Scandal.mn

Гёте сургуулийн асуудлыг шударгаар шүүж өгөхийг сурагчдын эцэг эхчүүд хүлээж байна

2018/04/30

Гёте сургуулийн асуудлыг шударгаар шүүж өгөхийг сурагчдын эцэг эхчүүд хүлээж байна

Author: saikhnaa on 30-04-2018, 18:28

Одоогоос 16 жилийн өмнө хоёр эмэгтэй хамтран бизнес эрхэлжээ. Ингэхдээ нэг нь гадаад улсад сургуульд сурч, боловсрол эзэмшсэн туршлага чадвар дээрээ суурилан оюуны хөрөнгө оруулалт хийж хувийн дунд сургууль байгуулж, нөгөө нь тус сургуулийн сурагчдын хичээлийн байрыг гаргаж тэд хамтран ажиллажээ. Ингэж л анх Гёте сургуулийг байгуулсан П.Хажидмаа 30, Ц.Оюун гэх хоёр эмэгтэй 2003 онд банкнаас 10 жилийн хугацаатай зээл авч, тус зээлийг 2013 онд төлж дуусжээ. Зээл төлөх хугацаанд сарийн зээллэгийн хувиа төлөөд үлдэх ашгийн 70 хувийг Ц.Оюун, 30 хувийг П.Хажидмаа авахаар тохиролцжээ. Харин зээл төлснөөс хойш хамтран ажиллах гэрээг дууссаны дараагаар гэрээг цуцлахаар бол талууд бие биедээ 6 сарын өмнө мэдэгдэж, өөрсдийн оруулсан хөрөнгө оруулалтыг хэн хэнээсээ нэхэхгүй байх тохиолцоог тэртээх 2003 оны гэрээнд тусгажээ. 2013 оноос хойш зээл төлснөөс хойшхи хамтран ажиллаж байх хугацаанд бүтээсэн бүхнийг хоёр тал 50/50 хувиар хувааж авах тохиролцоотой байв. Яг энэ тохиролцоо 2016 оны 03-р сарыг хүртэл хэвийн үргэлжилж байсан.

Хоёр эмэгтэйн гэрээгээр баталгаажуулсан тохиролцоо 2016 оныг хүртэл жижиг сажиг маргааныг эс тооцвол хэвийн үргэлжилж ирсэн гэж хэлж болохоор байв.

Гэвч бүхийг П.Хажидмаатай хамтран хамтдаа бүтээн босгосон атлаа олж буй орлогынхоо 50 хувийг авч байгаа нь 2016 оны 3 сараас эхлэн Ц.Оюун захиралд таалагдаагүй байна. Өнгөрсөн 10 гаруй жилийн хугацаанд сургуулийн хичээлийн байраар хангаж байсан тэрээр "Алтан загасны үлгэр”-т гардаг эмгэн шиг гэнэтхэн өөрөө сургууль байгуулаад, захирлаар нь ажиллаж, дангаараа орлого олох сонирхолтой болоотхожээ. Энэ сонирхолоо хэрэгжүүлэхийн тулд Хамтран ажиллах гэрээгээ зөрчиж, улмаар аргагүйн эрхэнд П.Хажидмаа "Гёте” сургуулиа Ц.Оюуны эзэмшлийн байранд биш, өөр хичээлийн байранд сургалтаа явуулахад хүргэжээ.

Ц.Оюун Гёте сургуулийн хичээл явагдаж байсан өөрийн байрандаа "Дойче Шүле” гэх шинэ сургууль байгуулжээ. Ингэж Гёте сургууль хоёр хуваагдахадсуралцаж байсан 492 сурагчийн 282 нь шинэ байранд хичээллэх П.Хажидмаа захирлын Гёте сургуульдаа үргэлжлүүлэн суралцахаар болж, 180 хүүхэд шинээр байгуулагдсан Дойче Шүле сургуульд суралцахаар үлдэж, 30 гаруй хүүхэд нь өөр сургуульд шилжин суралцахаар болсон байна.

Энэ үеэс Ц.Оюуны хууль бус ажиллагаа эхэлжээ. Тэрбээр юуны өмнө шинэ байранд суралцах болсон 282 хүүхдийн хагас жилийн төлбөр болох 472 сая гаруй төгрөгийн талыг нь Ц.Оюун багагүй хугацаанд өөртөө байлгаж өгөхгүй байсан байна. Харин Гёте сургууль удаа дараа асуудал тавьж, албан бичиг өгч нэлээд хөөцөлдсөний эцэст 190 сая төгрөгийг суралцагчдын төлбөр болгон өгсөн ч үлдэгдэл 260 сая гаруй төгрөгийг одоо болтол өгөөгүй байгаа гэнэ. Дээр нь шинэ байранд суралцаж буй эдгээр сурагчдад төрөөс олгодог хувьсах зардлыг өдийг хүртэл өгөхгүй сурагчдыг хохироож байна.

Түүгээр зогсохгүй Ц.Оюун өөрийн нөхөр болох "Эрдэнэт” үйлдвэрийн ТУЗ-ын гишүүн, эдийн засгийн ухааны доктор Да.Ганболд /халзан/-ыг эл хэрэгт татан оролцуулж өөртөө туслуулан, "Гёте” гэдэг нэрийг П.Хажидмаа бүртгүүлчихсэн байсаар атал оюуны өмчийн холбогдох, хууль дүрмийг зөрчин "Шинэ Гёте” гэх нэрийг өөрийн нэр дээр бүртгүүлсэн нь түүний нөхөр болох Да.Ганболд Оюуны өмч, улсын бүртгэлийн ерөнхий газрын дарга асан Р.Содхүү нарын хийсэн хууль бус үйлдэл гэж үзэхэд хүргэж байна.

Ингээд зогсохгүй Ц.Оюун хүчингүй болсон шинэ Гёте сургуулийн тамга дэмдэгийг ашиглан бусдыг хууран мэхэлж, ашиг хонжоо олж, боловсролын байгууллагаар "тоглож” сууна. Түүний энэ "луйварын” гэмээр үйлдлийн цаана олон арван сурагч хүүхдүүд, эцэг эхчүүд хохирч байна.

Төр түмэн нүдтэй, төрсөн бие хоёр нүдтэй гэдэг.

Ц.Оюуны дур зоргоороо аашилж, хууль зөрчин, нөхрийнхөө нэр нүүрийг барж яваа энэ үйлдэл хууль шүүхийн байгууллагаар шалгагдаж эхлээд байна. Монголын шүүхийг авлига хахуульд идэгдсэн гэж зарим хүмүүё ярьдагч гэсэн олон арван хүүхдийн хувь заяагаар тоглож, тэднийг мөнгө орлого гэж харж байгаа Ц.Оюун шиг хүмүүсийн бусармаг үйлдлийн цаад шалтгааныг хууль шүүхийнхэн зөв харж, Да.ганболд мэтийн элдэв хөрөнгө мөнгө, нар хүндэээ ашиглаж шүүхэд нөлөөлөх гэсэн элдэв ятгалга, нөлөөнд авталгүйгээр шударга үнэн зөв шийдвэр гаргана гэдэгт Гёте сургуулийн олон арван сурагчдын эцэг эхчүүд нүдээ чилээн харж сууна.

Ц.Бат

Эх сурвалж:Tac.mn

More 257 0

Category: Нийгэм

Б.Наранхүү гишүүний ирц эрс сайжирчээ

2018/04/30

Б.Наранхүү гишүүний ирц эрс сайжирчээ

Author: saikhnaa on 30-04-2018, 18:21

УИХ-ын гишүүн Б.Наранхүүг гишүүнээс нь эгүүлэн татах асуудлаар хэсэг хуульчид өнгөрсөн оны арванхоёрдугаар сард Үндсэн хуулийн цэцэд хандсан билээ.

Хуульчид цэцэд хандах болсон үндэслэлээ "Үдсэн хуульд "Улсын Их Хурлын гишүүн бол ард түмний элч мөн бөгөөд нийт иргэн, улсын ашиг сонирхлыг эрхэмлэн баримтална” гэсэн байдаг.

Гэвч Б.Наранхүү гишүүн УИХ-ын чуулганы нэгдсэн хуралдаанд хангалттай суухгүй байгаа нь энэхүү үүргээ гүйцэтгэж чадаж байгаа эсэх нь эргэлзээтэй болоод байна” хэмээн тайлбарласан. Гэвч Үндсэн хуулийн цэцээс Б.Наранхүү гишүүнийг эгүүлэн татах боломжгүй гэсэн шийдвэр гарсан билээ.

Тэгвэл энэ оны хаврын чуулганы хуралдаанд Б.Наранхүү гишүүнийн ирц сайжирсан сайшаалтай мэдээ байна.

Хаврын чуулганы таван удаагийн нэгдсэн хуралдааны мэдээллээс харахад Б.Наранхүү гишүүн хоёр өдрийн хуралдаанд бүрэн сууж, нэг удаагийн хуралдаанд 20 минут хоцорч, нэг удаа тасалж, дөрөвдүгээр сарын 19-ний өдрийн чуулганы үдээс өмнөх хуралдаанд сууж, үдээс хойших хуралдааныг тасалжээ.

