Урбанекаар овоглосон Б.Лхагважав МҮХАҮТ-ийн ерөнхийлөгчөөр ажиллаж байгаад буусан нэгэн. Улс төрд хэдэнтээ үзэж, амжилт олоогүй тэрээр аливаа асуудлыг "Улс төржүүлэхдээ” гарамгай. Тэгвэл тэрээр жимс, ногооны салбараасаа гэнэт барилгын салбар руу орчихлоо. 2020 оны арванхоёрдугаар сарын 23-ны өдөр тэрээр "Монголын барилгын үндэсний ассоциаци" ТББ-ын даргын албан тушаалд томилогджээ.
Монголын Барилгын Үндэсний Ассоциаци нь салбарын ТББ-ын түншлэлийн хүрээнд 2018 оны 02 дугаар сараас эхлэн "Барилгын үйл ажиллагааны тусгай зөвшөөрөл олгох” үйл ажиллагааг хэрэгжүүлж байгаа. Маш том амбицтай газар... Харин Урбанек Б.Лхагжавын хувьд улс төрийн тоглолт хийх талбараа нь барилгын салбарыг сонгосон бололтой.
"Монголын барилгын үндэсний ассоциаци" ТББ-ын даргаар томилогдмогцоо цар тахлын энэ үед төрийн албан хаагчдын цалинг 50 хувиар бууруулаад хувийн хэвшлээ дэмж гэсэн санаачлагыг гаргаж... Тэр байтугай салбарын 7 төрийн бус байгууллагын нэрийг бариад ерөнхий сайдад мэдэгдэл хүргүүлсэн байх юм.
Монголчуудад бусдын хоолыг булааж, өөрөө хөлжих сэтгэл үгүй. Гэтэл ТББ-ын шинэ дарга Б.Лхагважав ийм санаачлага гаргаад зогсох хэвлэл мэдээллийн хэрэгслээр "бахдан” ярьж байна.
Уг мэдэгдэлд дурдагдсан 7 төрийн бус байгууллагаас огт санал аваагүйн зэрэгцээ, мэдэгдэл гарсан хойно тэд мэдсэн гэж Монголын барилгачдын холбооны ерөнхийлөгч М.Батбаатар ТВ4 телевизэд ярилцлага өгчээ. Нэг ёсондоо тэдний нэрийг барьж улс төр хийсэн нь энэ бололтой.
Эхнээсээ салбарын 7 төрийн бус байгууллага нэрийг нь ашиглаж, улс төржилт хийснийг эсэргүүцэн салбар яаманд хандаад байна. Энэ талаар БХБЯ-ны Төрийн нарийн бичгийн дарга С.Магнайсүрэн \эх сурвалж: ТВ4\ өгсөн мэдээлэлдээ дурджээ.
Цар тахлын энэ үед хувийн хэвшил зогсонг байдалд орж, эдийн засгийн хувьд хүнд нөхцөл байдалд орсныг хэн хүнгүй мэдэж байгаа. Гэхдээ арай ч бусдын хоолыг булааж өөрсдөө "Амьд үлдэх” адгийн арга хэрэглэх дээрээ тулаагүй нь лавтай. Хувийн хэвшлийнхэн бусдын хоолыг булаах бус бодлогын дэмжлэгийг л тэд хүсэж байгаа.
Б.Лхагважав бизнесмен хүн. Хувийн хэвшлийн нэг төлөөлөл. Үзэл бодлоо илэрхийлж болох ч байгууллагуудын нэрийг УЛС ТӨРД ашиглаж, увайгүй үйлдэл хийх ЭРХ түүнд үгүй. Барилгын салбарыг Улс төрийнхөө тавцан болгохоор оролдож буй түүнд салбарынхан тун эгдүүцэж байгаа болов уу? Ямар шалгуур, үзүүлэлтээр тэрээр "Монголын барилгын үндэсний ассоциаци" ТББ-ын дарга болчхов? Маш том эрх ашиг хөндөгдөж дээ...
Б.БАДАРЧ
