Scandal.mn

Ерөнхийлөгч Х.Баттулга улстөрчдийг 49 ХОНОГИЙН ДОТОР офшор дансан дахь хөрөнгөө Монголд оруулж ирэхийг уриаллаа

2017/07/24

Ерөнхийлөгч Х.Баттулга улстөрчдийг 49 ХОНОГИЙН ДОТОР офшор дансан дахь хөрөнгөө Монголд оруулж ирэхийг уриаллаа

Author: saikhnaa on 24-07-2017, 17:53

Монгол Улсын Ерөнхийлөгч Х.Баттулга улстөрчид, төрийн албан хаагчид, тэдний хамаарал бүхий этгээдүүдэд хандан офшор данстай холбоотой асуудлаар өнөөдөр уриалга гаргалаа.

Уриалгыг бүрэн эхээр нь хүргэж байна.

Монголын нийгэмд хурцаар шүүмжлэгдэн хэлэлцэгдэж байгаа олон асуудлын нэг нь улстөрчид, төрийн албан хаагчид, тэдний хамаарал бүхий этгээдүүд офшор бүсэд данстай байх, авлига, хууль бусаар олсон мөнгө хөрөнгөө татвараас болон хууль хяналтаас нууж байршуулж байгаа явдал билээ. Уг мөнгө нь хэлбэрээ өөрчилж АНУ, ИБУИНВУ зэрэг гадаад улсад үл хөдлөх хөрөнгө болж хувирсан тохиолдлууд олон нийтийн мэдээллийн хэрэгслүүдээр мэдээлэгдсэн.

ОУВС, Олон улсын эдийн засгийн хамтын ажиллагааны байгууллагаас нийт 42 улсыг "офшор бүс” хэмээн тооцож нэрлэсэн байна. Эдгээр офшор бүс дэх банкуудад Монгол Улсын 49 иргэн данстай байгаа талаар Олон Улсын Эрэн Сурвалжлах Сэтгүүлчдийн Консорциум мэдээлээд байгаа юм.

Төрийн өндөр албан тушаал хашиж байгаа хүмүүс, улстөрч, төрийн албан хаагчид, тэдний хамаарал бүхий этгээдүүд офшор дансанд мөнгөн хөрөнгөө байршуулах нь тухайн хөрөнгийн гарал үүсэл хууль ёсны эсэх, татвараа шударгаар төлсөн эсэх, хөрөнгө орлогын мэдүүлгээ үнэн зөв мэдүүлсэн эсэх зэрэг олон эргэлзээг бий болгож, шударга ёсонд итгэх олон нийтийн итгэлийг бууруулж байна.

Монгол Улс 2017 оныг хүртэл офшор бүсэд данс эзэмших асуудлаар хууль, эрх зүйн ямар нэгэн зохицуулалтгүй явж ирснээс улбаалан улстөрчид, төрийн албан хаагчид, тэдний хамаарал бүхий этгээдүүд офшорт данс эзэмшсэн тохиолдлууд байгаа тул олон улсад мөрддөг жишгээр эхний удаад тэдэнд ууч сэтгэлээр хандаж, офшор данснаас нэн даруй мөнгөө татаж, Монгол Улсдаа оруулж ирэхийг уриалах нь зүйтэй хэмээн үзэж байна.

Монгол Улсын Ерөнхийлөгч Х.Баттулга миний бие офшор бүсэд данстай улстөрчид, төрийн албан хаагчид, тэдний хамаарал бүхий этгээдүүдэд хандан 2017 оны долдугаар сарын 24-ний өдрөөс хойш 49 хоногийн дотор офшор дансаа хааж, тэнд байршуулсан мөнгөн хөрөнгөө Монголын банкинд оруулж ирэхийг уриалж байна.

Дурдсан хугацаанд Монголын банкууд руу татагдаагүй мөнгөн хөрөнгө, түүнийг эзэмшигчдийн асуудлыг холбогдох хуулийн дагуу илрүүлэн илчилж, зохих хариуцлага хүлээлгэх нь шударга ёсонд нийцнэ хэмээн үзэж байна.

More 249 0

Category: Гол мэдээ / Улс төр

Та хүүхдээ хэн болгохыг хүсч байна вэ

2017/07/24

Та хүүхдээ хэн болгохыг хүсч байна вэ

Author: zulaa on 24-07-2017, 17:25

Америкийн энгийн нэгэн архичин, гудамжны тэнэмэл Макс Жекийн үр ач нар болох 840-н хүнийг судалжээ. 100 жилийн дотор дээрэмчин 63, биеэ үнэлэгч 50, алуурчин 7, гуйлгачин 300, зуурдаар нас барсан 200, тэнэг 200, жирийн иргэн 20 хүн байсан байна.

More 252 0

Category: Эдийн засаг

Долоодугаар сарын 31-нээс улсын хэмжээнд Үндсэн хуульд өөрчлөлт оруулах төслийг хэлэлцэнэ

2017/07/24

Долоодугаар сарын 31-нээс улсын хэмжээнд Үндсэн хуульд өөрчлөлт оруулах төслийг хэлэлцэнэ

Author: saikhnaa on 24-07-2017, 16:26

Монгол Улсын Үндсэн хуульд нэмэлт өөрчлөлт оруулах асуудлаар Анхдугаар зөвлөлдөх санал асуулгын тайланг үндэслэн Зөвлөлдөх зөвлөлөөс УИХ-д гаргасан зөвлөмжийн дагуу Ажлын хэсгээс боловсруулсан төслийг бүх нийтээр хэлэлцүүлэхээр болсон билээ. Энэ хүрээнд өнөөдөр Үндсэн хуульд оруулах нэмэлт, өөрчлөлтийн төслийг олон нийтээр хэлэлцүүлэх Ажлын хэсэг хуралдлаа.

