Манай улс хүнсний аюулгүй байдал тал дээр авах юмгүй гэж хэлэхэд болно. Үүнийг ч батлах шиг боллоо. Олон улсын стандарттай сүлжээ түргэн хоолны газар нь иргэдийг олноор нь хордуулж эмнэлэгт хэвтэх дээр тулгалаа.

KFC-г "Таван богд" групп Монголд оруулж ирснийг хүн бүр мэднэ. Дэлхийтэй хөл нийлүүлж алхаж байна хэмээн анх орж ирэхэд нь хүн бүр л сайшааж байв. Гэтэл бодит байдал дээр хүний эрүүл мэндэд цаашлаад Монгол улсын хүн амын аюулгүй байдалд ч сөргөөр нөлөөлөх хэмжээний халуунд тэсвэртэй бактер, их хэмжээний нитрит илэрсэн хороор иргэдэд үйлчилж байна гэж хэн санах билээ. Дэлхийн жишгийг дэлхийн хэмжээнд нь л хий л дээ!

Олон түмнийг хооллох их буян болдог гэдэг. Тэгвэл өдгөө "Мөнгө цагаан, Нүд улаан" гэдэг үүн дээр л харагдаж байна. Мэдээж ашгийн төлөө байх нь гарцаагүй ч бусдыг ходоодоор нь барьцаалж, хордуулан байж мөнгө олох ухаан хаанаас төрдөг юм бол доо.

Удахгүй "Таван богд"-оос мэдэгдэл хийж, уучлал хүсэх биз. Гэлээ гээд хэдэн хүн ажлаас нь халаад өнгөрмөөргүй байна.

Олны үг ортой гэдэг. Хүмүүс хоорондоо жиг жуг хийх юм билээ. "Тахиа нь хатуу, энэ салбар тэр салбараасаа муу, түүхий эд нь Хятадаас орж ирдэг" гэх мэт. Олон улсын жишиг гэдэг хаа ч нэг л янзаараа байдаг шүү.  Түүнээс биш Монголд болохоор хүмүүс хордлоо, Монголд учраас амт нь өөр гэхгүй байлгүй.

Таван богд ганц KFC гэлтгүй өөр Олон улсын нийтийн хоолны сүлжээг Монголд оруулж ирсэн. Энэ байдлаараа бусад хоолны газруудад чинь хүн хордохыг үгүйсгэхгүй. Ц.Баатарсайхан та хэдий болтол  хоол нэртэй хороор бизнес хийх вэ? 

М.Март

эх сурвалж:CHUHAM.MN