Говь-Алтай аймгийн Цагдаагийн газарт болон … сумдын хэсгийн төлөөлөгч нарын цагдаа нар бүлэглэн насанд хүрээгүй охиныг удаа дараа хүчиндсэн гэх хэрэг гарчээ.

Охин 15 настай, аймгийн төвд амьдардаг бөгөөд түүнийг хүчиндсэн цагдаагийн алба хаагч эхний удаад ганцаараа, дараагийн удаад найз нөхөд цагдаа нарынхаа хамтаар охиныг хүчиндсэн гэх мэдээлэл цахиур.мн сайтад нийтлэгдсэн билээ. 

Тэгвэл уг асуудлын талаар ЦЕГ-н ХМОНХХ-ийн чиглэлийн ахлах мэргэжилтэн, цагдаагийн хошууч С.Баярбилэг "Дээрх асуудалтай холбоотой мэдээллийг цагдаагийн байгууллага мэдсэн. Холбогдох шалгалтын ажиллагаа үргэлжлээд хийгдэж байна. 2024 оны гуравдугаар сарын 07-ны өдөр Говь-Алтай аймгийн Есөнбулаг сумын иргэн Д-ээс төрсөн охиныг маань хамаатны ах нь хүчиндсэн байна гэх мэдээллийг цагдаагийн байгууллагад ирүүлсэн. Мөрдөн шалгах ажиллагаа хойшлуулшгүй ажиллагааны хүрээнд явагдаж байна. Энэ асуудалд холбогдоод байгаа иргэн Т гэгч нь өмнө нь цагдаагийн байгууллагад ажиллаж байгаад гарсан хүн байна. Одоогоор бол цагдаагийн байгууллагад ажилладаггүй. Алба хаагч нар энэ хэрэгт холбогдсон гэдэг асуудал байхгүй ээ, илт худлаа ташаа мэдээлэл байна. Хохирогчийн хамаатны ах нь хүчиндсэн. 

Цагдаагийн байгууллагаас мөрдөн шалгах ажиллагааны хүрээнд авагдсан мэдээллийг л иргэд олон нийтэд үнэн бодит мэдээллийг хүргэдэг. Өмнө нь ажиллаж байсан боловч одоо ажиллаагүй байна, энэ хүрээнд л мөрдөн шалгах ажиллагааг явуулна. 

Хууль бус үйлдэлтэй бид эвлэрэхгүй. Нуун дарагдуулж далдлаад байх шаардлагагүй. Холбогдох хууль тогтоомжийн хүрээнд шуурхай шалгаж ажиллана" гэх хариултыг өглөө.

Тэгвэл цахиур.мн сайтын эх сурвалжийн хэлснээр, хэрэгт холбогдоод буй этгээд нь цагдаагийн байгууллагад ажиллаж байхдаа охиныг хүчиндсэн бөгөөд хэрэг болсны дараа иргэн Т өргөдлөө өгч ажлаасаа гарсан гэлээ.Мөн хохирогч гурвуулаа хүчиндсэн гэх гомдлыг өгсөн аж.

 Одоогийн байдлаар эл хэргийг шалгаж дуусаагүй байгаа юм байна. Харин ЦЕГ-аас хэргийг шалгаж дуусаагүй байж гурван цагдаа хэрэгт холбогдоогүй гэх мэдээллийг өгөв.