Мөр хадгалсан хөрстийг зүсэж АЛТ-аа ухуулав, баяжсангүй
Мөнгөн оргилтой уулсаа нурааж НҮҮРС-ээ ухуулав, бэлжсэнгүй
Амь даасан тэнгэрээ уурлуулж ЗЭС-ээ ухуулав, мандсангүй
Амьдрал бичсэн судраа шатааж ГУУЛЬ-аа ухуулав, дэвжсэнгүй
Өвөг дээдсийн шарилийг цочоож ХҮДЭР-ээ ухуулав, өөдөлсөнгүй
Үлэг гүрвэлийн ясыг үйрүүлж УРАН-аа ухуулав, сайжирсангүй
Сүг зурагтай агуй цөмлүүлж МӨНГӨ-өө ухуулав, урагшилсангүй
Сүүлчийн үлдсэн модоо огтолж ЦАЙР-аа ухуулав, ахисангүй
Талын нүдэн нуураа сохлож ЖОНШ-оо ухуулав, цэгцэрсэнгүй
Таанын цэнхэр хөндийг дүлийрүүлж НЕФТ-ээ ухуулав, хөгжсөнгүй
Үр хойчийнхоо тавиланг өмлөж ИРЭЭДҮЙ-гээ ухуулав, ухаарсангүй
Үхлийн хар үүдийг нээж ЭХ ОРОН-оо ухуулав, гэгээрсэнгүй
Эмээгийн залбирдаг бурхан зүрхтэй юм болохоор
Ээжийн шүтдэг судар хэлтэй юм болохоор
Элэнцийн тахисан овоо сүнстэй юм болохоор
Эцгийн түшсэн хангай савдагтай юм болохоор