Монголд жинхнээсээ эрдэнэсийн сангийн эзэн байдаг юм байна. Арабын шейхүүд, гүнж нартай харьцуулахгүй эгэл монголчуудын дэргэд ёстой л үлгэрийн мэт амьдардаг хүмүүс байх юм аа. Мэдээж хүн мөнгөтэй байж болно. Баян байж болно. Гэхдээ үүнд хүрсэн замналаар нь баян байхад асуудалгүй, асуудалтай гэж хоёр хувааж болох биз ээ.

Тэгвэл Монголбанкны Эрдэнэсийн сангийн захирал П.Эрдэнэтуяа аль хэсэгт нь орох бол. Тэрбээр 2016 онд Монголбанкны Захиргаа, хүний нөөцийн хэлтсийн захирлаар ажиллаж байсан бол одоо Эрдэнэсийн сангийн "эзэн” болжээ.

Түүний хувьд экс Ерөнхийлөгч Ц.Элбэгдоржийн халаасны хүн гэх шүүмжлэлд өртөж байсан. Энэ нь ч оргүй цуурхал биш. П.Эрдэнэтуяа нь Ц.Элбэгдоржийн эхнэр Х.Болормаагийн төрсөн дүүгийн гэргий юм билээ. Гэхдээ түүнийг хууль ёсоор уг албан тушаалд очсон гэдгийг бид үгүйсгэж чадахгүй. Тэрбээр Монголын мянга мянган шилдэг залуусын нэг байж мэднэ.

Гэвч эдгээр шилдэг залуу бүр 12 орон сууц, үйлдвэрлэл үйлчилгээний дөрвөн барилгатай байж чадах болов уу. Нийт үл хөдлөх хөрөнгө нь 2.5 тэрбум төгрөгийн үнэлгээтэй. Мөн 119 сая төгрөгийн үнэ бүхий долоон ч газрыг эзэмшдэг гэнэ. Түүнчлэн 235 сая төгрөгийн үнэт эдлэлтэй, хадгаламжиндаа 2.1 тэрбум төгрөгтэй, бас 12 компаниас 300 мянга гаруй хувьцаа эзэмшиж байгаагийн дүрмийн сангийн хэмжээ нь 1.3 тэрбум төгрөг гэжээ.

Дотор бялуурам тоо байгаа биз. Жилийн орлого нь 64 сая төгрөг, сүүлийн 10 жил төрийн албанд ажиллаж байгаа хүн гэхэд бас л бийлэгжүү нэгэн гэдэг нь илэрхий.

За бодоод үзье. Нэг танил маань бас ч үгүй томоохон яаманд мэргэжилтнээр ажилладаг. Сарын цалин нь 650 мянган төгрөг. Сүүлийн долоон жил ажиллаж байгаа. Тэгэхээр ямар нэгэн татвар, шимтгэл төлөхгүй гэвэл өнгөрсөн долоон жилийн хугацаанд 57 сая орчим төгрөгний орлоготой ажиллажээ. Хүн харахад нэг л сайхан төрийн албан хаагч. Гэвч мань эрийн гэрт шинэ тавилга байхгүй. Лизингийн нэг өрөө байртай. Эхнэр нь хувийн компанид ажиллаж байгаа тулдаа гал алдчихгүй амьдарч байгаа нэгэн.

Гэтэл үүний хажууд хатагтай П.Эрдэнэтуяагийн амьдрал хэр ахицтай байгааг хэн хүнгүй шууд хараад л мэдэхээр ажээ. Мэргэжилтний долоон жилийн орлого 57 сая, П.Эрдэнэтуяа захирлын нэг жилийн орлого 64 сая. Гуравхан жилийн туршлагын ялгаатай ч мэргэжилтэн нь 34 м2 байрыг 15 жилйин зээлээр авсан бол П.Эрдэнэтуяа захирал 12 орон сууцтай. Нэг зүйл дээр бол мөрийцсөн ч алдахгүй байх. Мэргэжилтэнд сохор зоосны хадгаламж байхгүй. Цалингаа банкны дансаар авдаг ч зээлэнд суутгагдаад хувхай хоосон л үлдэнэ.