УИХ-ын гишүүдийн ирц 2017 оны намар болон хаврын чуулганы үеэр ямар байсан талаарх мэдээллийг бид өмнө нь хүргэж байсан. Эдгээр хуралдаанд хамгийн муу суусан гишүүдийг УИХ-ын гишүүн Б.Наранхүү тэргүүлж байсан юм. Тэрбээр УИХ-ын 2017 оны намрын чуулганд гэхэд ердөө 26.72 цаг буюу нийт хуралдааны 16 хувьд нь суусан байсан юм.

Ямартай ч хаврын чуулган нээлтээ хийснээс хойших дөрвөн хуралдааны мэдээллээс харахад Б.Наранхүү гишүүний ирц өмнөхөөсөө сайжирчээ.

Цэцийн шийдвэр гарсны дараа Хуульч Д.Миеэгомбо "УИХ-ын гишүүн чуулганд сууж байж л бүрэн эрхээ хэрэгжүүлнэ. Чуулганд суухгүй бол бүрэн эрхээ хэрэгжүүлж чадахгүй. Энэ асуудлаар эцсээ хүртэл явна” хэмээн байр сууриа илэрхийлж байсан юм.

Гишүүдийн ирц идэвхийн асуудал яригдаж байгаа үед ирцийг сайжруулах, хуралдааны дэг сахиулах, хариуцлага хүлээлгэхтэй холбоотой зохицуулалтыг боловсронгуй болгох зорилгоор УИХ-ын гишүүн Д.Хаянхярваа хоёрдугаар сарын 09-ний өдөр УИХ-ын чуулганы хуралдааны дэгийн тухай хуульд нэмэлт, өөрчлөлт оруулах тухай хуулийн төслийг өргөн барьсан юм.

Ирц хангалтгүй, санал хураалтын үйл ажиллагаа дэгийн дагуу явагдахгүй байгаа нь УИХ-ын нэр хүндэд сөргөөр нөлөөлж байгаа төдийгүй УИХ-ын үйл ажиллагааны үндсэн хэлбэр болох нэгдсэн хуралдаан, Байнгын хороод, нам, эвслийн бүлгийн хуралдаан хэвийн явагдах нөхцөлийг алдагдуулах болсон хэмээн хууль санаачлагчид үзэж байгаа ажээ.

Хуулийн төслийг санаачлагч УИХ-ын гишүүн Д.Хаянхярваа "УИХ-ын чуулганы хуралдааны дэгийн тухай хуулийн 10 дүгээр зүйл нь хуралдааны дэг, ёс зүйн зөрчил гаргасан гишүүнд ногдуулах хариуцлагыг зохицуулж, гишүүн хуралдаан тасалсан болон хоцорсон, бусад гишүүний өмнөөс санал өгсөн үйлдэлд нь ногдуулах хариуцлагыг орхигдуулсан гэж хууль санаачлагчид үзэж, хуульд өөрчлөлт оруулахаар болсон.

Хуулийн төсөл дээр төрийн байгуулалтын байнгын хорооны ажлын хэсэг ажиллаж байгаа. Тавдугаар сард багтаан УИХ-ын чуулганаар хэлэлцэгдэнэ гэсэн хүлээлт байна” гэсэн тайлбарыг өглөө.

Хуулийн төсөл батлагдсанаар дараах эерэг үр дагавар гарах юм.

Үүнд:

Улсын Их Хурал бүрэн эрхээ хэрэгжүүлэх үндсэн хэлбэр буюу чуулганы хуралдааны ирц сайжирч хуралдаан хэвийн явагдах нөхцөл бүрдэнэ.

Улсын Их Хурлын гишүүн нь хууль, Улсын Их Хурлын бусад шийдвэрийн төслүүдийг хэлэлцэн батлахдаа гагцхүү санал өгөх эрхээ зөвхөн өөрөө эдлэх бөгөөд энэхүү эрхээ бусдад шилжүүлэх, бусад гишүүний өмнөөс санал өгөхгүй байх нөхцөл бүрдэнэ.

Чуулганы хуралдаанд хүндэтгэн үзэх шалтгаангүйгээр хүрэлцэн ирээгүй, удаа дараа хоцорсон гишүүнд тодорхой төрлийн хариуцлага хүлээлгэхээс гадна

Улсын Их Хурлын гишүүний хоцорсон, тасалсан цагийн нийлбэр нь тухайн ээлжит чуулганы хуралдааны нийт хугацааны 1/3-д хүрснээр гишүүнийг эгүүлэн татах хариуцлагын тогтолцоо бүрдэх юм байна.

Хуралдаандаа суудаггүй, идэвх муутай гишүүдэд хариуцлага тооцох заалтыг тусгасан хууль батлагдвал хууль санаачлагчид хуулиа хэрхэн биелүүлэхийг харах л үлдлээ.

source: eagle.mn

More 212 0

Category: Улс төр

Б.Жаргалсайхан: Нэг хүн хагартлаа баяжаад, бусад нь ядуурдаг ийм тогтолцоог халах хэрэгтэй

2018/04/30

Б.Жаргалсайхан: Нэг хүн хагартлаа баяжаад, бусад нь ядуурдаг ийм тогтолцоог халах хэрэгтэй

Author: saikhnaa on 30-04-2018, 16:15

Ирэх сарын 4,5-ны өдөр Бүгд Найрамдах Намын онц их хурал болохтой холбогдуулж тус намын дарга Б.Жаргалсайхан мэдээлэл хийлээ.

Тэрбээр, мэдээллийнхээ үеээр "Улс оронд юу болж байгааг та бүхэн өөрсдөө харж байгаа. Монгол Улсын нийт гадаад өр зээлийн хэмжээ 27 тэрбумд хүрсэн байна. Хэн, хэдэн сарын хэдэнд, яаж энэ мөнгийг авсан юм бэ. Үүнийг ил болгох ёстой. Нийгмийн олон салбарт маш их хэр хэмжээнээс хэтэрсэн тогтолцоо үүссэн. 170 мянган оюутан сурж байна. Нийгмийн баялаг хэн бүтээх вэ. Бүгдээрээ дарга болох гэж байгаа юм уу? 180 мянган төрийн албан хаагчидтай. Манайх шиг 3 сая хүн амтай улс оронд ийм их дарга ямар хэрэгтэй вэ? Саяхан их сонирхолтой үйл явдал боллоо. Өмнөд Солонгос, Хойд Солонгосын ерөнхийлөгч 11 жилийн дараа уулзлаа. Өмнөд Солонгосын эрчимтэй хөгжил, Хойд Солонгосын зохион байгуулалт тэр улсыг маш хүчтэй улс болгох байх. Үүнтэй адилаар бидний цөөхөн Монголчууд улс төр, нийгмийн амьдралдаа идэвхтэй оролцох ёстой. Иргэн бүр улс эх орон, хөгжлөө гэсэн сэтгэлтэй байж гэмээн хөгжинө. Өнгөрсөн 27 жилийн нийгэм эдийн засгийн байдлаа бүгдээрээ нэг дүгнэж, цэгнэх цаг нь болсон. Муугаа ил гаргаж, хэрхэн сайжруулах талаар ярьж байж улс орон хөгждөг юм билээ. Мөн бид гадаад, дотоодын санхүүгийн эх үүсвэрүүдээ маш хариуцлагагүй үрж байна. Миний мэдхийн 500 мянгаар орон сууц босож байгаа. Ингээд орон сууцаа 2 сая 500-аар зарах гэж байна. Өөрөөр хэлбэл, 500 мянгаар орон сууц барьчихаад 8-10 дахин нэмж зарж байна. Тэгэхээр энэ асуудлуудыг бид яаралтай шийдэх ёстой. Энэ Улаанбаатар хотод байгаа хэнд ч хэрэггүй диплом өгдөг их, дээд сургуулиудыг хаах хэрэгтэй. Манай залуучууд дор хаяж 2-3 мэргэжилтэй байх ёстой. Өнөөдөр олон залуус гадаад гарах хүсэлтэй байгаа боловч хэлгүй. Тиймээс 10 жилийн боловсролын тогтолцоонд англи хэлийг оруулах ёстой. Бидний амьдралд дээр дооргүй хариуцлага, шударга ёс үгүйлэгдэж байна. Дарга нар хариуцлагагүй, шударга бус гэж их ярьж байна. Гэтэл иргэд бид өөрсдөө ямар байгаа билээ. Тэгэхээр бид одоо дээр дооргүй байгаа энэхүү шударга ёсны төлөө дүгнэж цэгнэж, ярих цаг нь болсон. Түүнчлэн хэвлэлийн эрх чөлөө үгүйлэгдэж байна. Манай хэвлэлийнхнийг бүгдийг нь худалдаж авч байна. Энэ өчүүхэн биеэ бид одоо хэд дахин, хэдэн удаа худалдах вэ? Иргэдийн нийгэм, улстөрийн идэвхийг нэмэгдүүлэх зорилготой. Улстөрийн намын хувьд, иргэний хувьд, намын даргын хувьд энэ асуудлуудыг бид одоо хэлэлцэж, ярилцах цаг нь болсон байх. Олон нийтийн хяналтын дор төр үйл ажиллагаагаа явуулах ёстой. Нийгэмд үгүйлэгдэж буй үнэн, худлаагийн заагийг тогтоож, ярих болсон. Тиймээс бидний зохион байгуулах гэж буй энэхүү ажилд та бүгдийг цаг заваа зориулан, идэвхтэй оролцохыг уриалж байна. Одоо ер нь хулгайч, дээрэмчдээсээ салах цаг нь болсон. Тэгэхгүй бол бид амар заяагаа үзэхгүй юм байна лээ. Нэг хүн хагартлаа баяжаад, бусад нь ядуурдаг ийм тогтолцоог халах хэрэгтэй. Үндсэн хуулийг өөрчлөхгүй ээ. Бас дахиад баахан хоолны савнууд суучихаад биднийг баллана. Иргэддээ улстөрийн мэдлэг, боловсрол олго л доо. Сонгуульд оролцох гэж буй хүмүүс 14 хоног фотошопоор зургаа засуулж тавихаа болих хэрэгтэй байна" гэв.

