Монгол Улсын Ерөнхийлөгч Х.Баттулга Монголын Тусгай олимпийн тамирчдын төлөөллийг өнөөдөр хүлээн авч уулзлаа. Уулзалтад Монголын Тусгай олимпийн хорооны тэргүүн, УИХ-ын гишүүн асан С.Оюун, УИХ-ын гишүүн, Тусгай олимпийн хорооны ТУЗ-ийн гишүүн Ч.Улаан, тус хорооны гүйцэтгэх захирал С.Алтанцэцэг, Өвөрхангай аймгийн Хөгжлийн бэрхшээлтэй иргэдийн тусгай бүлгийн багш Х.Пүрэвсүрэн, эцэг, эхийг төлөөлж Д.Оюунбилэг нар болон тусгай олимпийн тамирчин сурагчдын төлөөлөл оролцлоо.
Энэ 10 дугаар сарын 13-15-ны өдрүүдэд Монголын Тусгай олимпийн Үндэсний анхдугаар наадмыг спортын 7 төрлөөр Улаанбаатар хотод зохион байгуулж буйг уулзалтын эхэнд Тусгай олимпийн хорооны тэргүүн, УИХ-ын гишүүн асан С.Оюун танилцуулав.
Уг наадмыг 4 жил тутамд зохион байгуулах бөгөөд анхдугаар наадамд Улаанбаатар хотын 4 тусгай сургууль, Архангай, Баянхонгор, Говь-Алтай, Дархан-Уул, Завхан, Орхон, Хөвсгөл, Ховд, Өвөрхангай зэрэг 9 аймгийн нийт 230 тамирчин хүүхдүүд оролцож байгаа юм байна.
Оюуны бэрхшээлтэй хүүхдүүдийн тусгай олимпийн тэмцээнүүдэд Монголын тамирчид 2013 оноос оролцож эхэлсэн юм. Мөн онд Монголын Тусгай олимпийн хороог байгуулж, түүнээс хойш дэлхийн болон улс, бүсийн хэмжээний тэмцээнүүдэд амжилттай оролцож ирсэн байна.
Монгол Улсын Ерөнхийлөгч Х.Баттулга тамирчин хүүхдүүдэд амжилт хүсч баяр хүргээд ямар бэрхшээл учирч буйг тодрууллаа.
Нийслэлд тусгай 4 сургуульд эдгээр хүүхдийг хамруулдаг бол орон нутагт энгийн сургуульд суралцаж, зарим нь сургуульгүй үлддэг ажээ. Мөн бэлтгэл хийх байр танхим, хөрөнгө мөнгө дутагдалтай байдаг юм байна.
Монгол Улсын Ерөнхийлөгч Х.Баттулга аймаг, орон нутгийн удирдлагын анхааралд үүнийг авахуулах талаар дэмжиж ажиллана гээд тамирчидтай хамтарсан бэлтгэл хийлгэх, спортын заал, танхимуудад бэлтгэл хийх боломжоор хангах чиглэлд мөн анхаарч дэмжинэ гэдгээ илэрхийлэв.
Жудо бөхийн тамирчид паралимпийн тамирчидтай хамтран бэлтгэл хийдгийн нэгэн адилаар тамирчид тухай тухайн төрлөөр эдгээр хүүхдүүдтэй хамтран бэлтгэл хийж байх боломжтой гэж байлаа.
Уулзалтын үеэр тамирчид гаргасан амжилтынхаа талаар Монгол Улсын Ерөнхийлөгчид танилцуулж ярилаа.
Монголын Тусгай олимпийн тамирчин хүүхдүүд 2015 оны Лос- Анжелесийн зуны олимпоос 4 алт, 4 мөнгө, 2 хүрэл, 2017 оны Австрийн өвлийн олимпоос 2 алт, 4 мөнгө, 2 хүрэл медаль хүртсэн амжилт гаргаад байгаа юм. Монголын Тусгай олимпийн тамирчид "Ялалт байгуулахад минь туслаач. Хэрэв би ялж чадахгүй бол ялалт авч ирэх оролдлогыг минь зоригжуулаач” гэсэн уриатай юм.
ЭХ СУРВАЛЖ: http://www.president.mn