Ажлын хэсгийн хуралд УИХ-ын гишүүн, Монгол Улсын Үндсэн хуульд оруулах нэмэлт өөрчлөлтийн төслийг хэлэлцүүлэх ажлыг улс, орон нутгийн хэмжээнд зохион байгуулах Ажлын хэсгийн ахлагч Д.Лүндээжанцан, УИХ-ын гишүүн, Төрийн байгуулалтын байнгын хорооны дарга, Зохион байгуулалтын Ажлын хэсгийн ахлагч Н.Энхболд, УИХ-ын Тамгын газрын Ерөнхий нарийн бичгийн дарга Ц.Цолмон болон УИХ-ын Тамгын газар, Засгийн газрын ХЭГ-ын удирдлагууд, УИХ-ын байнгын хороодын ахлах зөвлөхүүд зэрэг албаны төлөөлөл оролцсон юм.

УИХ-ын гишүүн, Ажлын хэсгийн ахлагч Д.Лүндээжанцан хурлын эхэнд хийсэн мэдээлэлдээ:

"УИХ-аас "Монгол Улсын Үндсэн хуульд нэмэлт өөрчлөлт оруулах асуудлаар ард түмний бүрэн эрхт байдал, оролцоог хангах тухай” тогтоолыг баталсан.

Энэ тогтоолд 06 дугаар сарын 05-наас 09 дүгээр сарын 10-ныг дуустал олон нийтийн дунд хэлэлцүүлэг явуулахаар заасан.

Тогтоолын төсөл ёсчлогдож, Ерөнхийлөгчийн хоригийн хугацаа дууссан мөчид буюу 2017 оны 06 дугаар сарын 16-ны өдөр "Төрийн мэдээлэл” болон бусад сонин, сайтуудад Монгол Улсын Үндсэн хуульд оруулах нэмэлт өөрчлөлтийн төсөл нийтлэгдсэн.

Үүнээс хойш иргэд саналаа ирүүлж, хэвлэл мэдээллийн хэрэгслээр байр сууриа илэрхийлсээр байна.

Иргэдийн саналыг урсгалаар нь авахаас гадна улс, орон нутгийн хэмжээнд нэгдмэл зохион байгуулалттайгаар хэлэлцүүлэх ажлыг зохион байгуулах шаардлагатай гэж Ажлын хэсэг үзсэн.

Ийм учраас 06 дугаар сарын эхээр Үндсэн хуульд оруулах нэмэлт өөрчлөлтийн төслийг хэлэлцэж, саналаа ирүүлэх албан тоотыг бүх төрийн байгууллага, улс төрийн намууд, хууль зүйн сургуулиуд, аймаг, нийслэлийн ИТХ, Засаг дарга, иргэний нийгмийн байгууллагуудад хүргүүлсэн.

Мөн энэ сарын 18-ны өдөр 21 аймаг, нийслэлийн 9 дүүргийн төлөөллийг оролцуулсан цахим хурлыг зохион байгууллаа.

Энэ үеэр аймаг, нийслэлийн дүүргүүдэд хийгдэж буй ажлын явцын талаарх мэдээллийг сонссон.

Түүнчлэн өнгөрсөн долоо хоногт 21 аймгийн засаг захиргааны байгууллагуудын төлөөллийг хамруулж, сургагч багш бэлтгэх сургалтыг зохион байгуулсан юм.

УИХ-ын Тамгын газраас 8 баг гаргаж, 07 дугаар сарын 31-нээс эхлэн 21 аймаг, нийслэлийн 9 дүүрэгт Үндсэн хуульд оруулах нэмэлт өөрчлөлтийн төслийг хэлэлцүүлнэ.

Хэлэлцүүлэг хийснээр энэ ажил хязгаарлагдахгүй. Үндсэн хуульд оруулах нэмэлт өөрчлөлтийн төслийг Байнгын хороодоор хэлэлцэх, өргөн мэдүүлэх, чуулганаар хэлэлцэх, Ард нийтийн санал асуулга явуулах зэрэг ажил тасралтгүй үргэлжилнэ.

Цахимаар иргэдийн саналыг авч байгаа. Та энэхүү сайтаар орж саналаа өгөх боломжтой" гэв.

Тэрбээр дараа нь Үндсэн хуульд оруулах нэмэлт өөрчлөлтийн төслийн талаар иргэдийн саналыг авах, хэлэлцүүлэг зохион байгуулах журмын талаар танилцууллаа.

Журамд хэлэлцүүлэгт оролцогсдод урьдчилсан болзол тавихгүй байх, хэлэлцүүлэг олон нийтэд нээлттэй байх, аймаг, нийслэл, сум, дүүрэг, баг, хорооны төлөөллийг бүрэн хамруулсан байх, оролцогчдын үндэс угсаа, хэл, нас, хүйс, нийгмийн байдал, ажил, албан тушаал, боловсролын тэнцвэртэй харьцааг хангасан байх, хэлэлцүүлгийн үр дүнг үндэслэн Үндсэн хуульд оруулах нэмэлт өөрчлөлтийн төсөлд саналуудыг тусгах, эсэхийг төслийг боловсруулах Ажлын хэсэг шийдвэрлэх зэрэг зарчмууд багтжээ.