Х.Онон

http://www.zuv.mn/page/newsmore/18377

More 256 0

Category: Гол мэдээ / Улс төр

Цацрагийн аюулгүй ажиллагаатай холбоотой дүрмийг баталлаа

2018/04/30

Цацрагийн аюулгүй ажиллагаатай холбоотой дүрмийг баталлаа

Author: saikhnaa on 30-04-2018, 14:32

Монгол Улсын Ерөнхий сайд У.Хүрэлсүхийн ахалдаг Цөмийн энергийн комисс хуралдан "Цацраг идэвхт ашигт малтмалын олборлолт, боловсруулалтын цацрагийн аюулгүй ажиллагааны дүрэм”-ийг хэлэлцэн баталлаа.

Дүрэм нь олборлолт, боловсруулалтын хэвийн үед болон ашиглалттай холбоотой үүсч болзошгүй ослын нөхцөл байдалд цацрагийн шарлага үүсгэх, үйлдвэрлэлийн байгууламж барих, ашиглах болон ашиглалтаас гаргах, ашиглахгүй болсны дараа гарч болох цацрагийн эрсдэлээс хүн ам, байгаль орчныг хамгаалах зорилготой юм.

Мөн хүн ам, цацрагтай ажилладаг хүмүүсийн эрүүл мэнд, байгаль орчныг цацрагийн сөрөг нөлөөллөөс хамгаалах зорилгоор тулгамдсан асуудлыг шийдэх, холбогдох хууль тогтоомжийн хэрэгжилтийг хангуулах нөхцөл, боломжийг бүрдүүлэхэд чухал ач холбогдолтой гэж үзлээ.

Дүрмийн шаардлагыг цацраг идэвхт ашигт малтмалын олборлолт, боловсруулалт, туршилтын ажил эрхэлдэг байгууллагууд заавал дагаж мөрдөх үүрэгтэй юм. Өнгөрсөн оны 11 дүгээр сарын байдлаар хайгуулын 21, ашиглалтын есөн тусгай зөвшөөрөл бүртгэлтэй байна.

Цацрагийн хамгаалалт, аюулгүй ажиллагааны чиглэлээр аж ахуйн нэгжүүдэд жилд нэг удаа урьдчилан сэргийлэх сургалт зохион байгуулж байхыг Монгол Улсын Ерөнхий сайд, Цөмийн энергийн комиссын дарга У.Хүрэлсүх үүрэг болголоо.

Цөмийн энергийн комиссын дэргэдэх Эрдэмтдийн зөвлөл хуралдан Ураныг газрын дор хүчлээр уусган олборлох технологийн талаар зөвлөмж гаргасан байна. Цацраг идэвхт ашигт малтмалын олборлолт, боловсруулалт, хаалт, нөхөн сэргээлт болон хүн амын эрүүл мэнд, байгаль орчныг хамгаалахтай холбоотой дээрх зөвлөмжийг ашиглаж байхыг БОАЖЯ, УУХҮЯ, Мэргэжлийн хяналтын ерөнхий газар, Ашигт малтмал, газрын тосны газар, "Эрдэнэс Монгол” компани болон холбогдох аж ахуйн нэгжүүдэд чиглэл болгов гэж Засгийн газрын Хэвлэл мэдээлэл, олон нийттэй харилцах хэлтсээс мэдээллээ.

More 256 0

Category: Мэдээ мэдээлэл / Нийгэм

АТГ-ын дарга Х.Энхжаргал “УБТЗ”-ын дарга Д.Жигжиднямаад хариуцлага тооцох шаардлагыг салбарын сайдад хүргүүлсэн БАРИМТ-тай танилц!

2018/04/30

АТГ-ын дарга Х.Энхжаргал “УБТЗ”-ын дарга Д.Жигжиднямаад хариуцлага тооцох шаардлагыг салбарын сайдад хүргүүлсэн БАРИМТ-тай танилц!

Author: saikhnaa on 30-04-2018, 13:55

"Улаанбаатар төмөр зам” ХНН гэж 16 мянган ажиллагсадтай том байгууллагын үүх түүх хэдэн арван жилээр хэмжигдэнэ. Тэгвэл энэ их айл сүүлийн жил гаруйн хугацаанд "гэмт хэрэгт”-нүүдийн удирдлага дор чичрэх болсон тухай таагүй мэдээлэл дуулдах болсон билээ. Учиг зангилаа нь замын дарга Д.Жигжиднямаагийн дархлагдсан шийдвэрүүдтэй холбогдоно. Д.Жигжиднямаа "Улаанбаатар төмөр зам”-ын дарга болсныхоо дараахан эрүүгийн гэмт хэрэгт холбогдон шүүхээс ял шийтгэгдэж байсан хүмүүсийг хариуцлагатай албанд томилсон нь төмөр замын салбар төдийгүй нийгмийг цочроосон гэхэд болно. Ямартаа л "Монголын төмөр замын нэгдсэн холбоо”-ноос 2017 оны 1 дүгээр сарын 10-ны өдөр Ерөнхий сайд Ж.Эрдэнэбатад 04/17 тоотоор хүсэлт гаргаж, төмөр замчдыг айлгаж цочоосон 3 хүний томилгоог эргэж харахыг хүсч байжээ. Гэтэл тэрхүү ноцтой асуудал хөндсөн хүсэлтийг нь МАН-ын зарим улстөрчид "матаас” гэж тодотгоод, хэрэгсэлгүй орхижээ. Зүй нь бол Д.Жигжиднямаагаас хариуцлага асууж, түүнтэй болон түүний шийдвэрээр томилогдсон хүмүүстэй хариуцлага ярих ёстой байв.

Д.Жигжиднямаа 2015 онд 1.6 жилээр ял шийтгүүлж тэнсэнгээр эдэлж буй авлигын хэрэгтэн хүнийг Дотоод аудит хяналтын даргаар, 2008-2013 онуудад байгууллагын өмч залилангийн хэргээр 4 жилийн хорих ял шийтгүүлж байсан хүнийг Худалдан авалт хангамжийн даргаар, 1986 онд "Иргэдийн амины өмчийн их хэмжээний хулгай” хэргээр 6 жилийн хорих ялаар шийтгүүлж байсан хүнийг Хүний нөөцийн даргаар нам улстөрийн нэр барьж томилсон байдаг. Мэргэжлийн хүмүүс олон жилийн шударга хөдөлмөрийн үрээр хүрч болох албан тушаалд тээврийн салбарт ажиллаж байгаагүйн дээр эрүүгийн хэрэгт ял шийтгэгдэж байсан хүмүүсийг томилохдоо намын дарга М.Энхболдын нэрийг барьдаг байсныг төмөр замчид хэлж байгаа юм. Тэрчлэн хууль бус томилгоог хамтарсан нийгэмлэгийн Ерөнхий хорооны орлогч дарга Б.Цогтгэрэл, Замын дарга Д.Жигжиднямаа нар ил тод хийж, шинээр томилсон хүмүүс нь 16 мянган нягтарсан хамт олныг үл ойшоон бүтцийг өөрчлөх, мөрдөн шалгах, бүлгэрхэх аргаар хомроголон халсан тушаалыг 2017 оны 4 дүгээр сарын 4-нд гаргаж байсныг "Монголын төмөр замын нэгдсэн холбоо” мэдэгдэж байв.

Д.Жигжиднямаа нарын хүч нийлэн томилсон, гэмт хэрэгт шийтгэгдэж байсан хүмүүсийн талаар цухас өгүүлэх нь зөв болов уу.

Д.Жигжиднямаагийн ТОМИЛСОН "ялтай” хүмүүс!

