"Их 20"-ийн 10 дахь удаагийн дээд хэмжээний уулзалт энэ сарын 14-16-ны өдрүүдэд Туркийн Анталия хотод болно.

Энэхүү дээд хэмжээний уулзалтын үеэр АНУ-ын Ерөнхийлөгч Барак Обама болон ОХУ-ын төрийн тэргүүн Владимир Путин нар уулзаж магадгүй талаар Цагаан ордны хэвлэлийн төлөөлөгч Жош Эрнест мэдээллээ.

ОХУ-ын Ерөнхийлөгчийн хэвлэлийн нарийн бичгийн дарга Дмитрий Песков мөн энэ талаар өчигдөр хэвлэлийнхэнд мэдээлэл өгсөн юм. Тэрээр  "Одоогоор хоёр орны төрийн тэргүүний уулзалтын тов гараагүй байгаа ч удирдагчид богино хугацааны албан бус уулзалт хийхийг үгүйсгэхгүй" гэжээ.

Их 20”-ийн бүлэг нь дэлхийн эдийн засгийн болон санхүүгийн хамтын ажиллагааны асуудлыг хэлэлцдэг форум юм. Уг бүлэг нь дэлхийн ДНБ-ий 85 орчим хувь нь ногддог хөгжингүй болон хөгжиж буй эдийн засгуудыг нэгтгэдэг. 2013 онд "Их 20”-ийг ОХУ даргалж байсан бол 2014 онд даргалах эрх Австралид шилжжээ. 2015 онд энэ үүргийг Турк гүйцэтгэж байгаа юм.

Эх сурвалж: ИТАР ТАСС