Нийслэлийн иргэдийн төлөөлөгчдийн хурлын тэргүүлэгчдийн тогтоолоор гаргасан замын хөдөлгөөний зохиомол түгжрэлийг бууруулах зорилготой "Зориулалтын дугуй түгжигч ашиглах журам”-ыг хууль бус гэдгийг ШӨХТГ-аас тогтоосон талаар бид өмнө нь мэдээлсэн. Тодруулбал, НИТХ-ын тэргүүлэгчдийн 2014.06.26-ны өдрийн 98 дугаар тогтоолоор батлагдсан "Зориулалтын дугуй түгжигч ашиглах журам”-ыг илт хүчин төгөлдөр бус захиргааны актад тооцуулахаар нэхэмжлэл гаргасан. Тус нэхэмжлэлийг Нийслэл дэх Захиргааны хэргийн анхан шатны шүүх энэ сарын 24-ний өдөр хянан хэлэлцэж "Зориулалтын дугуй түгжигч ашиглах журам”-ыг илт хууль бус болохыг тогтоожээ.

Үүнтэй холбогдуулан ШӨХТГ иргэдийн эрх ашгийг шүүхэд нэхэмжлэн хамгаалахын тулд "Шударга төрийн төлөө” ТББ  болон "Монголын хуульч эмэгтэйчүүдийн холбоо” ТББ-тай хамтран ажиллах санамж бичиг байгуулж, тээврийн хэрэгслийг зөөж шилжүүлсэн болон дугуй түгжсэний улмаас хохирсон иргэдэд стратегийн өмгөөлөл үзүүлэх, нийтийн эрх ашгийг шүүхэд нэхэмжлэн хамгаалах, хохирлыг барагдуулах ажлыг зохион байгуулж байгаа аж.

НИТХ-ын тэргүүлэгчдийн хууль бус шийдвэрийн дагуу өнгөрсөн хоёрдугаар сарын 28-ны өдрийн байдлаар 11746 тээврийн хэрэгслийн дугуйг түгжиж нийт 234,9 сая төгрөгний орлогыг хууль бусаар төвлөрүүлж, иргэдэд онц их хэмжээний хохирол учруулсан болохыг ШӨХТГ-ын улсын байцаагчийн дүгнэлтээр тогтоосон байдаг.