Ажлын хэсгийн хурлын үеэр УИХ-ын гишүүн, Төрийн байгуулалтын байнгын хорооны дарга Н.Энхболд, УИХ-ын Тамгын газрын Ерөнхий нарийн бичгийн дарга Ц.Цолмон нар зохион байгуулалтын асуудлаар мэдээлэл хийж, үүрэг даалгавар өгөв хэмээн УИХ-ын Хэвлэл мэдээлэл, олон нийттэй харилцах хэлтэс мэдээллээ.

More 233 0

Category: Мэдээ мэдээлэл

Өнөөдрийн байдлаар таван түймрийг бүрэн унтрааж, дөврийг цурманд оруулаад байна

2017/07/24

Өнөөдрийн байдлаар таван түймрийг бүрэн унтрааж, дөврийг цурманд оруулаад байна

Author: saikhnaa on 24-07-2017, 15:14

Онцгой Байдлын Ерөнхий Газраас Ой хээрийн түймрийн өнөөдрийн нөхцөл байдлын талаар мэдээлэл ирүүллээ.

Долоодугаар сарын 17-ноос хойш нийт гарсан 21 түймрээс 16 түймрийг бүрэн унтраагаад байна.

2017 оны долоодугаар сарын 24-ний өдрийн 09:00 цагийн байдлаар Сэлэнгэ аймгийн Мандал суманд 3 түймэр асаж, Сэлэнгэ аймгийн Ерөө суманд 1, Мандал сумын 2, Эрдэнэ сумын 1 нийт 4 түймрийг цурманд оруулж бүрэн унтраахаар ажиллаж байна.

Өнөөдрийн байдлаар асаж байгаа болон цурманд оруулсан түймрүүдийг бүрэн хяналтанд авсан боловч цаг агаарын хэт халалт, салхины эрч эрс нэмэгдэх зэргээс шалтгаалан түймрийн голомт хүндэрч болзошгүй эрсдлээс урьдчилан сэргийлэх зорилгоор бие бүрэлдэхүүнийг сэлгэн байршуулан ажиллуулж байна.

Долоодугаар сарын 24-ны нөхцөл байдлын мэдээлэл...

ДӨРВӨН ТҮЙМРИЙГ ЦУРМАНД ОРУУЛЛАА

Сэлэнгэ аймгийн Ерөө сум, Бугант багийн "Майнт өндөр-Уул” гэдэг газар /сумын төвөөс зүүн урд зүгт 150 км-т/ ойн түймэр гарсан тухай дуудлагыг 07.09-ний өдрийн 19:40 цагт хүлээн авч тус аймгийн Онцгой байдлын газрын 40 алба хаагч, Өмнөговь аймгийн Онцгой байдлын газрын 12 алба хаагч, нийт 52 хүн, 3 техник хэрэгсэлтэйгээр ажиллаж 07.19-ний өдрийн 17:52 цагт цурманд оруулж бүрэн унтраахаар ажиллаж байна.

Сэлэнгэ аймгийн Мандал сум, Түнхэл багийн "Хуст” гэдэг газар /Түнхэл тосгоноос зүүн урд зүгт 15 км-т/ ойн түймэр гарсан тухай дуудлагыг 07.11-ний 22:00 цагт хүлээн авч тус аймгийн Онцгой байдлын газрын 19 алба хаагч, Зэвсэгт хүчний 330 дугаар ангийн 40 алба хаагч, орон нутгийн 55 иргэн, нийт 114 хүн, 3 техник хэрэгсэлтэйгээр ажиллаж 07.18-ны өдрийн 15:20 цагт цурманд оруулж бүрэн унтраахаар ажиллаж байна.

Сэлэнгэ аймгийн Хүдэр сум, Баянцагаан багийн "Харанхуйн-Ам” гэдэг газар /сумын төвөөс зүүн зүгт 20 км-т/ 07.09-ний өдөр ойн түймэр гарсан тухай дуудлагыг 07.11-ний өдрийн 11:00 цагт хүлээн авч тус аймгийн Онцгой байдлын газрын 2 алба хаагч, Аврах тусгай ангийн 19 алба хаагч, Дархан-Уул аймгийн Онцгой байдлын газрын 20 алба хаагч, ЗХ-ний 186 дугаар ангийн 20 алба хаагч, орон нутгийн 54 иргэн, нийт 115 хүн, 6 техник хэрэгсэлтэйгээр ажиллаж 07.19-ний өдрийн 12:00 цагт цурманд оруулан бүрэн унтраахаар ажиллаж байна.

Төв аймгийн Эрдэнэ сум, Баянтуул багийн Естийн рашааны "Орз-Уул” гэдэг газар /сумын төвөөс зүүн хойш 300 км-т/ ой, хээрийн түймэр гарсан тухай дуудлагыг 07.15-ны өдрийн 13:35 цагт хүлээн авч Хан Хэнтийн тусгай хамгаалалттай газрын 9 ажилтан, 3 техник хэрэгсэлтэйгээр ажиллаж 07.21-ний өдрийн 13:45 цурманд оруулж бүрэн унтраахаар ажиллаж байна.

ТАВАН ТҮЙМРИЙГ БҮРЭН УНТРААГААД БАЙНА

Сэлэнгэ аймгийн Ерөө сум, Бугант багийн "Байшинт” гэдэг газар /сумын төвөөс зүүн урд зүгт 108 км-т/ ойн түймэр гарсан тухай дуудлагыг 07.15-ны өдрийн 12:00 цагт хүлээн авч тус аймгийн Онцгой байдлын газрын 1 алба хаагч, Зэвсэгт хүчний 186 дугаар ангийн 40 алба хаагч, нийт 41 хүн, 1 техник хэрэгсэлтэйгээр ажиллаж 07.23-ны өдрийн 09:03 цагт бүрэн унтраан, Хан хэнтийн тусгай хамгаалалттай газрын байгаль хамгаалагчид хүлээлгэн өгсөн.

