Зам тээврийн осолд орж, тархины үхжилттэй хэмээн оношлогдсон талийгаач А-гийн ар гэрийнхэн охиноо элэг бөөрний донор болгох П.Батчулуун эмчийн саналд зөвшөөрч "элэг бөөр, дагалдах судас авна" хэмээн танилцуулсан бичигт гарын үсэг зурснаар охиныг нь донор болгосон гэж хэлдэг. Гэвч охиныгоо оршуулах өдөр талийгаачийг донор болсны дараах дүр төрхөөр буюу хөлийг төмөр утсаар оёсон байдлыг харсан нь ар гэрийнхэнд нь хүнд цохилт болж, элэг бөөрөөс гадна өөр эд эрхтэн авсан байна хэмээн П.Батчулуун эмчид хандахад элэг, бөөр, шөрмөс авсан хэмээн тайлбарласан бөгөөд үүнээс үүдэн талийгаачийн ар гэрийнхэн донорын биеэс зөвшөөрөөгүй эд эрхтнийг авсан гэх гомдол гаргаснаар Эрүүл мэндийн яамны Эрүүл мэндийн Хөгжлийн төвийн Эс, эд, эрхтэн шилжүүлэн суулгах үйл ажиллагааг зохицуулах албаны даргаар ажиллаж байсан П.Батчулууныг шүүхэд өгсөн.

Шүүхийн шийдвэр хэрхэн гарав

Хэрэг шүүх дээр ирж, П.Батчулуун эмчийг Эрүүгийн хуулийн 15.3.2-р заалтаар зүйлчилсэн бөгөөд "Хууран мэхэлж хүний эд, эрхтнийг авсан” гэмт хэрэг үйлдсэн гэм буруутайд тооцож, 2 жил 6 сарын хугацаагаар хорих ялаар шийтгэж, хорих ялыг нээлттэй хорих байгууллагад эдлүүлэхээр Анхан шатны шүүхээр шийдвэрлэсэн байдаг. Ийн шүүх хурлын дүгнэлт гарсан бөгөөд түүнийг хорих 461-р ангид хорьсон.

Энэ сарын 13-ны өдөр П.Батчулуун эмчид холбогдох хэргийг түүний өмгөөлөгч нарын гаргасан давж заалдах гомдолд үндэслэн хэргийг хянан хэлэлцээд анхан шатны шүүхийн дүгнэлт үндэслэлтэй, Эрүүгийн хуулийг зөв тайлбарлан хэрэглэсэн, улмаар түүнд оногдуулсан эрүүгийн хариуцлага нь үйлдсэн гэмт хэргийн гэм бурууд нь тохирсон байна гэж үзэн анхан шатны шүүхийн шийтгэх тогтоолыг давж заалдах шатны шүүх хэвээр үлдээсэн юм.

П.Батчулуун эмчийн биеийн байдал муудсаны улмаас Улсын гуравдугаар төв эмнэлэгт хүргэгдсэн бөгөөд өнөөдрийн байдлаар эмч нарын зүгээс биеийн байдал нь муу буюу зүрхний үйл ажиллагаа нь 33 хувьтай байгаа гэв.

Салбарын эмч нарын тайлбарлаж буйгаар

• Элгийг авахын тулд элэгнээс гадна тус эрхтнийг тэжээж буй гол судсаар тасалж авсан артер тараагуур судас, хураагуур судас, цөсний зам зэргийг,
• Бөөрийг авахын тулд бөөрнөөс гадна мөн тэжээгч судаснууд болон шээлгүүр зэргийг
• Шөрмөсийг авахын тулд ястай хэсгээс авбал амьдрах чадвар нь илүү байдаг учраас хамт авдаг хэмээн тайлбарласан юм.

Хуульчдын зүгээс

Донорын тухай хуульд амьд донор, амьгүй донор гэдэгг ойлголтын ялгааг гаргаж зааж өгсөн байдаг бөгөөд П.Батчулуун эмчийг ялласан заалт нь амьгүй донорт хамаарахгүй бөгөөд Эрүүгийн хуульд амьгүй донороос эс, эд, эрхтэн авсан бол ямар ял оноох хуулийн нарийн заалт байхгүй буюу Эрүүгийн хуулийг төсөөтэй байдлаар хэрэглэхгүй гэдэг асуудал хөндөгдөж буй хэмээцгээв.

Одоо П.Батчулуун эмчид ямар нөхцөл үүсэв

Эмч нар хэвлэлийн хурлын үеэр “П.Батчулуун эмчид өршөөл үзүүлээч” гэдэг агуулгыг хөндөв. Өршөөлийг УИХ үзүүлдэг бөгөөд хуулиндаа,

Монгол Улсын Үндсэн хууль

Хорин тавдугаар зүйл

1. Улсын Их Хурал төрийн дотоод, гадаад бодлогын аль ч асуудлыг санаачлан хэлэлцэж

болох бөгөөд дараахь асуудлыг өөрийн онцгой бүрэн эрхэд хадгалж шийдвэрлэнэ:

14/ өршөөл үзүүлэх шийдвэр гаргах;

Монгол Улсын Ерөнхийлөгч бүрэн эрхийнхээ хүрээнд эрүүгийн хариуцлагад татагдаж, ял шийтгүүлсэн хүнд уучлал үзүүлэх эрх нь бий. Хуулиндаа,

Монгол Улсын Үндсэн хууль

Гучин гуравдугаар зүйл.

1. Ерөнхийлөгч дараахь үндсэн бүрэн эрхийг хэрэгжүүлнэ:

8/ уучлал үзүүлэх эрхтэй.

Уучлал хүссэн өргөдлийг ялтан өөрөө, эсвэл түүний гэр бүл, өмгөөлөгчийн зүгээс гаргаж болдог.

Одоогийн нөхцөл байдлаар П.Батчулуун эмч Улсын дээд шүүхэд ханджээ. Дээд шүүхээс анхан болон давж заалдах шатны шүүхийн шийдвэрийг хүчингүй болгосон тохиолдолд л түүнийг цагаатгах нөхцөл үүсэх боломж бий. Дээд шүүх цагаатгах тогтоолыг тодорхойлох маш нарийн зохицуулалтуудтай. Жишээлбэл,

• а/ ял сонсгох үндэслэл болсон нотлох баримтыг өөрөөр тайлбарлах;
• б/ улсын яллагч анхаарч үзэлгүй орхигдуулсан шинэ нотлох баримтыг гаргах…зэрэг хуулийн маш олон заалт энд хамаардаг.

П.Батчулуун эмчийн хувьд Улсын дээд шүүхэд сүүлчийн найдвар тээн хандаж буй биз ээ. Албан эх сурвалжаас тодруулахад П.Батчулуун эмч ерөнхийлөгчид хандан уучлал хүссэн захидал ирүүлээгүй нь түүний дээрх үндэслэлийг нотлож байна.