"Эрдэнэт үйлдвэр” ТӨҮГ болж төрийн мэдэлд очсон биш түмэн зовлонтой нүүр тулж байна. Захирлууд нь гэж эрх баригчдын захиасыг биелүүлэгчид бөгөөд хууль зөрчиж байсан ч хэнбугай нь ч мэдээгүй дүр эсгэсээр ирсэн. Хамгийн ойрын жишээ нь тус үйлдвэрийн ерөнхий захирал Х.Бадамсүрэн. Мань захирал тэтгэвэртээ суух нас нь аль хэдийн болчихсон. Хуулиараа нас нь тулчихсан учраас гэрээ нь хийгдээгүй яваа гэх. Яах вэ түүний дараагийн хүний тухай яриа үе үе гардаг ч тохироо нь бүрдэхгүй байгаа учраас тэр явтлаа чимээгүйхэн байх гэж хичээж байна.

Харамсалтай нь тийн хичээж байтал нь гай газар дороос гэгчээр урд хөршийн хил хаагдаж, одоо "Эрдэнэт үйлдвэр”-т хүнд асуудал үүсч магадгүй болчхоод байгаа юм. Тухайлбал, Феррохром Ф-200 огт байхгүй оны эхэнд гэрээ хийсэн компани нь авчрах боломжгүй гэх хариу өгсөн байна. Эмульгатор 3-5 хоногийн нөөцтэй. Карбид кальци дууссан нийлүүлэх компани олдохгүй, хүхэрт натри-65% байхгүй болжээ. Тиймээс тус үйлдвэрт дээрх гол нэрийн технологийн бүтээгдэхүүний нөөцийг орлуулж хэрэглэх асуудлаар судалгаа хийх ажлын хэсэг хүртэл гаргасан байна.

Хэрвээ орлуулах боломж үнэндээ байхгүй бол "Эрдэнэ үйлдвэр” мөд зогсож мэдэхээр байна.

Үнэнийг ийнхүү өгүүлэхтэй зэрэгцэн Улсын төсөвт их наяд давсан  орлого төвлөрүүлж байгаа, өнгөрсөн онд 37 орчим сая тонн хүдэр олборлож 32 сая тонн хүдэр боловсруулж  түүхэн дээд амжилт тогтоосон гээд магтахыг нь магтаж бас дөвийлгөхийг нь ч дөвийлгөх нь тодорхой.

Гэхдээ улсын маань ганц, бүр бөмбөрцөг даяараа мэддэг энэ том үйлдвэр зогсоход хүрэх нь гэх мэдээлэл чихэнд чимэггүй, зүрхэнд хүйт дааж байгаа нь тун тоогүй.

Товчхондоо бол улс төрчдийн захиалгаар очсон удирдлагууд нь алтан ширээ энэ тэрийг өрөөндөө  "шигтгэж” байхаар энэ гачланг  бүр эртнээс олж харах байв...