Сэжигтнийг одоо гурван сарын хугацаагаар урьдчилан саатуулах төвд хориод байгаа бөгөөд шүүхээр гэм буруутай нь тогтоогдвол 10 хүртэл жилийн хорих ял сонсох ажээ.

Эх сурвалж: BBC