Нийслэл хотод үерийн далангийн бүсэд амьдарч буй 1000 гаруй айл өөрсдийгөө эрсдэлд оруулахаас гадна далан шуудууг бохирдуулж хогийн цэг болгож байна. Иймээс Геодези, усны барилга байгууламжийн газар энэ сард "Үерийн далан эзэнтэй” аян эхлүүлжээ. Аяны хүрээнд далан шуудууг цэвэрлэж, хориглосон бүсэд зөвшөөрөлгүй буусан газруудыг нүүлгэх юм.

Сүхбаатар дүүргийн есдүгээр хорооны нутагт байрлах хоёр контейнерийн эзэд үерийн далан дээр суурьшиж дахивар бүтээгдэхүүн авах үйлчилгээ үзүүлээд 10 гаруй жил болжээ. Үерийн далан сувгийн ойролцоо 10 метрт айл, болон ямар нэг үйлчилгээ объект барих хориотой.

Хуулийн дагуу тэдэнд шаардлага тавихад далан сувгийг цэвэрлэж, манадаг гэсэн тайлбар хэлсээр өдий хүрсэн байна. Энэ нь хоёр контейнерийн асуудал биш. Үерийн далан дээр буусан 1000 гаруй айл эрсдэлтэй нөхцөлд амьдарч байгаагийн жишээ юм. Тэдэнд шаардлага өгсөн ч хүлээж авдаггүйн дээр зөвшөөрөлгүй хашаагаа тэлж, үерийн далантай тулгадаг байна. Тиймээс албаныхан тэднийг албадан нүүлгэлээ.

Улаанбаатар хотод 51 байршилд нийтдээ 140 километр урт үерийн далан суваг бий. Ихэнх нь 1980-1990 оны хооронд баригдсан. Тэдгээрийн 70 орчим хувь нь эвдэрч шаардлага хангахгүй болжээ. Нийслэлийн төсөвт жил бүр далан цэвэрлэх хөрөнгө төсөвлөдөг ч шинээр барих, шинэчлэн засварлах ажилд хөрөнгө мөнгө төсөвлөдөггүй.

Шар ус, хур борооны үерээс илүү 99 хувийн тунадас буулгадаг аж. 100 жилийн давтамжтай тохиодог нэг хувийн ханамжтай үер болоход эрсдэлийн үед бэлэн байх шаардлагатайг мэргэжилтнүүд санууллаа. Хэрэв ийм үер болбол бүх үерийн далан шуудуу дүүрч, хот бүхэлдээ усанд автахаар нөхцөл байдалтай байгаа аж.