Олон Улсын Валютын Сан 2021 оны Монгол Улсын эдийн засгийн өсөлтийн төлөвийг хоёр нэгж хувиар өсгөж, 5.2 хувиар тогтоолоо.

Монгол Улсын эдийн засгийн өсөлтийн төлөвийг 5.2 хувь болгож нэмэгдүүлсэн нь энэ оны дөрөвдүгээр сарын тооцооллоос хоёр нэгж хувиар өссөн үзүүлэлт болж байна.

Түүнчлэн дэлхийн эдийн засгийн өсөлтийн төсөөллөө 5.9 хувь болгож, долоодугаар сарын тооцооллоос 0.1 нэгжээр буурууллаа. Харин 2022 оны өсөлтийн төсөөллийг 4.9 хувь болгосон байна.

Дэлхийн томоохон эдийн засагтай орнуудаас АНУ-ын дотоодын нийт бүтээгдэхүүний өсөлтийн төлөвийг бууруулж зургаан хувь болголоо. Харин БНХАУ-ын 2021 оны өсөлтийн төлөвийг долоодугаар сарын төлөвөөс 0.1 хувиар бууруулж, найман хувь болгожээ. Япон, Их Британи , Герман, Канад улсын төлөв 2021 онд буурч, 2022 онд өсөх төлөвтэй байна.

Олон Улсын Валютын Сангаас "коронавирус”-ийн халдварын "Дельта” хувилбарын тархалт, нийлүүлэлтийн гинжин хэлхээний тасалдлаас гадна үнийн хөөргөдөл, тэр дундаа хүнс болон шатахууны үнийн өсөлт нь өсөлтийн төлөвт нөлөөлөхийг анхааруулжээ. Мөн вакцинжуулалт хязгаарлагдмал байгаа нь бага орлоготой орнуудад хүндээр тусахаар байгааг онцолсон байна.

Томоохон эдийн засагтай орнуудын хувьд дотоодын нийт бүтээгдэхүүний өсөлт 2022 онд цар тахлын өмнөх үедээ хүрнэ гэж тооцоолжээ. Харин 2024 оны эдийн засгийн өсөлтийн төлөв цар тахлын өмнөх үеийн тооцооноос 5.5 хувиар бага байхаар байгааг тэмдэглэсэн байна.

Б.Юмжир | @b_yumjir