Саудын Араб улс Иран­тай хийх агаарын тээв­рээ зогсоож, Тегераныг дипломат харил­цаагаа хуучин хэ­вэн­дээ оруулахын тулд эел­дэг байхыг шаардсан байна. Саудын Арабын Гадаад хэргийн сайд Адель Аль-Жубер "Ройтерс” агентлагт өгсөн ярилц­лагадаа "Өнгөрсөн бямба га­ригт Саудын Араб тер­рорист хэмээн үздэг шийтийн удирдагч Нимр Аль-Нимрийг цаазаар авс­ны дараа эхэлсэн хоёр орны харилцааны хур­цад­мал байдалд Тегеран буруутай” хэмээн мэдэгд­жээ.

Сайдын ярьснаар Эр-Рияд (Саудын Ара­бын нийслэл) "Ираны түрэмгийлэлд” хариу өг­сөн гэнэ. Тэрээр Тегеран Саудын Араб болон Персийн булан­гийн орнуудад хэт дав­рагч­дыг илгээж, алан хядах ажиллагаа зохион бай­гуулсан хэмээн буруутгав.

Түүнчлэн Жубер "Сау­дын Араб мөргөл­дөөнийг хурцатгах бодолгүй байгаа” гэв. "Бид Ираны баримталж буй бодлогын эсрэг хариу барьж байна. Иран Ливанд цэргээ оруулсан. Тэд Сири руу тусгай отрядуудаа илгээж байна. Гэхдээ бид Ираны иргэдийг хаж мөргөлийн үеэр Мекке болон Медине хотуудад ирэхэд нь саад хийхгүй” хэмээн Саудын Арабын Гадаад хэргийн сайд хэлжээ.

Адель Аль-Жубер өмнө нь Сауд Араб улсаас АНУ-д суугаа Элчин сайдаар ажиллаж байсан. 2011 онд Ираны талаас түүний амь насанд халдахад АНУ-ын Тагнуулын төв газар амьд үлдэхэд нь тусалсан аж.

Энэ сарын 2-нд Саудын Арабын эрх баригчид исламын шашны шийт урсгалын нөлөө бүхий удирдагчдын нэг Нимр Аль-Нимрийг цаазаар авсны дараа Тегеран, Эр-Риядын хоорондын байдал хурцадсан билээ. Иранд эсэргүүцлийн ажиллагаа эхэлж, тус улс дахь Саудын Арабын ЭСЯ, консулын газар руу халдсан аж. Хоёр улс дипломат харилцаагаа зогсоож, элчин сайдаа эргүүлэн татсан юм. 

Эх сурвалж: "Зууны мэдээ” сонин