УБТЗ-ын Дотоод Аудитын албаны даргаар томилсон Ж.Пунцаг гэж хүний тухайд Иргэний харьяалал, шилжилт хөдөлгөөний ерөнхий газрын хяналт шалгалтын улсын ахлах байцаагчаар ажиллаж байхдаа хээл хахуулийн хэргээр шалгагдаж шүүхээс 1 жил 6 сарын хорих ялаар шийтгүүлж байсан. Ж.Пунцаг нь 2014 оны 10 дугаар сарын 2-ны өдөр "Си Ар Си Жи девеломент Монголиа” ХХК-ийн орлогч захирал Жан Юү Шингээс 5 сая төгрөгийг орчуулагч Жя Рун Лингээр дамжуулан авсан үйлдэлдээ 2015 оны 1 дүгээр сарын 19-ний өдөр шүүхээс Эрүүгийн хуулийн тусгай ангийн 268 дугаар зүйлийн 268.1-д зааснаар 1 жил 6 сар хорих ял сонссон. Үүнээс өмнө Өвөрхангай аймгийн Бат-өлзий суманд цагдаагийн хэсгийн төлөөлөгчөөр ажиллаж байхдаа Өвөрхангай аймгийн сум дундын 1-р шүүхийн / Шүүгч Р.Шүрхүү, М.Төмөрбаатар, Б.Цэдэнбилэг нарын бүрэлдэхүүнтэй/ 2005 оны 05 дугаар сарын 24-ний өдрийн 1/38-Б тоот шийтгэх тогтоолоор Эрүүгийн 20110213 тоот хэрэгт Эрүүгийн хуулийн тусгай ангийн 90-р зүйлийн 90.1, 239-р зүйлийн 239.3-д заасан зүйл ангиар 2000 онд иргэн О.Уртнасангийн биед хүнд гэмтэл учруулсан, 2002 онд иргэн Ж.Шижир, Ш.Батнасан, М.Баясгалан нарт хүч, зэвсэг хэрэглэн танхайрсан үйлдэлдээ шүүгдэгч А.Баттөгс гэгчтэй хамт 3 жилийн хорих ял шийтгүүлэн, ял тэнсэгдэж байсан. Мөн Ж.Пунцаг нь цагдаагийн байгууллагад ажиллаж байх үедээ ЦЕГ-ын даргын 2006.03.24-ний өдрийн №115 тоот тушаалаар "Цагдаагийн байгууллагын гүйцэтгэх ажлын тухай нууцыг задруулсан” гэх үндэслэлээр цагдаагийн ахлах дэслэгч цолоо хураалган энгийнээр ажиллаж байгаад ЦЕГ-ын даргын тушаалаар цагдаагийн байгууллагаас халагдсан этгээд. Ж.Пунцаг нь Эрүүгийн хуулийн ерөнхий ангийн 78 дугаар зүйлд зааснаар 1,6 жилийн тэнсэн ялаа эдэлж дууссанаас хойш дахин хээл хахуулийн гэмт хэрэг үйлдээгүй бол 5 жилийн дараа ялгүйд тооцогдох ёстой хүн болохыг хэвлэлүүд мэдээлж байсан билээ.

УБТЗ-ын Хүнийн нөөцийн албаны даргаар томилсон Б.Оюунчимэгийн тухайд1986 оны 07 сарын 08-ны өдөр Сүхбаатар дүүргийн шүүхээс эрүүгийн хуулийн тусгай ангийн 109-р зүйлийн "Б”-д зааснаар 6 жилийн хорих ял шийтгэгдэж, ялаа биеэр эдэлж байгаад 1988.03.25-нд шүүх магадлангаар суллагдсан байна. БНМАУ-ын Эрүүгийн хууль /1961 он/ 109 дүгээр зүйл: "Иргэдийн амины хөрөнгийг хулгайлах”, 109.б: "Энэ гэмт хэргийг бүлэглэн,давтан…хохирогч этгээдэд их хэмжээний хохирол учруулсан” бол гэх хэргээр зүйлчлэгдсэн тэрээр социализмын үед залилан хийж 6 жилээр хоригдож байжээ.

УБТЗ-ын худалдан авалт, хангамжийн албаны даргаар томилсон Р.Зоригтын тухайд удирдсан байгууллагаа барьцаалан банкнаас зээл авч, хувьдаа завшсан хэргээр шүүхээс ял авч байжээ. "Үндэсний соёл амралтын хүрээлэн” НӨҮГ-ын захирлаар ажиллаж байхдаа Үндэсний соёл амралтын хүрээлэнгийн паркийн тоглоомыг шинэчилнэ гэх зориулалтаар өөрийн харъяа "Түмэн эх” чуулгын барилгыг барьцаалан Монгол шуудан банкнаас 150.000 ам.доллар зээлэн хувьдаа завшсаныг 2008 онд шүүх тогтоож 4 жилийн хорих ялаар шийтгэсэн байна. Гэвч 18 нас хүрээгүй хүүхэдтэй, анх удаа хүндэвтэр гэмт хэрэг үйлдсэн, буруугаа хүлээн зөвшөөрсөн үндэслэлээр Өршөөлийн хуульд хамрагдан суллагдаж байжээ.

Хэвлэлүүд өнгөрсөн хугацаанд нэр бүхий эдгээр хүмүүсийн талаар мэдээлж байсан. Тэгвэл АТГ-ын дарга, тэргүүн комиссар Х.Энхжаргал ял шийтгэгдсэн Ж.Пунцаг гэж хүнийг томилсон Д.Жигжиднямаад хариуцлага тооцуулах, хуулийн хэрэгжилт хангуулах тухай албан бичгийг 2017 оны 5 дугаар сарын 30-нд Зам тээврийн хөгжлийн сайд Д.Ганбатад хүргүүлж байсан баримтыг хүргэж байна.

Албан бичигт:

Зам тээврийн хөгжлийн сайд Д.Ганбат танаа...

2017 оны 5 дугаар сарын 30

Хариуцлага тооцуулах, хуулийн хэрэгжилт хангуулах тухай

"УБТЗ” ХНН-ийн дарга Д.Жигжиднямаагийн 2016 оны 10 дугаар сарын 20-ны өдрийн Б-I-253 дугаар тушаалаар Жигжидсүрэнгийн Пунцагийг Дотоод, аудит, хяналтын албаны даргаар томилсны дараа хувийн ашиг сонирхлын урьдчилсан мэдүүлгийг хянуулахаар ирүүлсэн нь Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн 23 дугаар зүйлийн 23.5-д заасныг зөрчсөн, түүнчлэн Ж.Пунцаг нь Хээл хахууль авах гэмт хэрэг үйлдэж, ял шийтгэгдсэн, ялгүйд тооцох хугацаа дуусаагүй, ажлын байрны тодорхойлолтын шаардлага хангахгүй байхад тухайн албан тушаалд томилсон байх тул дээрх хуулийн 23 дугаар зүйлийн 23.7 хэсэгт заасныг хэрэгжүүлж ажиллах талаар тус газраас 2017 оны 3 дугаар сарын 23-ны өдөр 05/2768, мөн оны 04 дүгээр сарын 14-ний өдөр 05/3523дугаартай албан бичгүүдийг "УБТЗ” ХНН-ийн дарга Д.Жигжиднямаад хүргүүлсэн боловч Ж.Пунцагийг одоо хүртэл уг албан тушаалд ажиллуулсаар байна.

Баянгол, Хан-Уул, Сонгинохайрхан дүүргийн Эрүүгийн хэргийн анхан шатны шүүхийн Тамгын газрын 2017 оны 3 дугаар сарын 10-ны өдрийн 104 дугаартай, Нийслэлийн эрүүгийн хэргийн давж заалдах шатны шүүхийн Тамгын газрын мөн оны 02 дугаар сарын 22-ны өдрийн 61 дүгээр албан бичгээр тус тус ирүүлсэн лавлагаагаар Иргэний харьяалал, шилжилт хөдөлгөөний ерөнхий газрын хяналт шалгалтын улсын ахлах байцаагчаар ажиллаж байсан Ж.Пунцаг нарт холбогдох эрүүгийн хэргийг 2015 оны 1 дүгээр сарын 19-ний өдөр Дүүргийн Эрүүгийн хэргийн анхан шатны 2 дугаар шүүхээс хянан хэлэлцээд 79 дүгээр шийтгэх тогтоолоор шүүгдэгч Ж.Пунцагт хээл хахууль авсан гэм буруутай үйлдэлд нь Монгол Улсын Эрүүгийн хуулийн тусгай ангийн 268 дугаар зүйлийн 268.1 дэх хэсэгт зааснаар тодорхой албан тушаал эрхлэх, үйл ажиллагаа явуулах эрхийг 2 жилийн хугацаагаар хасч, 1 жил 6 сарын хугацаагаар хорих ялаар шийтгэсэн, энэхүү шийтгэх тогтоолыг 2015 оны 2 дугаар сарын 26-ны өдөр Нийслэлийн Эрүүгийн хэргийн давж заалдах шатны шүүхэд хянан хэлэлцэж 141 дүгээр магадлалаар Эрүүгийн хуулийн 61 дүгээр зүйлийн 61.1, 61.4 дэх хэсэгт заасныг журамлан Ж.Пунцагт оногдуулсан төрийн албанд ажиллах эрхийг 2 жилийн хугацаагаар хасч, 1 жил 6 сарын хугацаагаар хорих ялыг тэнсэж, 2 жилийн хугацаагаар хянан харгалзаж, түүний засрал хүмүүжилд хяналт тавихыг Баянзүрх дүүргийн Цагдаагийн 2 дугаар хэлтэст хариуцуулах нэмэлт заалт тогтоолд оруулж шийдвэрлэсэн байна.

Хээл хахууль авах гэмт хэрэг үйлдэж ял шийтгэгдсэн, Монгол Улсын Эрүүгийн хуулийн ерөнхий ангийн 78 дугаар зүйлд заасан ялгүйд тооцох хугацаа дуусаагүй, ажлын байрны тодорхойлолтын шаардлага хангаагүй Ж.Пунцагийг хяналт шалгалт хийж, эрсдэлийг тогтоох, дүгнэлт гаргах үндсэн чиг үүрэгтэй Дотоод аудит, хяналтын албаны даргаар томилсон байгаа нь албан тушаалын эрхлэх асуудлын хүрээнд албаны бүрэн эрхээ хэрэгжүүлэх үед Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн 3 дугаар зүйлийн 3.1.3-т заасан "нийтийн албан тушаалтан албаны бүрэн эрхээ хэрэгжүүлэх үед түүний хувийн ашиг сонирхол нийтийн ашиг сонирхолтой зөрчилдөх болон албан үүргээ тэгш, шударгаар хэрэгжүүлэхэд харшаар нөлөөлж болохуйц нөхцөл байдал”-ыг бий болгож байна.

