ЦЕГ-ийн ХМТ-ийн ахмад М.Мөнхшүр өчигдөр СХД-ийн алба хаагчдаа хуурай агсамнаж, ёс зүйгүй авирлажээ.

Тодруулбал, уржигдар /2021.04.26/ СХД-ийн 21-р хороолол орчимд цагдаагийн ахмад М.Мөнхшүрийг зогсоож шалгасан алба хаагчаа хэл амаар доромжилж зүй бусаар харьцаж байгааг жолооч нар харжээ. Жолооч нарын ярьж буйгаар М.Мөнхшүрийн унаж явсан Ланд круйзер маркын автомашиныг зогсоон шалгасан СХД-ийн Цагдаагийн алба хаагчийг ахмад М.Мөнхшүр нь өөрийг нь болон хамт зорчиж явсан нөхрийг нь таньсангүй, хүндэлсэнгүй хэмээн загнаж, элдвээр хараан зүхэж байхыг нь харсан жолооч нар ард нь түгжирч зогсжээ.

Эх сурвалжаас тодруулахад хатуу хөл хорио тогтоосон энэ цаг үед бүх алба хаагчид гудамж, зам дээр үүрэг гүйцэтгэж байгаа. Гэвч М.Мөнхшүр ахмад өөрийгөө хавьтагч байж болзошгүй хэмээн өөртөө чөлөө өгч амралтын байдалтай амьдраад аль хэдийнээ 14 хоногоос хэтэрчээ. Ийнхүү цар тахлаар шалтаглан чөлөө авсан цагдаагийн ахмад М.Мөнхшүр өөрийгөө тусгаарлах бус харин гадуур сэлгүүцэж, өөрийг нь таниагүй алба хаагчдаа аархаж яваа бололтой.