Хойд хөршийн Кемерово мужийн гурван хотод нүүрсний тортогтой холилдож хар өнгөтэй болсон цас орсон тул орон нутгийн захиргаанаас нүүрс боловсруулах үйлдвэрээ түр хугацаанд хаах шийдвэр гаргажээ.

Москва хотоос зүүн зүгт 3000 гаруй километрийн зайд, баруун Сибирьт орших Кемерово муж нь Оросын хамгийн чухал хүнд үйлдвэрлэлийн бүсүүдийн нэг бөгөөд дэлхийд томоохонд тооцогдох нүүрсний ордуудтай.

Мужийн оршин суугчид хар болон бараан саарал өнгийн цасаар хучигдсан байшин барилга, машинуудын зургийг цахим сүлжээнд нийтэлж, зарим нь тэрхүү нөхцөл байдлыг алдарт "Бөгжний эзэн" цувралын Мордорын ертөнцтэй зүйрлэж байжээ. Түүнчлэн бүс нутгийн цаг агаарын онцлогоос шалтгаалан цасан бүрхүүл дөрөвдүгээр сар хүртэл хайлахгүй байх магадлалтай тул иргэдийн эрүүл мэндэд аюул учирч, хүүхдүүд гадаа тоглох боломжгүй болсныг тэд онцолсон байна.

Хар цасанд хучигдсан хотуудын нэг болох Киселёвскийн тэр үеийн агаарыг шинжилж үзэхэд бохирдлын хэмжээ зөвшөөрөгдөх хэмжээнээс даруй хоёр дахин их байсан аж. Албаныхан тус хотод байрлах "Черкасовская" нүүрс боловсруулах үйлдвэрийг агаарын бохирдлын гол буруутан гэж үзсэн байна. Агаар мандалд ялгаруулах нүүрсний тортгийг багасгах ямар нэгэн шүүлтүүр ашигладаггүй тэрхүү үйлдвэрийг түр хугацаанд хаах шийдвэрийг мужийн захирагч Сергей Цивилёв мягмар гарагт гаргажээ.

News.caak.mn