Түүнчлэн хээл хахууль авах гэмт хэрэг үйлдэж шүүхээр ял шийтгэгдсэн, ялгүйд тооцох хугацаа дуусаагүй байсан, тухайн ажлын байрны тодорхойлолтын шаардлага хангахгүй байгаа Ж.Пунцагийн удирдах албан тушаалд томилсон нь ашиг сонирхлын зөрчил үүсгэж байгаа талаар тус газарт "Монголын төмөр замчдын нэгдсэн холбоо” ТББ, иргэдээс удаа дараа өргөдөл, гомдол ирүүлсээр байна.

Иймд Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн 23 дугаар зүйлийн 23.7-д /Нийтийн албанд томилогдохоор нэр дэвшсэн этгээд тухайн албан үүргийг гүйцэтгэхэд илт ашиг сонирхлын зөрчил үүсч болох нь тогтоогдсон бол түүнийг тухайн албанд томилох эрх бүхий байгууллага, албан тушаалтан томилохоос татгалзах үүрэгтэй/ заасныг зөрчиж томилгоо хийсэн "УБТЗ” ХНН-ийн дарга Д.Жигжиднямаад мөн хуулийн 29 дүгээр зүйлийн 29.2.3-т /... энэ хуулийн 23.7-д заасныг зөрчиж илтэд ашиг сонирхлын зөрчилтэй этгээдийг албан тушаалд томилсон, ... бол албан тушаалыг нь бууруулах/ зааснаар хариуцлага тооцож, Ж.Пунцагийг томилсон хууль бус шийдвэрийг хүчингүй болгох арга хэмжээ авч Авлигын эсрэг хуулийн 6 дугаар зүйлийн 6.6-д зааснаар 2017 оны 6 дугаар сарын 8-ны өдрийн дотор хариу ирүүлэхийг хүсье.

Хувийг, Төрийн өмчийн бодлого зохицуулалтын газар, "УБТЗ” ХНН-ийн Ерөнхий хороонд.

Дарга, Тэргүүн комиссар Х.Энхжаргал. гэжээ.

Тэгэхээр АТГ-аас хариуцсан яамны сайдад ийм албан бичгийг хүргүүлж байж. Харин сайд Д.Ганбат "УБТЗ” –ын дарга Д.Жигжиднямаагийн даварсан үйлдэлд хариуцлага тооцолгүй өнгөрчээ.

Тэрчлэн өөрсдийнх нь хууль бус үйлдлийг эсэргүүцсэн "Монголын төмөр замын нэгдсэн холбоо”-ны үйл ажиллагааг хясан боох үйлдлийг Д.Жигжиднямаа хийж иржээ. Уг нь бол "Монголын төмөр замын нэгдсэн холбоо” нь салбарынхаа бүхий л нарийн ширийнийг мэддэг хүмүүсээс бүрдсэн жинхэнэ мэргэжлийн байгууллага. Төмөр зам дахь осол аваар, гэмтэл бүхий л асуудлыг нарийвчлан тогтоож чаддаг хүмүүс тэнд бий. Түүнчлэн салбарынхаа хүмүүсийг чадавхжуулах тал дээр ажиллаж ирсэн байгууллага. Гэтэл Д.Жигжиднямаа дарга тус холбооны үйл ажиллагааг хясах арга хэрэглэж дараах мэдэгдлийг хүргүүлж байжээ.

Мэдэгдэлд:

Монголын төмөр замын нэгдсэн холбоонд

"УБТЗ” ХНН болон Монголын төмөр замын нэгдсэн холбоо хоёрын хооронд байгуулсан АИГ/15/065 дугаар "Мэргэжлийн сургалт зохион байгуулах тухай” гэрээ нь Иргэний хуулийн 202.3.1-д зааснаар "нөгөө талд хоёроос илүү жилийн хугацаагаар үүрэг хүлээлгэж байгаа хүчин төгөлдөр бус заалт” оруулсан тул гэрээг цуцлах болсныг үүгээр мэдэгдэж байна.

Дарга Д.Жигжиднямаа: гэсэн байгаа юм. Зүй нь бол мэргэшсэн байгууллагатайгаа л хамтрах ёстой. Гэтэл мэргэшсэн давуу талыг нь үл огоорч, илүү хугацаанд хамтарч ажиллалаа гэсэн утгагүй шалтгаанаар гэрээгээ зөрчих үндэслэл болгосон байгаа нь, Д.Жигжиднямаа даргын хувийн ашиг сонирхолд хөтлөгдсөн шийдвэр болж харагдаж буй юм.

Монголын төмөр замын нэгдсэн холбоо гэж байгууллага ямар чухал ач холбогдолтой газар болохыг дараах албан бичгээс эрхбиш ойлгож болох юм. "Төмөр замын тээвэр дэх осол, гологдлыг судлан бүртгэх журам”-ын төсөлд саналаа ирүүлэхийг тус холбооноос хүссэн яамны бичгийг эрхэм та харж байна. Энэ бол тус холбоо салбартаа үүрэгтэй, хариуцлагатай байгууллага гэдгийг илтгэнэ. Харин Д.Жигжиднямаа дарга үүнийг нь мэдэж буй ч, санаатайгаар үгүйсгэж сууна. Ял шийтгэлтэй хүмүүсийг хариуцлагатай албуудад томилж, салбараа муухай харагдуулж буйг нь шүүмжилсэн мэргэжлийн холбоонд тэрээр үйлдлээрээ эсэргүүцэл үзүүлж иржээ.

Мөн энэ дашрамд, Монголын Төмөр Замын Инжежерүүдийн Нэгдсэн Холбооны мэдэгдлийг хүргэж байна. Тус мэдэгдлээс ишлэн хүргэхэд:

НЭГ. Манай салбарыг Нам дамжсан, Засагт шургасан хэсэг бүлэг хүмүүс сүүлийн 8 жил авч явлаа. Одоо тодорхой намын нэрээр томилогдсон нэр бүхий Зам, тээврийн хөгжлийн сайд Д.Ганбат, дэд сайд Б.Цогтгэрэл, Зөвлөх Д.Манлайбаяр, газрын дарга Б.Артур, МТЗ ТӨХК-ийн Гүйцэтгэх захирал Х.Хэрлэн, УБТЗ-ын дарга Д.Жигжиднямаа гэсэн хүмүүс төмөр замын хувь заяаг хариуцах болсныг мэдэгдэж байна.

ХОЁР. Эдгээр хүмүүсийн өмнөөс байнгын улстөрийн субьект хариуцлага хүлээдэг болохыг сануулахын зэрэгцээ тэдний хийж бүтээсэн үйл хэрэг, төмөр замын хөгжил дэвшилд оруулсан хувь нэмрийн талаар ард түмэндээ ил тод хүргэх, цаашдын үйл ажиллагаа, бодлого хөтөлбөр, төлөвлөгөө, ажлын арга барилд үнэлгээ дүгнэлт өгч, олон нийтэд ойлголт мэдээлэл өгөх чиглэлээр хамтарч ажиллахаа илэрхийлж байна.

ГУРАВ. Монголын сонгогчид нь 2017 ба 2020 онуудад мэдээлэлтэй, өөрсдийн саналтай байх, төмөр замын мэргэжлийн байгууллагууд мэргэжилтэнгүүд нь үүрэг зорилго, үйл хэргээ мэдэх, ажилчид албан хаагчид нь ажил амьдралын баталгаатай болох тэр нийгмийн хариуцлагыг манай салбарыг удирдах болсон Нам, засгаас асуудаг болохыг төр засгийн байгууллагуудад уриалж байна гэсэн байгаа юм.

Тэгэхээр эдгээр баримтуудаас үзэхэд Д.Жигжиднямаа гэж хүн УБТЗ-ын даргын хариуцлагатай ажлыг хийх хууль эрх зүйн чадамжгүй, хариуцлагагүй этгээд болох нь харагдаж байна.

Э.Болд

More 309 0

Category: Гол мэдээ / Шар мэдээ

Ай.Төмөр-Очироос С.Баярт бичсэн гунигт захидал

2018/04/30

Ай.Төмөр-Очироос С.Баярт бичсэн гунигт захидал

Author: saikhnaa on 30-04-2018, 12:42

Соёлын гавьяат зүтгэлтэн, яруу найрагч Ай.Төмөр-Очир Ерөнхий сайд асан С.Баярт хандан захидал бичсэнээ цахим хуудастаа байршуулжээ. Захидлыг бүрэн эхээр нь хүргэж байна.

Үрэнхий гайт гунигт гуай муугийн ёс биш Монголын ёс САЙН БАЙНА УУ л гэхээс дээ. Та ганцаар идсэн ГАХАЙ таргалахгүй гэж мэдэхгүй юү . Хөрөнгөө тат гэж ЧӨТГӨР чамд шивнэхгүй байна уу . Амь нас ХАУС – ууд хоёрын чинь аль нь үнэтэй байдаг юм . Ингэж тамд хэвтэж байх чамд сайхан уу .

Амьтны хараал идээд цаддаггүй ээ . Ичих айх . санах сэрэх мэдрэмж алга уу . Ер өмхий гайт С.Баяр аа. Нас чинь хэд билээ . Яс чинь хэнийх билээ . Цус чинь ямар билээ . Аав ээжийн нэр хугарах .алаг үрсийн нүүр хагарах хамаагүй юу . Мөнгөтэй хүн мөнхрөхгүй ээ . Үхэхдээ үүрээд явахгүй ээ … гэж О.Дашбалбар хэлсэн юм .

