“Сүмбэр орд” хотхоны замын урд талаас “Олонлог” сургууль хүртэл хоёр урсгалтай авто зам, явган хүний зам тавихаар өнгөрсөн арванхоёрдугаар сард зарим аж ахуйн нэгжтэй зөвшилцсөн юм. Тухайн байршилд газар эзэмшдэг “Сентури Лэнд Марк” ХХК талбайн хэмжээгээ хэтрүүлэн, зөвшөөрөлгүй хашаа татсан зөрчил гаргасан тул мэдэгдэл хүргүүлжээ.  Тус мэдэгдэлд нэгдүгээр сарын 5-ны дотор зөвшөөрөлгүй татсан хашаагаа  чөлөөлөх тухай тусгасан. Гэвч уг аж ахуйн нэгж нь заасан хугацаанд хашаагаа чөлөөлөөгүй, мэргэжлийн байгууллагаас тавьсан шаардлагыг биелүүлээгүй тул хашааг буулган, газрыг албадан чөлөөлсөн байна. Газар чөлөөлөлтийг нийслэлийн төсвийн хөрөнгөөр хийсэн тул гарсан зардлыг буруутай этгээдээр нөхөн төлүүлэх юм. Энэ хавраас тус талбайд хатуу хучилттай авто зам тавихаар төлөвлөөд байгаа юм.