Сэлэнгэ аймгийн Ерөө сум, Буурагчин багийн "Марзын-Ам” гэдэг газар /сумын төвөөс хойд зүгт 90 км-т/ 07.01-ний өдөр ойн түймэр гарч тус аймгийн Онцгой байдлын газрын 5 алба хаагч, Зэвсэгт хүчний 186 дугаар ангийн 40 алба хаагч, нийт 45 хүн, 2 техник хэрэгсэлтэйгээр ажиллаж 07.23-ны өдрийн 09:30 цагт бүрэн унтраан, тус сумын Байгаль орчны байцаагчид хүлээлгэн өгсөн.

Сэлэнгэ аймгийн Мандал сум, Түнхэл багийн "Хүдэр-Овоо” гэдэг газар /Түнхэл тосгоноос зүүн зүгт 36 км-т/ ойн түймэр гарсан тухай дуудлагыг 07.15-ны өдрийн 11:08 цагт хүлээн авч тус аймгийн Онцгой байдлын газрын 1 алба хаагч, НОБГ-ын 12 алба хаагч, Булган аймгийн Онцгой байдлын газрын 12 алба хаагч, "Улаанбаатар төмөр зам” хувь нийлүүлсэн нийгэмлэгийн төмөр замын цэрэгжүүлсэн хамгаалалт, онцгой байдлын ангийн Мандал сум дахь салбарын 10 алба хаагч, мөн Салхит салбарын 10 алба хаагч, нийт 45 хүн, 3 техник хэрэгсэлтэйгээр ажиллаж 07.23-ны өдрийн 11:30 цагт бүрэн унтраан, "Хангайн бүргэд” ХХК-ийн захиралд хүлээлгэн өгсөн.

Төв аймгийн Батсүмбэр сум, Цогт-Өндөр багийн "Хөх чулуут” гэдэг газар /сумын төвөөс хойд зүгт 45 км-т/ ойн түймэр гарсан тухай дуудлагыг 07.09-ний өдрийн 14:40 цагт хүлээн авч тус аймгийн Онцгой байдлын газрын 50 алба хаагч, НОБГ-ын 13 алба хаагч, Дорноговь аймгийн Онцгой байдлын газрын 34 алба хаагч, Өвөрхангай аймгийн Онцгой байдлын газрын 13 алба хаагч, Архангай аймгийн Онцгой байдлын газрын 12 алба хаагч, Говьсүмбэр аймгийн Онцгой байдлын газрын 10 алба хаагч, ЗХ-ний 120 дугаар ангийн 62 алба хаагч, орон нутгийн 18 иргэн, нийт 212 хүн, 20 техник хэрэгсэлтэйгээр ажиллаж 07.23-ны өдрийн 19:00 цагт бүрэн унтраан тус сумын Байгаль орчны улсын байцаагчдад хүлээлгэн өгсөн.

Төв аймгийн Батсүмбэр сум, Үдлэг багийн "Харуул толгой” гэдэг газар /сумын төвөөс баруун урд зүгт 25 км-т/ ойн түймэр гарсан тухай дуудлагыг 07.11-ний өдрийн 19:10 цагт хүлээн авч орон нутгийн 4 иргэн ажиллаж 07.23-ны өдрийн 19:19 цагт бүрэн унтраан тус сумын Байгаль хамгаалагчид хүлээлгэн өгсөн.

ГУРВАН ТҮЙМРИЙГ УНТРААХААР АЖИЛЛАЖ БАЙНА

Сэлэнгэ аймгийн Мандал сум, Түнхэл багийн "Эрээн дэв” гэдэг газар /сумын төвөөс зүүн урд зүгт 51 км-т/ аянга буусны улмаас ойн түймэр гарсан тухай дуудлагыг 07.08-ны өдрийн 13:45 цагт хүлээн авч тус аймгийн Онцгой байдлын газрын 21 алба хаагч, Аврах тусгай ангийн 12 алба хаагч, НОБГ-ын 12 алба хаагч, Дархан-Уул аймгийн Онцгой байдлын газрын 10 алба хаагч, Өмнөговь аймгийн Онцгой байдлын газрын 12 алба хаагч, Дундговь аймгийн Онцгой байдлын газрын 12 алба хаагч, орон нутгийн 28 иргэн, нийт 107 хүн, 6 техник хэрэгсэлтэйгээр унтраахаар ажиллаж байна.

Сэлэнгэ аймгийн Мандал сум, Түнхэл тосгоны "Тайлч” гэдэг газар /сумын төвөөс зүүн хойд зүгт 111 км-т/ ойн түймэр гарсан дуудлагыг 07.12-ны өдрийн 13:24 цагт хүлээн авч тус аймгийн Онцгой байдлын газрын 2 алба хаагч, Зэвсэгт хүчний 330 дугаар ангийн 40 алба хаагч, нийт 42 хүн, 1 техник хэрэгсэлтэйгээр унтраахаар ажиллаж байна.

Сэлэнгэ аймгийн Мандал сум, Түнхэл тосгоны "Ар матах-Уул” гэдэг газар / сумын төвөөс зүүн зүгт 95 км-т/ ойн түймэр гарсан тухай дуудлагыг 07.20-ны өдрийн 15:00 цагт хүлээн авч ОБЕГ-ын харъяа Аврах тусгай ангийн 19 алба хаагч унтраахаар ажиллаж байна.

