Өнөөдөр өглөө 06:00 цагийн орчимд “Эрдэнэс Тавантолгой” ХК-ийн уурхайд TRX 11-47 улсын дугаартай, 100 тоннын даацтай самосвал онхолдож, 40 настай оператор харамсалтайгаар амиа алджээ. Ар гэрээ тэжээж, ид хийж бүтээх насан дээрээ байсан иргэний амь нас ийнхүү ажил үүргээ гүйцэтгэж явахдаа тасалдсан нь олон нийтийн санааг ихэд түгшээж байна.

Энэ осол нь зөвхөн нэг компанийн дотоод асуудал бус, хөдөлмөрийн аюулгүй байдлын тогтолцооны бодит хариуцлагыг хөндөж буй хэрэг гэж ажиглагчид үзэж байна.

Нэн ялангуяа “Эрдэнэс Тавантолгой” ХК-д онц байдал зарласан үед ийм осол гарсан нь байгууллагын тоног төхөөрөмж, машин техник, дугуй зэрэг хэрэгслийн чанар, ашиглалтын байдалд яаралтай дүгнэлт хийх шаардлагыг сануулж байна.

Нутгийн иргэдийн хэлж буйгаар, тоног төхөөрөмжийн чанар хангалтгүй байдал, хяналт шалгалтын сул оролцоо нь хүний амь насанд хүргэсэн байж болзошгүйг анхаарах ёстой аж.

Дэлхийн жишгээр уул уурхайн орчинд хөдөлмөрийн аюулгүй байдлыг хамгийн дээд түвшинд хангах ёстой атал, Монголд ажилтан осолд өртөхөд бурууг дан ганц тухайн хүн рүү чиглүүлж, байгууллагууд хариуцлагаас бултах явдал түгээмэл хэвээр байгааг ч олон нийт шүүмжилж байна.

Иймд зөвхөн “Эрдэнэс Тавантолгой” ХК-ийн асуудал гэж харах бус, Монгол хүн бүр хувьцаа эзэмшдэг энэ компанийн хөдөлмөрийн аюулгүй байдлын түвшинг сайжруулах, тоног төхөөрөмжийн чанарт бүрэн хэмжээний шалгалт хийх нь Засгийн газрын хэмжээнд авч үзэх ёстой асуудал болжээ.