Өнгөрсөн пүрэв гаригт, Бүгд Найрамдах Азербайжан улсад ажлын айлчлал хийж буй Монгол Улсын Ерөнхийлөгч Х.Баттулга тус улсын Баку хотноо ОХУ-ын Ерөнхийлөгч В.В.Путинтэй уулзав.

Энэ үеэр Ерөнхийлөгч нар хоёр улсын хамтын ажиллагааны талаар санал солилцож, энэ сарын 11-нээс 13-нд ОХУ-ын Владивосток хотноо болсон Дорнын эдийн засгийн чуулганы үеэр уулзахдаа ярилцсан хоёр орны харилцаа хамтын ажиллагааг хөгжүүлэх болон эдийн засгийн харилцан ашигтай хамтын ажиллагааг дэмжих асуудлаар ярилцсан байна.

Мөн Монгол Улсын Ерөнхийлөгч Х.Баттулга, Бүгд Найрамдах Азербайжан улсын Ерөнхийлөгч Илхам Алиев, ОХУ-ын Ерөнхийлөгч В.В.Путин нар хамтдаа Баку хотын "Үндэсний Гимнастика Арена” спортын ордонд болж буй Жүдо бөхийн Дэлхийн аварга шалгаруулах 32 дахь удаагийн багийн тэмцээний үдээс өмнөх барилдаануудыг үзэж сонирхжээ.