Эх сурвалж: Онцгой Байдлын Ерөнхий Газар

More 438 0

Category: Мэдээ мэдээлэл

Хүн ухаантай болох тусам ганцаараа байх дуртай болдог

2017/07/24

Хүн ухаантай болох тусам ганцаараа байх дуртай болдог

Author: saikhnaa on 24-07-2017, 14:17

The British Journal of Psychology сэтгүүлээс явуулсан нэгэн сонирхолтой судалгааны дүнг та бүхэнд танилцуулж байна. Тус судалгааны зорилго нь хүний оюун ухааны чадвар нь хүмүүстэй харилцах, харилцаанд хэрхэн нөлөөлдөг тухай судлах байсан юм. Нэг ёсондоо хүний найз нөхөд, гэр бүлийнхэн нь хүмүүст хэрхэн нөлөөлдөг тухай судалжээ.

Судалгааны өмнө хотод амьдардаг иргэд хөдөө, орон нутагт амьдардаг иргэдээс илүү аз жаргалтай байдаг хэмээн үзэж байжээ. Учир нь хотод хүмүүс хоорондоо илүү их харилцана. Тэд гэр бүл, найз нөхөдтэйгээ уулзахын тулд их зам явах шаардлагагүй. Ойр дотнын хүмүүстэйгээ их цаг зарцуулах учир илүү аз жаргалтай байна гэж тооцжээ.

Судалгаанд 18-28 насны нийт 15 мянган хүн хамрагдсан байна. Судалгааны дүнд эрдэмтдийн таамаглал нотлогдож, хүн хэдий чинээ бусадтай харилцана, төдий чинээ аз жаргалтай байдаг нь тодорхой болсон байна. Гэтэл судалгааны явцад бас нэгэн сонирхолтой дүн гарчээ. Өндөр оюун ухааны чадвартай буюу ухаантай хүмүүс ганцаараа байхдаа илүү аз жаргалтай байдаг гэсэн дүн гарчээ. Ийм хүмүүс найз нөхөд болон ойр дотнынхонтойгоо уулзаж байхдаа уйдаж, сэтгэл нь шаналж эхэлдэг байна.

Кэрол Грэм хэмээх өөр нэгэн судлаач үүнийг дараах байдлаар тайлбарлалаа:

Өндөр оюун ухааны чадвартай хүмүүс өөрийн цагаа илүү үр дүнтэй зарцуулахыг хүсдэг. Тэд урт хугацаанд ашиг авчрах том хэмжээний асуудал, бэрхшээлийг шийдэх үедээ л аз жаргалыг мэдэрдэг байна. Тийм учраас өдөр тутмын энгийн харилцаанаас илүү тулгамдаж буй асуудлыг шийдэхийг хүсдэг болох нь тогтоогджээ. Ийм хүмүүсийн хувьд найз нөхөдтэйгээ уулзах нь уйтгартай санагддаг байна. Тэд бол хэцүү даалгавар гүйцэтгэх дуртай, үүнийгээ сайн гүйцэтгэж чаддаг ч, хүмүүстэй харилцахдаа маруухан хүмүүс юм. Тэд бусдад өөрийгөө ойлгуулж чаддаггүй учир, танилын хүрээгээ тэлэхийг хүсдэггүй байна.

More 278 0

Category: Мэдээ мэдээлэл

Хакухо М.Даваажаргалын 17 намар буюу 1050 дахь даваа

2017/07/24

Хакухо М.Даваажаргалын 17 намар буюу 1050 дахь даваа

Author: saikhnaa on 24-07-2017, 14:08

Японы мэргэжлийн сумо бөхийн Нагоя башё өчигдөр өндөрлөлөө.

Тус башёд Монголын сумоч их аварга Хакухо М.Даваажаргал 14 даваа 1 унаатайгаар түрүүллээ. Тэрбээр мэргэжлийн сумогийн дээд зиндаанд 39 дэх удаагаа түрүүлсэн нь энэ байлаа. Тэмцээний хамгийн сүүлийн өдөр нутгийн сумоч, их аварга Харумафүжи Д.Бямбадоржтой барилдаж ёритауши мэхээр ялалт авсан юм. Мөн тэрбээр сумо бөх барилдаж эхэлснээсээ хойш 1050 даваа авсан нь бүх цаг үеийн түүхэнд нэгт орох амжилт болжээ.

Өдгөө 32 настай их аварга маань уг рекордыг тогтооход 17 жилийг зарцуулсан байна. Энэ нь өмнөх рекорд эзэмшигчидтэй харьцуулахад харьцангуй бага хугацаа юм. Уг түүхэн амжилтыг эзэмшиж байсан озеки Кайо 1047 даваа авахын тулд 23 жил барилдсан бол 1045 даваатай Чиёнофүжи аварга 21 жилийг зарцуулсан байна. Мэргэжлийн спортын хувьд оргил үедээ явж байгаа их аварга маань одоо зодог тайлах хүртлээ өөрийнхөө рекордыг ахиулахаар болж байгаа юм.

Тэрбээр сумо бөхөд 2001 оны гуравдугаар сарын башёд анхныхаа барилдааныг хийж байсан бол, 2004 оны тавдугаар сард дээд зиндаанд анх барилдаж байлаа. Харин ёкозуна цолтойгоор 2007 оны долоодугаар сарын башёд барилдаж байсан юм. Тэгвэл үүнээсээ яг арван жилийн дараа түүхийг шинэчилсэн башёг үдсэн байна.

