Өнгөрсөн баасан гарагт ХЭҮК-оос УИХ-д 18 дахь илтгэлээ өргөн барьсан. Уг илтгэлд эрүүдэн шүүхийн эсрэг зөвлөмжийг мөн л багтаажээ. Тодруулбал, ХЭҮК-ийн 18 илтгэлийн 14-т нь эрүүдэн шүүхийн эсрэг зөвлөмж багтсан байгаа юм. УЕПГ-аас ирүүлсэн мэдээлэлд Прокурорын байгууллагад 2017 онд эрүү шүүлт тулгах гэмт хэргийн шинжтэй 82 гомдол ирсэн байна. Үүнээс 6 гомдолд эрүүгийн хэрэг үүсгэж, мөрдөн шалгажээ. Харин 61 гомдолд хэрэг үүсгэхээс татгалзсан байна. Прокурорын байгууллагатай холбоотой ХЭҮК-т хэд хэдэн гомдол ирснээс дурдвал, 461-р ангид хоригдож байсан Э, О, М нарын гомдолд, "...дүүрэг дэх цагдаагийн ... дүгээр хэлтсийн мөрдөн байцаагч Б хэргээ хүлээ хэмээн дарамт шахалт үзүүлж, зодож, эрүү шүүлт тулгасанд гомдолтой байна. ...аймгийн оршин суугч Х, Г нарын гомдолд, "Цагдаагийн газрын мөрдөгч Х, З, С нар чи ямар хэрэг хийснээ мэдэж байгаа биз дээ гээд хараалын үгээр доромжилж, дарамт шахалт үзүүлж байтал мөрдөгч Х орж ирээд наадах чинь хэргээ хүлээсэн үү, нөгөө хоёр нь хэргээ хүлээчихээд байхад чи яагаад хүлээдэггүй юм гээд миний дух, мөр лүү цохиод, муу муухай үгээр доромжилж дарамталсан. 

Мөрдөгч Х биднийг зам шалгалтаар авч явах үедээ машинд гавтай хонуулж, хөл нүцгэн гол гатлуулж, хамт явсан хүмүүсийг үүрч гол гарга гээд таван хүнийг нэг нэгээр нь үүрч гол гаргуулсан. Түүнээс болж миний хөл мөсөнд зүсэгдэж, гавлуулснаас болж баруун гар хавдсан, дух руу цохисны улмаас дух хавдсан" гэжээ. 461-р ангид хоригдож байсан яллагдагч Э-гийн гомдолд "мөрдөн байцаагч Б нь хилс хэрэг хүлээлгэх зорилгоор миний элэг, бөөр болон шанаа руу хэд хэдэн удаа хүчтэй цохиж, залгуурын утсаар ороолгосон бөгөөд шал долоолгож, толгой дээр гишгэж, баруун гарын долоовор хурууг бахиар хавчиж байгаад төмрөөр цохисон. Мөн өмгөөлөгчтэй хамт байцаалт өгмөөр байна гэхэд "Чи өмгөөлөгчөөрөө харуулж байгаад хэрэг хийхгүй яасан юм гэж доромжилсон хэмээн гомдол гаргажээ. Энэ мэт хэрэг шалгахдаа эрүүдэн шүүх хууль бус үйл ажиллагаа байсаар байгаа нь ХЭҮК-ийн илтгэлүүдэд баримтаар тусгагдсан байна. Харин эдгээр гомдлын дийлэнх нь прокурорын шатанд хэрэгсэхгүй болдог, хэрэг үүсгэхээс татгалкдаг нь иргэн гомдол гаргасан ч үр дүнгүй байдаг, магадгүй улам дарамтад өртдөг байж болзошгүй юм.