33 настай америк эр Антарктид тивийг явганаар хөндлөн гулд туулсан анхны хүн болжээ


Колин О’Брэди хэмээх 33 настай америк аялагч мөсөн тивийн хойд эргээс өмнөд эрэг хүртэлх 1482 км замыг явганаар 54 хоногт амжилттай туулснаар энэ төрлийн явган аяллыг ганцаараа, ямар ч туслалцаагүйгээр хийсэн анхны хүн болжээ.

Тэрээр уг аяллыг анхлан хийхээр Британий армийн ахлагч Луис Раддын хамт Антарктид тивд хөл тавьсан бөгөөд арваннэгдүгээр сарын гурванд тэр хоёр тус тусын замдаа цувран гарцгаасан байна. Луис Радд нь О’Брэдигээс нэгээс хоёр өдрийн газраар хоцорч яваа аж.

Дээд зэргийн хатуу ширүүн уур амьсгал бүхий нөхцөлд хоёр аялагч тус бүрдээ 180 килограм жинтэй чарга чирч гүйлтийн цанын тусламжтайгаар урагшилж байжээ. 2016 онд Английн бас нэгэн аялагч Хенри Уорсли үүнтэй төстэй ганцаарчилсан аяллыг Антарктид тивд эхлүүлсэн ч замаа дуусгаж чадалгүй харамсалтайгаар амиа алдаж байв.  Харин үүнээс өмнө 1997 онд Норвегийн аялагч Борже Оусланд агаарын бөмбөлөг ашиглан Антарктидийг хөндлөн гулд анх туулсан байна.

Өчигдөр буюу лхагва гарагт О’Брэди Антарктид тивийн ландмасс, хөлдүү тэнгис дуусч Номхон далай эхэлдэг Россын мөсөн хавтан дээр хүрснээр албан ёсоор аяллаа дуусгасан байна. Замынхаа сүүлийн 125 километрийг тэрээр 32 цагийн турш огт унталгүйгээр туулсан аж.

“Аяллын маань сүүлийн 32 цаг бол миний амьдралдаа өнгөрүүлсэн хамгийн хүнд, бас хамгийн гайхалтай хугацаа байлаа. Замаа дуусгаснаа мэдэх хором хүртэл энэ аялал үргэлж боломжгүй зүйл мэт санагдаж байв” хэмээн тэрээр өгүүлжээ.


Сэтгэгдэл

АНХААРУУЛГА: Уншигчдын бичсэн сэтгэгдэлд www.Scandal.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Сэтгэгдэлтэй холбоотой санал гомдлыг 9318-5050 утсаар хүлээн авна.