Хакухо нийт замналдаа 1050 даваа 219 ялагдал гэсэн үзүүлэлттэй бөгөөд 58 барилдааныг гэмтлийн улмаас өнжиж байсан байна. Үүнээс дээд зиндаанд 956 даваа 171 унаатай байгаа юм. Түүний 956 даваа нь ч дээд зиндаанд хамгийн олон давсан рекорд амжилт юм. Нийт сумо бөх сонирхогчид болон Монголчуудынхаа өмнөөс их аваргынхаа амжилтад халуун баяр хүргэе.

Б.Энх-Амгалан

http://www.shuud.mn/content/read/486139.htm

More 343 0

Category: Спорт

Дуу цахилгаантай бороо орох тул гэнэтийн үер усны аюулаас сэрэмжлүүлж байна

2017/07/24

Дуу цахилгаантай бороо орох тул гэнэтийн үер усны аюулаас сэрэмжлүүлж байна

Author: saikhnaa on 24-07-2017, 13:45

Ойрын өдрүүдэд нутгийн хойд хэсгээр дуу цахилгаантай бороо орох тул гэнэтийн үер усны аюулаас сэрэмжтэй байхыг анхааруулж байна гэж Цаг Уур, Орчны Шинжилгээний Газраас мэдээллээ.

2017 оны долоодугаар сарын 23-ны 20 цагаас долоодугаар сарын 24-ний 20 цаг хүртэлх цаг агаарын урьдчилсан мэдээ

БАРУУН АЙМГУУДЫН НУТГААР: Үүлшинэ. Шөнөдөө нутгийн хойд хэсгээр, өдөртөө зарим газраар түр зуурын бороо орно. Дуу цахилгаантай. Салхи баруун хойноос секундэд 5-10 метр, борооны өмнө түр зуур ширүүснэ. Алтай, Хангайн уулархаг нутгаар шөнөдөө 6-11 градус, өдөртөө 20-25 градус, Эхийн голын Баянбүрд орчмоор шөнөдөө 20-25 градус, өдөртөө 29-34 градус, бусад нутгаар шөнөдөө 10-15 градус, өдөртөө 24-29 градус дулаан байна.

ТӨВИЙН АЙМГУУДЫН НУТГААР: Үүлшинэ. Шөнөдөө зарим газраар, өдөртөө ихэнх нутгаар түр зуурын бороо орно. Дуу цахилгаантай. Салхи баруун хойноос секундэд 5-10 метр, борооны өмнө түр зуур ширүүснэ. Хангай, Хөвсгөл, Хэнтэйн уулархаг нутгаар шөнөдөө 5-10 градус, өдөртөө 18-23 градус, бусад нутгаар шөнөдөө 11-16 градус, өдөртөө 22-27 градус дулаан байна.

ЗҮҮН АЙМГУУДЫН НУТГААР: Үүлшинэ. Шөнөдөө нутгийн зүүн хэсгээр, өдөртөө зарим газраар түр зуурын бороо орно. Дуу цахилгаантай. Салхи зүүн хойноос секундэд 7-12 метр. Шөнөдөө 11-16 градус, өдөртөө 22-27 градус дулаан байна.

ОТРЫН НУТАГ ХЭРЛЭНБАЯН-УЛААН ОРЧМООР: Үүлшинэ. Бороо орохгүй. Салхи баруун хойноос секундэд 7-12 метр. Шөнөдөө 12-14 градус, өдөртөө 25-27 градус дулаан байна.

ГОВИЙН АЙМГУУДЫН НУТГААР: Солигдмол үүлтэй. Шөнөдөө бороо орохгүй. Өдөртөө нутгийн хойд хэсгээр түр зуурын бороо орно. Дуу цахилгаантай. Салхи баруун өмнөөс секундэд 6-11 метр. Дундговийн нутгаар шөнөдөө 12-17 градус, өдөртөө 23-28 градус, бусад нутгаар шөнөдөө 15-20 градус, өдөртөө 27-32 градус дулаан байна.

УЛААНБААТАР ХОТ: Үүлшинэ. Түр зуурын бороо орно. Салхи зүүн өмнөөс секундэд 6-11 метр, борооны өмнө түр зуур секундэд 14-16 метр ширүүснэ. Шөнөдөө 11-13 градус, өдөртөө 22-24 градус дулаан байна.

2017 ОНЫ ДОЛООДУГААР САРЫН 25-НААС ДОЛООДУГААР САРЫН 28-НЫГ ХҮРТЭЛХ ЦАГ АГААРЫН УРЬДЧИЛСАН ТӨЛӨВ

25-26-нд төв болон зүүн аймгуудын ихэнх нутаг, баруун болон говийн аймгуудын зарим газраар, 27-нд баруун болон зүүн аймгуудын зарим газраар, 28-нд баруун болон төвийн аймгуудын зарим газраар түр зуурын бороо орно. Дуу цахилгаантай.

Борооны өмнө салхи түр зуур ширүүснэ. Алтай, Хангай, Хөвсгөл, Хэнтэйн уулархаг нутгаар шөнөдөө 4-9 градус, өдөртөө 19-24 градус, говийн бүс нутгийн өмнөд хэсгээр шөнөдөө 18-23 градус, өдөртөө 28-33 градус, бусад нутгаар шөнөдөө 12-17 градус, өдөртөө 24-29 градус дулаан байна.

