ВАШИНГТОН, 2024 оны хоёрдугаар сарын 24 /VOA/. ОХУ Украин руу халдан довтолсноос хойш хоёр жил өнгөрч байгаатай холбогдуулан хэрэгжүүлэх үйл ажиллагааны хүрээнд Оросын эсрэг шинээр хориг арга хэмжээ авч байгааг АНУ-ын Ерөнхийлөгч Жо Байден өчигдөр мэдэгдлээ. Уг хоригт 500 гаруй хувь хүн, байгууллага багтжээ.

Энэ удаагийн хориг арга хэмжээ мөн Оросын сөрөг хүчний удирдагч Алексей Навальный тус улсын хамгийн хойд хэсэгт орших шоронд нас барсантай холбоотой. Ж.Байден Навальныйгийн үхэлд ОХУ-ын Ерөнхийлөгч Владимир Путинийг буруутгасан юм. Тэрбээр мэдэгдэлдээ, А.Навальныйг “авлигын эсрэг зоригтой тэмцэгч”, “Путинийг эсэргүүцэгчдийн мохошгүй удирдагч” гэж нэрлэсэн байна. 

"Эдгээр хориг арга хэмжээ нь Навальныйг шоронд хорьсон хүмүүс, түүнчлэн санхүүгийн салбар, батлан хамгаалах салбар, ханган нийлүүлэлтийн сүлжээ болон хориг арга хэмжээнээс зайлсхийхэд тусалж буй хувь хүмүүсийг чиглэнэ" гэж АНУ-ын Ерөнхийлөгчийн мэдэгдэлд дурдсан байна. 

Бусад оронтой хамтран хэрэгжүүлж буй хориг арга хэмжээ нь Оросын цэрэг-аж үйлдвэрийн цогцолбор болон Орост хэрэгцээтэй бараа бүтээгдэхүүнээ авах боломжийг бий болгож байгаа гуравдагч орнуудын компаниудын эсрэг чиглэнэ гэж Сангийн дэд сайд Уолли Адейемо Ройтерс агентлагт өгсөн ярилцлагадаа мэдэгдэв.

Энэ багц хориг арга хэмжээ нь 2022 онд Орос Украин руу халдан довтолсны дараа АНУ болон холбоотнууд Москвад тавьсан олон мянган хоригийн сүүлчийнх нь юм.

Конгресс Киевт цэргийн нэмэлт тусламж үзүүлэх төслийг батлах эсэх нь эргэлзээтэй байгаа хэдий ч АНУ болон түүний холбоотнууд Орост шахалт үзүүлсээр байгаа үед шинэ хориг арга хэмжээ авч байна.

Д.Жаргал

Эх сурвалж: "Монцамэ" агентлаг