Чи бол үүрээд л явах нь л дээ . Ханаж цаддаггүй хар мангас цадаж ханадаггүй цагаан шулам болжээ би гэж бодогдохгүй байна уу . Өөрийнхөө дотор хүнтэйгээ ярьж үзэв үү . Өрнө дорны доторх хүмүүстэй бол их л шивнэлдсэн хүн шүү .чи . Та … Өөртэйгээ нэг шивнэлдэж үзээрэй .хө

Үхэх хүнд үг хэрэггүй ээ гэдэг .Тэгвэл бас үг бүү хэл үр хүүхэд чинь ч хэрэггүй шүү дээ .
Үхэл ямар нуруу төөлж шүд татах биш . Алдар нэр албан тушаал асуух биш . Авгай хүүхэн аль бүхэнтэй альбинтаж явсаныг чинь … гайхах л байх аа .

Баяраа Үнэн чамаас дэндүү хол үхэл дэргэд чинь өнгийж байна шүү .хө Одоо болно доо . Хүний буян худгийн ус хоёр хэмжээтэй дээ .
Түүх бузарлаж түмний хараал хүлхэж хэвтэх сайхан байна гэж үү . Үхсэн хойно чинь үрсийн чинь мөр дээрх мөс ус болж гэсээд хэдэн үеэрээ тэд хүний өөдөөс харахааргүй болж байгаа юм биш үү .

Үхсэний дараа ч хүнд нэр төр гэж байдаг .
Ард түмэн их ч итгэсэн .Чи биднийг тэднийг хулхидсан . Итгэл даагаагүй ээ .Тэр ч бүү хэл чи эх орноосоо урвасан . Олон ч торойнуудыг дагуулсан .Тэд чиний л мөрөөр сажилсан .

Авдарт багтахгүй мөнгө чинь авсанд багтахгүй зовлон болж чи тамд уналаа . Тамын тогооны ёроолоос чи хашгир .таван тивийн доншуучдад монголыг зарж идсэн нүгэл чинь хангалттай . Нүгэл нүдээрээ гардаг гэлцдэг .

Тэгвэл таны нүгэл нүх болгоноор чинь гоожиж дуусавч тоочиж баршгүй билээ . Санаа сохор бол нүд сохор . чих дүлий . хамар таглаатай . халуун хүйтнийг ч эс мэдэрнэм .

МЭДРЭМЖ МУУТАЙ МЭЛТИЙЖ ЯВСНААС
МЭДРЭЛИЙН ЭМНЭЛЭГТ ГӨЛИЙЖ ХЭВТЭЭРЭЙ … гэж нэгэн эрхэмд би хэлж байсан юм .
Энэ үг өөрт чинь энэ удаа яг таарч яв цав дүйлээ . Бод бод … хө .Чи дутуу л бодоод байна үү .

Шоронгийн ханаар шоргоолж гүйнэ үү . Түүнээс асуу . – Би ер нь юуг хэзээ яасан юм бэ …гэж асуу даа . Тэр чамд таарсан хариуг чинь өгнө өө .
Санж ийн Баяраа чи манжийн баяр болсон шүү . Хүн хэдий ухаантай ч хэлэхээс наашгүй санахгүй . цаас хэдий нимгэн ч чичихээс нааш цоорохгүй .

Баяр аа .Чи өнгөрснөө эргээд нэгэнтээ харна уу . Бага залуу нас .бартаа даваатай амьдрал . балгаж . салгаж .гулгаж тэшиж явсан үе чамд байгаа шүү .

Дандаа дурдан бүсээр даллуулаад .дардан замаар давхиулаад . хурдан морь шиг дүүлүүлээд байгаагүйг чинь түмэн олон мэднэ дээ .Эр хүн эр хүндээ хайртай би тэр болгоныг бичихгүй ээ .

Дөчин мянгатын дошин дээрх бурхи явсанаараа асуудалд хандаад байвал ард олон чамайг мөндөл байтугай болгоно шүү .Одоо чи хавханд оржээ . Мөнгөө төлөөд хавхнаасаа мултарч чадахгүй юу .

Тэгвэл одоо хавхандаа үхсэн тарвага л болж таарах нь дээ . Төр чамайг нудрах сонирхолгүй дээ .Чиний амь уг нь өөртөө . үр хүүхдүүддээ л хэрэг болмоор юм . Тэрнээс бусдад бол гөлөгний байтугай гөлчгийний үнэгүй шүү дээ .

Мөнгөний бузраас болж олон сайхан хүн үхэлд мордоцгоосон доо . Тэднийг нэрлэж үлдэгсэдийнх нь нүүрийгг түлж . чихийг халууцуулалтай нь биш дээ .

Энэ захидалыг би элэгнийхээ цусаар бичиж байна . Санжийн БАЯР ын сайн дүү нар сайхан ” гүү ” нүүд болох Ч Сайханбилэг . С .Баярцогт нараа та нар ч гэсэн таарсан таар шуудайнууд ажээ .

Улс төрд уучлалт гуйх … гэж том гарц байдаг юм шүү .
Амьнаас үнэтэй авилга . ард түмнээс үнэтэй харийнхан байна гэж би итгэхгүй л байна шүү . Орон гүрний хойморт завилж явсан та нар өнөөдөр шорон гяндангийн ёроолд ” шавьж ” болж хэвтэх ч гэж дээ …

Улс төрийн бузраас болж ухаанд чинь ухна ишиг үхчихээгүй бол ухаараач .Үүнийг эс ухаарваас сүүдэр чинь мөөрөх .сүнс чинь төөрөх болно шүү .

Хүний нохойд хаях … аар өөрийн нохойд өг гэдэг үгийг чи мэдэх үү .Монголын ард түмний баялагийг харьд аваачиж овоолчихоод чи амар тайван сууж яаж чадаж байна аа . Үгүй ээ. Ингэхэд чи ер монгол уу .

Миний ард түмэн чинь тэнгэр шиг уудам сэтгэлтэй зон олон шүү .Чамайг зөв ухаарвал тэврээд уйлах ч энүүхэнд шүү .
Эр хүн алдаал биз .Эрэг нэг нураа л биз …

Заан хэдий том ч том ч
Замын аясыг дагадаг
Жанжин хэдий том ч
Олны аясыг дагадаг юм.

Хорвоо гэдэг уужим шүү .
Хожгор толгой чинь л мэдэж дээ .

Баяртай . Баяр аа. ҮРЭНХИЙ ГАЙТ АА.

Ард түмнээ төлөөлж алаг сарваа шиг арван хуруу цуцаан . ардаг бодолтой арслан тэргүүнээ агсчин байж тэрлэсэн
ЯРУУ НАЙРАГЧ . СЭТГҮҮЛЧ ЗОРИГТНУУД ОВОГТ АЙЛТГҮЙН ТӨМӨР ОЧИР

Хаврын адаг улаан луу сарын шинийн наймны төмөр суудалтай улаан нохой өдөр ЯРГИЖ БИШ БОРГОЖ тэрлэвэй .

2018 – 04 – 24

More 371 0

Category: Гол мэдээ / Улс төр

ГОЛЫН ЭРЭГ ДАГУУ ОЛГОСОН ЗАРИМ ГАЗРЫГ ЧӨЛӨӨЛӨХ АСУУДАЛ ЯРИГДАЖ БАЙНА

2018/04/30

ГОЛЫН ЭРЭГ ДАГУУ ОЛГОСОН ЗАРИМ ГАЗРЫГ ЧӨЛӨӨЛӨХ АСУУДАЛ ЯРИГДАЖ БАЙНА

Author: saikhnaa on 30-04-2018, 12:03

Найман жилийн тэртээ Сүхбаатар дүүргийн удирдлагууд санаачлан Улаанбаатар хотын дундуур урсдаг Сэлбэ голын урсацыг сайжруулах төсөл хэрэгжүүлж эхэлсэн байдаг. Энэ төслийн хүрээнд усан сан байгуулж, ойр орчимд нь ногоон байгууламж, цэцэрлэгт хүрээлэн бий болгох байв. Улмаар 100 айлын гүүрнээс урагш АНУ-ын ЭСЯ-ны урд талын гүүр хүртэл тохижилтын ажил хийсэн. Гэхдээ төслийн хэрэгжилт төсөөлсөн хэмжээнд хүрээгүй нь үнэн. Хэсэгхэн зурвас газрыг хальт тохижуулсан болоод нөгөө хэсгийг нь зөнд нь орхисон дүр зурагтай олон оныг үдлээ. Харин хотын одоогийн удирдлагууд Сэлбэ голын хувь заяанд Худалдаа, хоол үйлдвэрлэл, үйлчилгээний салбарыг хөгжүүлэх, нэгдсэн стандартад оруулах зорилготой дэд хөтөлбөрийг НИТХ-аар баталлаа. "Худалдаа, хоол үйлдвэрлэл, үйлчилгээ-2020” дэд хөтөлбөр 2020 он хүртэл хэрэгжинэ. Энэхүү хөтөлбөрт нийт 365 сая төгрөг зарцуулахаар төлөвлөсөн байна. Энэ хугацаанд худалдаа, хоол үйлдвэрлэлийн салбарын стандартыг шинэчилэх, гарааны бизнесийг дэмжих зөвлөх үйлчилгээний хүртээмжийг нэмэгдүүлэх ажлыг зохион байгуулах аж.