More 344 0

Category: Мэдээ мэдээлэл

Монголчуудад дуулгах САЙН хэрнээ СААР мэдээ

2017/07/24

Монголчуудад дуулгах САЙН хэрнээ СААР мэдээ

Author: saikhnaa on 24-07-2017, 12:20

Олон улсын эрчим хүчний агентлагийн гаргасан тайланд хүлэмжийн хий ялгаруулдаг нүүрсний хэмжээ урьд өмнө байгаагүй ихээр өссөн гэсэн тооцоог хийсэн байна. Түүгээр ч барахгүй 2025 он гэхэд одоо байгаагаас тав дахин их нүүрс хэрэглэнэ гэсэн тооцоог хийсэн байна. Энэ хандлага дэлхийн улс орнуудыг уурхайчид буюу нүүрсний баялагтай (АНУ, ОХУ, Индонези, Австрали, ӨАБНУ, Мозамбик, Монгол гэх мэт) орнууд, байгаль хамгаалагчид (өндөр хөгжилтэй Япон болон арлын орнууд) гэсэн хоёр хэсэгт хуваагдахад хүргэжээ.

Иргэд нь өнөө, маргаашийн идэх хоол гэхээсээ илүү дэлхийн дулаарал, хүлэмжийн хийн алдагдалд санаа зовж явдаг баян, мөдхөн гишгэх газаргүй болох гэж байгаа арлын орны хувьд нүүрс нь саяхныг хүртэл ярианы сэдэв биш байлаа. Харин энэ жилээс эхлэн байдал бишдэж байгааг бүгд нэгэн дуугаар хүлээн зөвшөөрч эхэлжээ.

Япон улс түүхий нүүрс олборлогч, хэрэглэгч орнуудад татаас өгч, эрчим хүчний шинэ үүсвэр олж өгөхөд нь туслах санаачлага гаргасан. Гэтэл АНУ, ОХУ зэрэг томчууд нүүрсний нөөцөөрөө дэлхийд тасархай тэргүүлдэг учир ойрын хугацаанд олборлолтоо багасгахгүй гэдэг нь ойлгомжтой болж ирлээ.

Ингээд түүхий нүүрс ихээр олборлодог, хэрэглэдэг орнуудаас татвар авч арлын орнуудад татаас өгч байх шийдвэр гараад байгаа билээ. Гэхдээ хэмжээг нь одоо болтол эцэслэн шийдээгүй хэвээр байна. Нүүрс олборлосноос нь татвар авах уу, ашиглаж байгаагаас нь авах уу, эсвэл аль алинаас нь авах уу гэдгээ ч шийдээгүй байгаа гэсэн үг.

Улс орнууд "Ер нь бол нүүрсний хэрэглээг багасгаж эрчим хүчний шинэ эх үүсвэр хайх, сэргээгдэх эрчим хүчийг ашиглах нь зүйтэй” гэдэгт бүгд санал нэгдэж буй. Гэвч энэ нь тийм амар бүтэхгүй бололтой. Нүүрсний импортоор дэлхийд тэргүүлэгч, цахилгаан станцуудын 70 хувь нь нүүрсээр ажилладаг БНХАУ ирэх 2025 он гэхэд нийтдээ 600 гигаваттын хүчин чадалтай цахилгаан станцуудыг нэмж барихаар төлөвлөжээ. Тэдний нүүрсний хэрэглээ шинээр барих цахилгаан станцуудыг тооцохгүйгээр жилдээ 5-7 хувиар нэмэгдэж байна. Энэ бол байгаль хамгаалагчдын хувьд аймшигтай мэдээ билээ. Нүүрсний нөөцөөр дэлхийд гуравдугаарт ордог ч хэрэглээний өсөлтийн хурдацыг нь гүйцэхгүй байгаа учир тус улс хуучирсан, өртөг өндөртэй олборлолт хийдэг 600 уурхайгаа хаах шийдвэр гаргасан. Одоо тус улс Өрнө-Дорно төмөр замын сүлжээг ашиглан нүүрс зөөвөрлөхөөр шамдаж байна.

Хэрэглээгээрээ БНХАУ-ын дараа ордог Энэхтхэгийн өсөлт харьцангуй удаан байгаа ч коксын хэрэглээгээрээ тун удахгүй Хятадыг гүйцнэ гэсэн таамаглалыг Дойче банк гаргажээ. Тиймд нүүрсний үнэ цаашид зогсолтгүй өснө гэж ажиглагчид үзэж байна. Энэ нь уурхайчдын тоонд орсон, цаашид байр сууриа улам ахиулахаар зүтгэж байгаа манай орны хувьд маш таатай нөхцөл бүрдэнэ гэсэн үг юм. Гэхдээ одоо байгаа шигээ ганц худалдан авагчид (БНХАУ) дэлхийн зах зээлийн үнээ тав дахин бага үнээр худалдаад байвал төдийлөн өгөөжөө өгч чадахгүй юм. Тиймээс худалдан авагчаа нэмэгдүүлж ганц улсаас хараат биш болох арга замыг эрэлхийлэх нь зөв. Олборлогч улсуудаас татвар авахаар болсон ч харьцангуй бага хэмжээний нүүрс олборлодог манай тал айх зүйлгүй юм..

Австрали, Индонези улсууд жилд 200 гаруй сая тонн нүүрс экспортолдог гэсэн үзүүлэлтээр дэлхийд тасархай тэргүүлж, ОХУ, Колумби, ӨАБНУ тэдэнтэй айлсахаар зэхэж байна. Эдгээр орнууд жил ирэх бүр өсөн нэмэгдэж байгаа хэрэгцээг хангахын тулд нүүрсээ зөөх дэд бүтцийн салбарт ихээхэн хөрөнгө оруулаад эхэллээ. Товчоор хэлэхэд, дэлхий дээр нүүрсний "их тэсрэлт” үргэлжлэх төлөвтэй байна.

