"Эрдэнэт үйлдвэр”-ийг барьцаалж их хэмжээний зээл авсан гэх "Жаст” группийн захирал Ш.Батхүүг цагдан хориод гурван сар өнгөрч байна. Өчигдөр түүний хоригдох хугацаа дууссан учир шүүх дахин 15 хоногоор сунгажээ.

Шүүх хурлын дараа Ш.Батхүүгийн бие эрс муудсан талаар өмгөөлөгч нь мэдээллээ. Тухайлбал, Ш.Батхүүгийн сахарын өвчин хүндэрч энгийн хүнийхээс гурав дахин өндөр түвшинд хүрчээ.

Түүний сахарыг бууруулахын тулд Цагдан хорих 461 дүгээр ангийн эмнэлгийн зүгээс инсулин тариаг маш өндөр доозоор өдөрт зургаан удаа хийж байгаа гэнэ.

 

Энэ нь сахарыг өсгөхгүйн тулд хийж буй аргацаасан арга хэмжээ аж. Инсулин тариаг ар гэрийнхэн нь авч Цагдан хорих 461 дүгээр ангийн эмнэлэг рүү оруулж байгаа юм. Мөн Ш.Батхүүгийн бөөр, тархины мэдрэлийн судсанд ноцтой өөрчлөлт гарсан.

Түүнийг даруйхан клиникийн мэргэшсэн эмнэлэгт хэвтүүлж эмчлүүлэхгүй бол амь насанд нь ноцтой байдал үүсээд байна гэж түүний өмгөөлөгч хэллээ. Ш.Батхүүг хоригдох хугацаанд ердөө гурван удаа байцаалт авчээ.