Зам дээр үл тасран үргэлжлэн цуврах машинуудыг даган суурьшсан энэ суурингийн амьдрал эмзэглэлийг эрхгүй төрүүлнэ. 21-р зуунд лаа барин зогсох жижиг худалдаа, үйлчилгээ эрхлэгчид, олон сар өдрөөр кабиндаа хоног төөрүүлэх 14 мянга гаруй жолооч нарын орчин нөхцлийг харвал цаг хугацаа зогссон мэт. Хөгжил гэдэг үгийг энд ярихад тун бэрх. Монгол, Хятадын хил дээр орших Гашуунсухайт боомт нь 1992 онд байгуулагдсан байдаг. Анх түүхий эд экспортлодог байсан энэ замаар 2008 оноос хойш эрдэс, баялгийн экспортын гол зам болсон билээ.