Улсын хэмжээнд тус салбарт 70 гаруй мянган аж ахуйн нэгж, байгууллага үйл ажиллагаа явуулж байгаагаас нийслэлд 34.5 мянга нь ажиллаж байна. 1990 оноос хойш худалдаа, хоол үйлдвэрлэлийн салбарын бодлого алдагдаж, мэргэжлийн боловсон хүчний хомсдолд орсон гэдгийг мэргэжилтнүүд хэллээ. дахин анхаарч, тохижилтын ажил эхлүүлэхээр 2017 онд зураг төс- лийг нь баталсан. Улмаар урин дулаан цаг ирэхтэй зэрэгцэн Сэлбэ голын МУБИС орчмын хэсэгт гүүр барихаар газар шорооны ажилдаа оржээ. Мөн Арслантай гүүрнээс урагш Натур төвийн урд талын гүүр хүртэлх хэсэгт тохижилтын ажил хийхээр төлөвлөөд байна. Хөрөнгө санхүү нь шийдэгдсэн гэнэ. Энд хийгдэж буй ажил болон төслийн хүрээнд хийгдэх зүйлийн талаар албаны хүмүүсээс тодрууллаа. Нийслэлийн зураг төслийн хүрээлэнгийн газрын ерөнхий инженер Ж.Баясгалан "1400 метр зайд боомт бүхий тунгаагуур, үүнээс цааш Нарны зам хүртэл тохижилт болон усны барилга байгууламжийн ажлын зураг хийгдсэн байгаа. Төсөв мөнгө нь ойролцоогоор 50 гаруй тэрбум төгрөг болсон. Үүнд Улаанбаатар хотоор урсаж буй Туул, Сэлбэ голын бүхий л хэсэг багтсан” гэсэн хариулт өглөө. Харин нийслэлийн Байгаль орчны газрын усны асуудал хариуцсан мэргэжилтэн Ч.Дамбасүрэн "Энэ жил Сэлбэ голын хүрээнд булгийн эхийг тохижуулж, хамгаална. Тиймээс хоёр мянган га газрыг орон нутгийн тусгай хамгаалтад авсан. Тэр орчимд явган хүний аюулгүй байдлыг хангаж, тохижуулах зорилготой ажиллаж байна” гэв.

Арслантай гүүрнээс Натур төвийн гүүр хүртэлх хэсгийг тохижуулна

Сэлбэ голын урсацыг нэмэгдүүлж, орчныг сайжруулахын тулд голын эх болон ойр орчмын цутгал гол, булаг шандуудыг 2003 оноос хамгаалж ирсэн. Одоогоор Чингэлтэй дүүргийн нутаг дэвсгэрт тав, Сүхбаатар дүүргийн нутагт найман булаг, шандыг хамгаалалтад авчээ. Мөн 2016 онд онцгой болон энгийн хамгаалалтын бүсэд амьдарч буй айл өрхийн судалгааг хийсэн. Судалгаан дээр үндэслээд зарим хэсгийг чөлөөлөх асуудал яригдах юм байна. Энэ жил үүнээс гадна Дарь-Эхийн Ганц худгийн харалдаа тусгай шүүлтүүр бүхий тунгаагуур хийхээр төлөвлөсөн байна. Нийслэл хөрөнгө гарган тохижуулалт хийсэн ч тухайн газарт нь хог хаягдал хуримтлагддаг. Харин тунгаагуур хийснээр дээрээс урсаж ирсэн хог хаягдлыг шүүж, хотын төврүү цэвэр ус урсгах юм. Хотын өнгө үзэмжийг сайжруулах байтугай гундааж байсан Сэлбэ голыг сэргээж тохижуулах ажил дахин хийгдэж эхэлсэн нь сайшаалтай. Гэхдээ төслийн хүрээнд яг хэдэн төгрөгийн ажил хийгдэх, энэ мөнгийг хаанаас хэрхэн гаргах нь тодорхойгүй байна. Холбогдох байгууллагууд үүнд анхаарлаа хандуулж урин дулааны цагт ажлаа амжуулаад авбал сайнсан.

ЭХ СУРВАЛЖ: ЗАСГИЙН ГАЗРЫН МЭДЭЭ

More 223 0

Category: Гол мэдээ / Нийгэм

Шаардлага хангахгүй орчинд хоол, цайны үйлчилгээ эрхлэх нь сурагчдад эрсдэлтэй

2018/04/30

Шаардлага хангахгүй орчинд хоол, цайны үйлчилгээ эрхлэх нь сурагчдад эрсдэлтэй

Author: saikhnaa on 30-04-2018, 11:41

Нийслэлийн Засаг дарга бөгөөд Улаанбаатар хотын Захирагчийн 2016-2020 оны үйл ажиллагааны хөтөлбөрийн 4.1.9-д "Сургууль, цэцэрлэгийн хоол үйлдвэрлэл, үйлчилгээний загвар" төсөл хэрэгжүүлж, "Үдийн цай” хөтөлбөрийн хэрэгжилтийг хангаж, эрүүл, баталгаат хоол хүнс хэрэглэх нөхцөл бүрдүүлнэ” гэж заасан.

Дээрх хөтөлбөрийн хүрээнд Нийгмийн хөгжлийн асуудал хариуцсан төслүүдийн удирдагч-Нийслэлийн Засаг даргын орлогч Ш.Анхмаагийн санаачлагаар НЗДТГ, нийслэлийн Боловсролын газар, ШУТИС-тай хамтран энэ сарын 25-ны өдөр 84 дүгээр сургууль дээр "Сургуулийн хоол үйлдвэрлэл, үйлчилгээний систем” хэлэлцүүлгийг зохион байгууллаа.

Тус хэлэлцүүлгийн зорилго нь сургуулийн хоол үйлдвэрлэл, үйлчилгээний чанарыг сайжруулах, стандарт шаардлагад нийцсэн сургуулийн өдрийн хоолоор үйлчлэхэд цаашид авах арга хэмжээний зөвлөмж боловсруулж холбогдох байгууллагуудад хүргүүлэхэд оршино.

Хэлэлцүүлэгт УИХ-ын гишүүн Б.Ундармаа, Нийгмийн хөгжлийн асуудал хариуцсан төслүүдийн удирдагч-Нийслэлийн Засаг даргын орлогч Ш.Анхмаа, нийслэлийн Боловсролын газрын дарга Ж.Гантулга, ШУТИС, ҮТС-ийн эрдэмтэн нарийн бичгийн дарга М.Пүрэвжав, НЗАА, НМХГ, НЭМГ, НӨХГ, НХХААГ, Дүүргүүдийн Худалдаа үйлчилгээ, Боловсрол, Мэргэжлийн хяналтын хэлтэс, ОНӨААТУҮГ-ын дарга, холбогдох мэргэжилтнүүд, ЕБС-ийн захирлууд, сургуулийн гал тогоо түрээслэгчдийн төлөөлөл оролцож үдийн цайны хэрэгжилт, тогтолцоог сайжруулах тал дээр санал бодлоо солилцон, цаашид үдийн цайг үдийн хоол болгох боломж, хооллолтоор дамжуулан хүүхдийн бие махбодын болон оюун ухааны хөгжлийг дэмжиж, бие, сэтгэхүйн хувьд эрүүл иргэнийг төлөвшүүлэх, цаашид тулгамдсан асуудлуудын талаар харилцан ярилцаж, хэлэлцүүлэг хийлээ.

Манай улс 2006 оноос "Үдийн цай” хөтөлбөр хэрэгжүүлж байгаа боловч нийслэлийн сургуулиудын 86.7 хувь нь "Үдийн цай” хөтөлбөрийн хүрээнд халуун хоолоор үйлчилж байна. Гэвч шаардлага хангахгүй орчинд хоол, цайны үйлчилгээ эрхлэх нь сурагчдын эрүүл мэндийг эрсдэлд оруулах аюултай.

Улс үндэстний хүнсний хангамж, аюулгүй байдал, хоол тэжээлийн асуудал нь нийгмийн тогтвортой байдал, эдийн засаг, тусгаар тогтнолын нэгэн баталгаа тул төрийн бодлогын үндсэн чиглэлийн нэг хэмээн үздэг. Хоол хүнс нь хүний дотор эрхтэнд төдийгүй бүх бие, тархинд, цаашилбал үр удамд дамжин нөлөөлдөг хүний нийгмийн оршин тогтнохын үндэс учир үндэсний аюулгүй байдлын чухал үзүүлэлтийн нэг юм.

Хоол хүнсний илчлэг болон тэжээллэг чанар, зөв зохистой хооллолт, хүнсний бүтээгдэхүүний өртгийг тооцох талаар сургуулийн удирдлага, хөтөлбөр хариуцаж байгаа багш, ажилчдын мэдлэг дутмаг, буруу ойлголттой байгаас хоол хүнсний хэмжээ чанар, хүнсний аюулгүй байдлыг хэрхэн хангаж байгааг анхаардаггүй, бүтээгдэхүүний бодит болон нийлүүлж буй өртгийн зөрүүг тооцдоггүй асуудлууд үүсэж байна.

Өнөөдрийн хэлэлцүүлгээс үдийн цайтай холбоотой тулгамдсан асуудлуудад цаашид авах арга хэмжээний талаар зөвлөмж боловсруулж гаргасан нь хэлэлцүүлгийн гол онцлог боллоо.

