ОХУ-ын Омск мужийн нэгэн эмэгтэй дэлгүүрийн кассны дэргэд амаржсан байна. Энэ явдал өнгөрсөн сарын 11-ний өдөр Называевск хотод болжээ. YouTube дээр тавигдсан дүрс бичлэг дээр нэгэн жирэмсэн эмэгтэй авсан бараагаа бичүүлэхээр кассан дээр очоод гэнэт өвдөлт өгч буй нь харагдана. Ойрхон байсан хүмүүсийн хэлж буйгаар тэр эмэгтэй хэн нэгнээс тусламж эрээгүй гэнэ шүү. Зүгээр л төрөх явц эхэлсэн гэдгийг хэлсэн аж. 

Дэлгүүрийн ажилтнууд тэр даруй түргэн тусламж дуудсан хэдий ч яаруу хүү эмч нарыг ирэхээс өмнө хорвоод мэндэлсэн гэнэ. Эмэгтэйг төрж байх үеэр хажуугийн кассан дээр хүмүүс юу ч болоогүй юм шиг үйлчлүүлж байжээ. Ийнхүү дэлгүүр дотор 3620 грамм жинтэй хүү эрүүл саруул мэндэлсэн бөгөөд айлын зургаа дахь хүүхэд болсон түүнийг Иван хэмээн нэрийдсэн аж.