Тэгэхээр энд асуудал байхгүй гэж хэн ч хэлэхгүй байх. Тэгвэл АТГ ийм ХОМ авчихаад тэр бүгдийгээ хянаж шалгадаг гэж найдъя. Нэгэн цагт Монголбанкны Ерөнхийлөгч асан П.Золжаргал улсыг хэдэн тэрбумаар ч билээ хохироосон. Дараахан нь мань эрийн тушаалаар Монголбанкны захирлуудад зуу зуун сая төгрөгийн "тэтгэмж”, "буцалтгүй тусламж” олгосон байсан. Энэ нь ч илэрсэн. Гэтэл 2016 оны гуравдугаар сард одоогийн Эрдэнэсийн сангийн "эзэн”, тэр үеийн Тамгын газрын Захиргаа, хүний нөөцийн хэлстийн захирал П.Эрдэнэтуяа "Шилэн дансны тухай хуулийн зорилтыг улс, орон нутгийн төсөв хөрөнгийг үр ашигтай захиран зарцуулах зорилгоор төслийн удирдлагыг хэрэгжүүлэх шийдвэр, үйл ажиллагаа ил тод, нээлттэй байх, түүнд олон нийт хяналт тавих мэдээллийн тогтолцоог бүрдүүлнэ хэмээн тодорхойлсон болно. Түүнчлэн Шилэн дансны тухай хуулийн үйлчлэлд төрийн болон орон нутгийн өмчит байгууллага түүний эд хөрөнгө захиран зарцуулах эрх бүхий албан тушаалтан хамаарахаар заажээ. Монголбанкийг "Төрийн өмчит хуулийн этгээд" гэж үзэх нь төрийн болон орон нутгийн өмчийн тухай хуулийн зохицуулалтыг зөрчихөд хүргэнэ.  Иймд дээр дурдсан Шилэн дансны тухай хуулийн зорилт, үйлчлэх хүрээний дагуу Сангийн яамнаас эрхлэн хөтөлж буй нэгдсэн цахим хуудсанд Монголбанк мэдээлэл тавих үндэслэлгүй гэж үзэж байна” гэсэн албан бичгийг Сангийн яам руу хүргүүлж, улмаар Монголбанкны санхүүгийн байдал шилэн бус, хөшигний цаана үлдсэн юм.

Монголбанкны Ерөнхийлөгч Н.Золжаргал гээч эрхэм Монгол улсад 1 ам доллар 1340 төгрөгийн ханштай, 4 тэрбум ам долларын валютын нөөцтэй байхад Монголбанкийг хүлээж авсан билээ. Тэгвэл мань эрийг ажлаа өгөх үед 2200 төгрөгийг даваад талийчихсан байсан.

Гэхдээ одоо тэрбээр эгзэгтэй нөхцөл байдалд байгаа ч цагтаа хангалттай тансаглаж амжсан. Ганц жишээ нь Н.Золжаргал Токио хот руу нисэхдээ зөвхөн тийзний урьдчилгаанд 5 сая төгрөг зарцуулсан гэнэ. Монголбанкны Шилэн дансны мэдээлэлд байгаа гүйлгээнээс харахад эрхэм Ерөнхийлөгч 2015 онд Арабын нэгдсэн Эмират улс, Хонконг, Индонезид очихдоо дээд зэрэглэлийн тансаг зочид буудлуудаар үйлчлүүлж үүнд нь татвар төлөгчдийн халааснаас 12.3 сая төгрөг гарсан аж. Энэ тоо баримтыг цааш нь үргэлжлүүлж болно.

Өнөөдөр манай улсын эдийн засаг ямар байгааг хэн хүнгүй л мэднэ. Гэтэл төрийн төвбанк нэг иймэрхүү ажиллаж, дотор нь байгсад зоолж гүйцлээ.

Erennews.mn