Б.Хурцболд

http://news.zindaa.mn/22v9

More 363 0

Category: Уул уурхай

Ерөө голын амийг таслах нь... Ай халаг...

2017/07/24

Ерөө голын амийг таслах нь... Ай халаг...

Author: saikhnaa on 24-07-2017, 12:18

Ард түмэндээ хариуцлага, амар тайван байдлыг амлан үнэмлэхүй ялалт байгуулсан МАН-ын удирдлага, УИХ-ын 65 гишүүн, сайд дарга нараа даврал, тэнэглэл, дээрэнгүй байдал чинь хэрээс хэтэрлээ. Монголчууд бидэнд хөгжил авчирч гавъяа байгуулдаггүй юм аа гэхэд уух ус, үзэсгэлэнт байгалийг минь л үлдээ гуйж байна. Зуны амралт зугаалгын цагаар, олны анхаарал суларсан сиймхийгээр АЛТ хайн гол ус руу дайрахаа зогсоо.

Монгол Улсын Ерөнхийлөгч Х.Баттулга
УИХ-ын дарга, МАН-ын дарга М.Энхболд
Монгол Улсын Ерөнхий сайд сайд Ж.Эрдэнэбат
Монгол Улсын Шадар сайд У.Хүрэлсүх нарыг шахан шаардаж байна.

Гол усанд ийм ойр хэн гэдэг эрхтэн дархтан үйл ажиллагаа хийх зөвшөөрлийг энэ компанид олгочихов. Унаган байгалийг хэдэн халтар мөнгөний төлөө ухан бохирдуулж буй хүмүүст олсон орлого нь хоол болох уу? Энэ их техникээ ган болж буй Дорнод, Хэнтий аймагт Хэрлэн голоос усан сан татаж мал амьтанд буян болцгоо... Хавар, намар мал, зээр гөрөөс хатаж үхэж байхад байгаа хэдэн голоо АЛТ-ны төлөө устгаад суух нь зөв үү?

#МонголдТөрБайнаУу - #ЭрхМэдэлтнүүдИчтүгэй

Сэтгүүлч Н.Урантогтох

More 212 0

Category: Уул уурхай

Унаач хүүхэд бэртвэл хурдан морины эзэнд хариуцлага тооцдог больё

2017/07/24

Унаач хүүхэд бэртвэл хурдан морины эзэнд хариуцлага тооцдог больё

Author: saikhnaa on 24-07-2017, 12:08

Монголчуудын түүхэн өв уламжлал, өвөрмөц содон зан заншил болох эрийн гурван наадмаараа дэлхийд гайхагддаг. Тиймдээ ч эрийн гурван наадмын хүрээнд тухайн жилийн түрүү бөх, цэц мэргэн харваач, шандаст хурдан хүлгийг алдаршуулж, байлдаг. Гэвч хурдан морь унаач хүүхдийн эрүүл мэнд, аюулгүй байдалтай холбоотой асуудал үргэлж орхигдсоор байна.

Морь унаач хүүхдүүд унасан морины наснаас шалтгаалан нар, салхи, бороо, шуурга, цастайг үл анхааран 10-30 километр газар туулдаг. Гэвч унаач хүүхдийн асуудал тэр бүр яригдсангүй. Гэмтэж бэртсэн хүүхдүүд 9-15 насныхан байдаг. Унаач хүүхдүүд мориноос унаж, чирэгдсэний улмаас тархи толгой, нугас нуруундаа хүнд гэмтэл авч, эмчлүүлдэг.

Зарим насан туршдаа тахир дутуу, хөгжлийн бэрхшээлтэй болоод хоцрох нь бий. Тухайлбал, саяхан Завхан аймгийн Түдэвтэй сумын наадамд хурдан морь унасан 13 настай Б мориноос унаж хүнд бэртэж авсан. Түүнд сумын эмнэлэгийнхэн өөрсдийн нөөц боломжийн хэрээр эмчилгээ хийсэн боловч эмнэлгийн тоног төхөөрөмж хангалтгүй улмаас Улаанбаатар хотод яаралтай ирж эмчилгээ хийлгэх шаардлага гарсан.

Мориноос унаж бүртсэн хүүгийн биеийн байдал маш хүнд машинаар Улаанбаатар хотод авчрах боломжгүй аян замын ачаалал даахгүй учир сумын эмнэлэгийнхэн нийслэлээс онгоц явуулахыг хүсч, албан бичиг хүргүүлсэн байдаг. Гэвч хүнд бэртэл авсан хүүг хэн ч тоогүй. Харин залуу эмч Тамир өөрийн танил нөхөдтэй нийлж байгаад Blue Sky Aviation компаниас 11 мянган долларын нислэг үйлдэх зардалыг нь шийдвэрлэж нийслэлд авч ирсэн гэдэг мэдээлэл цахим хуудсанд нийтлэгдсэн байна. Мориноос унаж гэмтсэн ганц л хүүхдийг эмчлэхийн тулд ийм өндөр зардал гарсан байна шүү дээ.

Гэвч жил бүр хэчнээн уралдаан болж байна. Энэ бүгдэд унаж, гэмтсэн хүүхдийн тоо хэд байгаа билээ. Иймээс унаач хүүхдийн асуудлыг бүх шатны байгууллагууд анхааралдаа авах нь цаг болсон. Нөгөөтэйгээр унаач хүүхэд бэртсэн тохиолдолд тухайн хурдан морины эзэнд хариуцлага тооцдог болох хэрэгтэй.

Н.Алтанцэцэг

More 354 0

Category: Мэдээ мэдээлэл