More 304 0

Category: Мэдээ мэдээлэл / Нийгэм

МАН-ынхан яагаад Н.Багабандийг "Оюу Толгой"-н ТУЗ-д байлгаад байна вэ?

2018/04/30

МАН-ынхан яагаад Н.Багабандийг "Оюу Толгой"-н ТУЗ-д байлгаад байна вэ?

Author: saikhnaa on 30-04-2018, 11:03

Монгол Улсын Засгийн Газар, "Рио Тинто Интернэшнл Холдингс Лимитед", "Айвенхоу Майнз" ХХК-иудын хооронд Оюу Толгойн зэс, алтны ордыг ашиглах "Хөрөнгө оруулалтын гэрээ"-г 2009 онд, "Оюу Толгой" ХХК-ийн хувь нийлүүлэгч талуудын хооронд "Хувь нийлүүлэгчдийн гэрээ"-г 2010 онд тус тус байгуулан ажиллаж буй билээ.

Ингэхдээ "Оюу Толгой" компанид Монголын төрийг төлөөлөн гурван гишүүн ажилладаг. Уг гурван гишүүнийг Монгол Улсын Засгийн Газрын харьяа "Эрдэнэс Монгол" компаний Төлөөлөн Удирдах Зөвлөл хуралдан томилдог юм. Үүнээс Монгол Улсын Ерөнхийлөгчөөр ажиллаж байсан Нацагийн Багабанди маш их хэл ам дагуулдаг боловч "Оюу Толгой" компаний Төлөөлөн Удирдах Зөвлөлийн гишүүнээр хоёр дахь удаагаа ажиллаж байна.

Тэрээр 2010 - 2013 онд Оюу толгой ХХК-ийн Төлөөлөн удирдах зөвлөлийн анхны гишүүнээр ажиллаж байсан бөгөөд 2016 оны 9 дүгээр сард буюу МАН УИХ-д олонхи болсны дараа "Оюу Толгой" ХХК-ийн ТУЗ-д дахин томилогдсон юм.

Н. Багабанди нь МАХН (МАН)-ын Нарийн Бичгийн Дарга, УИХ-ын анхны дарга, УИХ дахь МАХН (МАН)-ын бүлгийн дарга, МАХН (МАН)-ын Ерөнхий Нарийн Бичгийн Дарга, анхны даргаар ажиллаж байсан ба 1997-2005 онд Монгол Улсын Ерөнхийлөгчөөр хоёр удаа сонгогдон ажилласан.

Түүнийг Ерөнхийлөгч байх үед "Ардчилсан Холбоо" эвслийн томилсон Засгийн газрууд 4 удаа огцорч, С.Зориг алагдаж, "Эрдэнэт" үйлдвэр тойрсон дуулиан дэгдэж, МАХН (МАН)-ын дотоод зөрчил гүнзгийрч байв.

Монгол Улсын Ерөнхийлөгч Х.Баттулга 2018 оны 1 сарын 10-нд хэвлэлд ярилцлага өгөхдөө: "Оюутолгойн ТУЗ-ийн гишүүд сул ажиллаж байна. Монгол улсыг төлөөлөн ажиллахдаа эрх ашгаа хамгаалах тал дээр хойрго байгаа. Иймээс солих нь зөв" хэмээж байсан юм. Уул уурхай, Хүнд үйлдвэрийн сайд, УИХ-ын гишүүн Д.Сумьяабазар ч үүнийг дэмжиж: "Төлөөлөн удирдах зөвлөл гэдэг чанга ажиллах ёстой. ТУЗ бол ТУЗ шиг байх ёстой.

Бүгдээрээ үлбэгэр байна. Засгийн газар "Рио тинто"-д 6,5+лайбор=8,4 хувийн хүүг зээлд төлдөг нь хамтын ажиллагаанд сөргөөр нөлөөлж байна.Миний хувийн бодлоор Оюутолгойд худалдагдсан олон хүн бий. Засгийн газрын боловсруулсан мэдээллийг тэр айлд очиж худалддаг хүмүүс ч бий. Иймээс өнөөдрийн хоолноос илүү ирээдүйн ашгаа бодох нь зүйтэй. Ерөнхийлөгчтэй саналтай нэг байна" гэсэн билээ.

Хачирхалтай нь ЗГХЭГ-ийн дэд дарга Б.Бат-Эрдэнэ даргатай "Эрдэнэс Монгол" компаний Төлөөлөн Удирдах Зөвлөл Ерөнхийлөгч асан Н.Багабанди, УИХ-ын дарга М.Энхболдын "багийн хүн" гэгддэг Б.Мөнхбаатар, УИХ-ын гишүүн Ц.Гарамжавын хүргэн Ч.Алтаннар нартай холбоотой асуудлыг шийдэлгүй өдий хүрээд байна. Энэ бүхэн нь ч нөлөөлсөн үү? Н.Багабанди ажилдаа хариуцлаггүй хандаж, УИХ-ын ажлын хэсгийн хуралдаанд очдоггүй гэнэ.

Ер нь МАН-ынхан яагаад Н.Багабандийг хамгаалж, "Оюу Толгой"-н ТУЗ-ийн гишүүнээр нэг бус удаа томилоод байдаг нь хачирхалтай юм. Тэр бүү хэл "Рио Тинто" группийн Монгол дахь салбарын захирлаар Н.Багабандийн хамгийн сайн найз агсны хүү н.Мөнхтүшиг ажиллах болсон билээ. Зөвхөн энэ нь л Н.Багабанди "Оюу Толгой"-д ажиллах нь сонирхлын зөрчилтэй болох эсэх асуултыг тавихад хүргэж буй.

"Оюу Толгой" компаний Төлөөлөн Удирдах Зөвлөлд Армандо Торрес, Жеффри Тайгесен, Крэйг Киннел, Брэндан Лэйн, Г.Батсүх нар хөрөнгө оруулагч талыг төлөөлж, Н.Багабанди, Б.Мөнхбаатар, Ч.Алтаннар нар Монгол Улсын Засгийн Газрыг төлөөлж тус тус ажилладаг юм.

П.Мандах

Эх сурвалж: Sonin.mn

http://www.sonin.mn/news/politics-fb-bot/90291

More 281 0

Category: Онцлох / Улс төр

Х.Өлзий-Орших: Эмч, сувилагчдын цалинг 7-49 хувь нэмнэ

2018/04/30

Х.Өлзий-Орших: Эмч, сувилагчдын цалинг 7-49 хувь нэмнэ

Author: saikhnaa on 30-04-2018, 10:53

Эрүүл мэндийн яамны мэргэжилтэн X. Өлзий-Оршихоос цалингийн нэмэгдлийн талаар тодрууллаа.

-Эмч, сувилагчдын цалинг нэмэх судалгааг Хөдөлмөр нийгмийн хамгааллын яам, ЭМЯ хамтран багагүй хугацаанд хийлээ. Ямар үр дүнд хүрсэн бэ?

-Засгийн газрын 2016-2020 оны үйл ажиллагааны хөтөлбөрт эрүүл мэндийн ажилтны цалин хөлсний тогтолцоог боловсронгуй болгох, ажлын ачааллын, ур чадварт суурилсан тогтолцоог нэвтрүүлэх зорилтыг тусгасан. Энэ зорилтыг улсын хэмжээнд хөдөлмөрийн цалин хөлсний бодлогыг хариуцдаг Хөдөлмөр нийгмийн хамгааллын яам ахлан, ЭМЯ хамтарч хэрэгжүүлж байна. Энэ хүрээнд эмнэлгийн мэргэжилтний ажлын байрны үнэлгээг зохион байгуулсан.

Үүний дүнд сувилагч нарын болон нийт эрүүл мэндийн ажилтны албан тушаалын ангилал зэрэглэл шинэчлэгдсэн. Ангилал зэрэглэлтэй холбоотойгоор цалин хөлс тогтоогддог. Шинэчлэгдсэн үнэлгээний үр дүнг аваад үзэхэд одоо хүчин төгөлдөр мөрдөгдөж байгаа Засгийн газрын 2007 оны 354 дүгээр тогтоолоор батлагдсан ангилал зэрэглэлээр бүх сувилагч ижилхэн ТҮЭМ-II гэсэн ангиллаар цалинжаад явдаг. Харин шинэчилж байгаа цалин хөлсний сүлжээгээр бүх сувилагч зэрэглэл ахиж байгаа, дээд тал нь таван зэрэглэл ахиж, ТҮЭМ-VII гэсэн зэрэглэлд очиж байна.

-Цалинг нэмэхэд өөр юу шаардлагатай байгаа вэ?

-Энэ удаа бүх сувилагчийн ажлын байр, албан тушаалын ангилал зэрэглэл өсөж байгааг хариуцлагатайгаар хэлье. Тиймээс бүх сувилагч нарын цалин хөлс нэмэгдэнэ. Мөн энэ үнэлгээг хийснээр эрүүл мэндийн салбарын бүх эмч, ажиллагсдын цалин хөлс 7-49 хувь нэмэгдэхээр байгаа. Нийт 62.1 тэрбум төгрөг жилдээ шаардлагатай болно. Үйл ажиллагааг 2019 оны нэгдүгээр сарын 1 -нээс эхлэн хэрэгжүүлэх төлөвлөгөөтэй ажиллаж байна.

Б.ТУУЛ

More 355 0

Category: Мэдээ мэдээлэл / Эрүүл мэнд