Өмнөговь аймгийн Даланзадгад суманд энэ сарын 14-ний өдөр /2017.01.14/ 18 настай Ц.А-г үл таних хүн зодож хүнд гэмтэл учруулан, хүчирхийлсэн хэргийн сэжигтнийг илрүүлэн, эрүүгийн хэрэг үүсгэж Өмнөговь аймаг дахь цагдаагийн газарт шалгаж байна.

 

Уг хэргийг илрүүлэхээр Мөрдөн байцаах газрын Онц хүнд гэмт хэрэг мөрдөх хэлтэс, Өмнөговь аймаг дахь Цагдаагийн газрын алба хаагчдын хамтарсан ажлын хэсэг ажиллаж Өмнөговь аймгийн Даланзадгад суманд төрсөн, бүрэн бус дунд боловсролтой, мэргэжилгүй, 1997 онд төрсөн Н.Р гэгч үйлдсэнийг тогтоожээ. Хохирогч Ц.А-гийн гавал яс цуурсан хугарал, цус хуралт зэрэг хүнд гэмтэл авчээ.

 

Мөн хэргийг шалгах явцад сэжигтэн Н.Р нь 2017 оны нэгдүгээр сарын 1-нд иргэн У.С-гийн "Galaxy S5” загварын гар утсыг, мөн өдрийн 21:00 цагийн үед иргэн С.А-ийн "Galaxy S5” загварын гар утсыг, 2017 оны нэгдүгээр сарын 17-ний өдөр иргэн Э.Н-ийн "LG” загварын гар утсыг хоолойг нь боож унаган, зодож амь биед аюултайгаар хүч хэрэглэн дээрэмдсэнийг тогтоосон байна.

 

Зарим цахим сайтад "Өмнөговь аймагт гарсан хэргийг гурван хүн үйлдсэн, цагдаагийнхан нэгийг барьж, хоёр нь баригдаагүй байна” гэх мэдээлэл цацагдаж байна. Энэ нь ташаа мэдээлэл бөгөөд дээрх хэргийг үйлдсэн хэрэгт Н.Р-ийг сэжигтнээр тооцон, эрүүгийн хэрэг үүсгэн шалгаж байгааг цагдаагийн байгууллагаас мэдээллээ.