Баянгол дүүргийн удирдах албан тушаалтнууд төсвийн хөрөнгийг зориулалт бусаар зарцуулжээ


Баянгол дүүргийн удирдах албан тушаалтнууд төсвийн хөрөнгийг зориулалт бусаар зарцуулжээ

 

Авлигатай тэмцэх газрын Мөрдөн шалгах хэлтэс эрүүгийн 868 хэрэгт мөрдөн байцаалтын ажиллагаа явуулснаас өнгөрсөн долоо хоногт 9 хэргийг шүүхэд шилжүүлэх, 15 хэргийг хаах, 4 хэргийг харьяаллын дагуу шилжүүлэх саналтай прокурорт хүргүүлж, 4 хэргийг нэгтгэн шалгаж байна. Мөрдөн шалгах ажиллагаанд одоогоор 836 хэрэг шалгагдаж байна. Өнгөрсөн долоо хоногт орон нутагт эрүүгийн 1 хэрэгт 11 объектод нэгжлэгийн ажиллагаа явууллаа.
  
Шүүхэд шилжүүлэх саналтайгаар прокурорын байгууллагад хүргүүлсэн хэргүүдийг дурдвал:
 
  • Дархан-Уул аймгийн Цагдаагийн газрын албан тушаалтан "А” нь "Д”-г ажлын байранд болон гудамжинд удаа дараа зодож гэмтэл учруулж байсан, энэ тухай гаргасан гомдлыг удирдлага нь хүлээж авахгүй, хэргийг шийдвэрлэхгүй дарагдуулж байна гэх;
  • Сэлэнгэ аймгийн Шаамар сумын удирдах албан тушаалтан "А” нь байгууллагын багш, ажилчдын нэр дээр ур чадварын урамшуулал олгож, өөрийн данс руу шилжүүлүүлэн хувьдаа авдаг байсан гэх;
  • Говь-Алтай аймаг дахь Цагдаагийн газрын албан тушаалтнууд хохирогч, гэрч нарын мэдүүлгийг өөрчилсөн, хэргээс нотлох баримт үрэгдүүлсэн гэх;
  • Нийслэлийн Засаг даргын Тамгын газрын Нийтлэг үйлчилгээний газрын даргаар ажиллаж байсан "Э” нь тус газрын ерөнхий нягтлан бодогч "Ц”-тай бүлэглэн бусдаас хахууль авсан гэх;
  • Баянгол дүүргийн Нийгмийн даатгалын хэлтсийн дарга "А”, Баянгол дүүргийн Худалдан авах ажиллагааны албаны дарга "Ц” нар нь албан тушаалын байдлаа урвуулан ашиглаж, бусдад давуу байдал бий болгосон, төсвийн өмчийн хөрөнгийг зориулалтын бусаар зарцуулсан гэх;
  • Сэлэнгэ аймгийн Мандал сум дахь Онцгой байдлын хэлтсийн даргаар ажиллаж байсан "А” нь албан тушаалын байдлаа урвуулан ашигласан, байгууллагын өмч хөрөнгийг бусдад худалдан борлуулж өөртөө болон бусдад давуу байдал бий болгосон гэх;
  • "Б” нь Баян-Өлгий аймгийн нэгдсэн эмнэлгийн удирдах албан тушаалтнаар ажиллаж байхдаа хахууль өгөгчийн ашиг сонирхлын үүднээс гүйцэтгэх ёсгүй үйлдэл хийхийн тулд болон албаны чиг үүргээ хэрэгжүүлсний хариуд, хясан боогдуулах аргаар иргэдээс хахууль авсан, албан үүрэг, бүрэн эрх, албан тушаалын байдлаа урвуулан ашиглаж бусдад давуу байдал бий болгосон гэх;
  • Ховд аймгийн Цэцэг сумын нутаг дэвсгэрт орших тусгай хамгаалалттай байгалийн цогцолборт нэр бүхий компани нөхөн сэргээлтийн ажил хийх нэрийдлээр хууль бусаар ашигт малтмал олборлолтын үйл ажиллагаа явуулсан гэх үйлдэлтэй хэрэгт орон нутгийн болон хууль хяналтын байгууллагын эрх бүхий албан тушаалтнууд албан тушаалын байдлаа урвуулан ашиглаж хамтран оролцсон, хээл хахууль өгсөн, авсан гэх;
  • "Г” нь Дундговь аймгийн Цагдаагийн газрын даргаар ажиллаж байхдаа албан үүрэг, бүрэн эрх, албан тушаалын байдлаа урвуулан ашигласан гэх хэргийг прокурорын байгууллагад хүргүүлжээ. 
 
Эх сурвалж: АТГ

Сэтгэгдэл

АНХААРУУЛГА: Уншигчдын бичсэн сэтгэгдэлд www.Scandal.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Сэтгэгдэлтэй холбоотой санал гомдлыг 9318-5050 утсаар хүлээн авна.