Хятадын засгийн газар өөрийн төрийн өмчит цахилгаан станцуудад Австралийн нүүрсийг худалдаж авахгүй байхыг анхааруулсан тухай мэдээллийг авснаа Австрали улсын засгийн газрын шадар сайд Майкл Маккормак өнөөдөр хэвлэлд ярьжээ. Тэрээр уг асуудлыг судалж, тодруулах даалгаврыг өөрийн дипломатчдад болон худалдааны сайдад өгсөн байна. “Энэ мэдээллийг аваад маш их санаа зовж байна. Гэхдээ манай хоёр улс хоёр талт харилцаатай. Австралид Хятад хэрэгтэй шиг Хятадад ч бас Австрали хэрэгтэй” гэж Маккормак ABC сувагт өнөөдөр ярьжээ. Сүүлийн үед хоёр орны хооронд худалдааны маргаан зөрчил нэмэгдэж байгаа. Саяхан Бээжингийн эрх баригчид Австралийн арвайнд 80 хувийн импортын татвар оноож эхэлсэн бол тус улсын дөрвөн гол махны үйлдвэрээс түүхий мах авахыг хориглосон юм. 

“Хятад улс олон жил манай худалдан авагч байсан. Тэд манай нүүрсний чанарыг сайн мэднэ” гэж ярьсан Маккормак хоёр орны худалдааг сэргэнэ гэдэгт найдаж байгаагаа илэрхийлжээ. Цахилгаан станц, гангийн үйлдвэрт ашигладаг коксжих нүүрс нь төмрийн хүдрийн дараа Австралиас Хятадад нийлүүлдэг хоёр дахь том экспортын бүтээгдэхүүн юм. Хятадын засгийн газар Австралийн төмрийн хүдрийн нийлүүлэлтэд тавих шаардлагаа мөн өндөрсгөж магадгүй болоод байгаа. Австралийн засгийн газар саяхан коронавирусийн цар тахал дэгдээсэн хэрэгт Хятад улсыг холбогдуулан шалгах уриалгыг олон улсын хамтын нийгэмлэгт гаргасан нь хоёр орны худалдаанд саад бэрхшээл үүсэх шалтгаан болсон гэж ажиглагчид дүгнэж байгаа юм. 

Р.Төмөр 

Эх сурвалж: Associated Press